TƏŊMORFANNE 39
39
Yuseɓ ne mawin Potifar
1Ismaelien gera sǝr Egiɓ ne Yuseɓ, ge leera fan jol Potifar ne ki. Potifar ye dǝɓlii za ma byak cok yaŋ Farao. 2Masǝŋ no ne Yuseɓ, fan makẽne moo joŋko daŋ a ga pelle. Kaa yaŋ dǝɓlii ah Egiɓiyo. 3Dǝɓlii ah kwo Masǝŋ no ne Yuseɓ, so Masǝŋ ẽe fan jol ah daŋ. 4Potifar a laa pǝ'nyah ne ki, ɓaŋ ko ka mo byak ko tǝkine yaŋ ah daŋ, soɓ fan ah daŋ ge jol ahe. 5Ne cok mo ɓaŋ ko kan dǝɓlii yaŋ ah ne ko, Masǝŋ ẽe fan yaŋ Egiɓiyo mor Yuseɓ. Eẽ Masǝŋ ge tǝ fan yaŋ ah tǝkine 'wah ah daŋ. 6Oho, Potifar soɓ fan mai mo no ne daŋ ge jol Yuseɓ, soɓ fan ki jol suu ah ya sai farel mai moo renko to. Yuseɓ sye a ne kee suu pǝsãh tǝkine cok nǝn daŋ.
7Fahfal ɓǝ maino, mawin dǝɓlii ah tǝŋ cwaa ko faa: Mo swǝ ne me. 8Amma Yuseɓ zyii ya, faa nyi mawin dǝɓlii ahe: Dǝɓlii ɓe kan syee fan mai mo ɓǝr yaŋ ah ya, soɓ fan mai mo ne ko daŋ jol ɓe. 9Dǝɓ mai mo kal me ɓo ne yǝk kǝka ɓǝr yaŋ nyee ya, cak fan ki laŋ wo ɓe ya sai amo to, mor amo ye mawin ahe. Me gak joŋ ɓǝɓe' malii mai ne joŋ faɓe' wo Masǝŋ suu ɗǝne? 10Koo moo faa ɓǝ nyi Yuseɓ nai zah'nan daŋ laŋ, Yuseɓ zyii swan ne ki ya. Koo ka kaa kah ah laŋ ya ta.
11Comki Yuseɓ ge ɓǝr yaŋ ka joŋ yeɓ ahe, za yaŋ ah daŋ ka yaŋ ya. 12Mawin gbǝ mbǝro ah faa: Mo swǝ ne me. Amma Yuseɓ soɓ mbǝro jol ah ɗuu pǝ̃ǝ ge lalle. 13Ne cok mawin mo kwo Yuseɓ soɓ mbǝro ah jol ah ɗuu pǝ̃ǝ ge lalle, 14so ɗii za yaŋ ah faa nyi ra: We ẽe ɗǝ, Yahuduyo mai wor ɓe mo ge ɓo yaŋ ɓuu ne ko ka kee ru ya, ge wo ɓe kǝnah ka swan ne me, amma me ɓyaŋ ɓǝ pǝ'manne. 15Ne cok mo laako me ɓyaŋ ɓǝ me ɗiɗii, ɗuu pǝ̃ǝ ge lal soɓ mbǝro ah kah ɓe. 16So kan mbǝro Yuseɓ kah ah ŋhaa byak Potifar pii soo ge yaŋ. 17Kee ɓǝ ah nyi wor ah na ma kǝpel faa: Byak Yahuduyo mai mo ge ne ko ge wo ɓe ka swan ne me. 18Ne cok mo laako me ɓyaŋ ɓǝ o, ɗuu soɓ mbǝro ah kah ɓe pǝ̃ǝ ge lalle.
19Ne cok dǝɓlii Yuseɓ mo laa ɓǝ mai mawin ah mo kee nyi ko byak ɓo joŋ me naino, so ɓaŋ kpãh pǝlli, 20gbǝ Yuseɓ ɓoo ko ge daŋgai pǝ cok mai moo gaara za daŋgai goŋ gŋ. So Yuseɓ kaa pǝ daŋgai. 21Amma Masǝŋ no ne Yuseɓ, kwo syak tǝl ahe, joŋ ka dǝɓ ma lwaa ɓǝ daŋgai mo laa pǝ'nyah ne ki. 22Swah daŋgai soɓ za daŋgai daŋ nyi Yuseɓ, koo yeɓ fẽene mo gŋ daŋ ako yee joŋni. 23Dǝɓ ah ka kan syee fan mai mo soɓ jol Yuseɓ ya, mor Masǝŋ no ne ki. Koo moo joŋ fẽene daŋ, Masǝŋ ɓoo fan ah ga pelle.
Currently Selected:
TƏŊMORFANNE 39: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.