TƏŊMORFANNE 40
40
Yuseɓ kee zah lom nyi za daŋgai
1Fahfal ɓǝ maino, dǝɓlii za ma joŋ fazwan goŋ sǝr Egiɓ ne dǝɓlii za ma joŋ farel ah joŋra faɓe' wo goŋ ɓǝǝra. 2Farao ɓaŋ kpãh ne zaluu matǝ gwa raiko. 3Rǝk ra ge yaŋ swah za byak daŋgai ɓǝr yaŋ daŋgai pǝ cok mai mo gaara Yuseɓ ɓo gŋ. 4Nǝnra gŋ zah'nan pǝpãare. Swah za byak daŋgai soɓ ra jol Yuseɓ ka mo joŋko yeɓ mor ɓǝǝra. 5Ne suŋ maki ah dǝɓ ma joŋ fazwan goŋ Egiɓ ne pa joŋ farel ah mai ara mo pǝ daŋgai loora lom gwa daŋ. 6Yuseɓ ge wo ɓǝǝ ne zah'nan ge lwaa ra tǝ swaa ɓǝ. 7Fii zaluu Farao mai mo ne ki pǝ daŋgai yaŋ dǝɓlii ah faa: A fẽe ye joŋ zahpel ɓii woo ɓo tǝ'nah nai ne? 8Faara nyi ko: Ru lolom ɓo, ru lwaa dǝɓ ma kee zah ah nyi ru ya. Yuseɓ faa nyi ra: Kee zah lom sye, yeɓ Masǝŋ ye ka ne? We kee ɓǝ ah nyi me laa ɗao.
9Dǝɓlii za joŋ fazwan goŋ kee ɓǝ lom ah nyi Yuseɓ faa: Lom ɓe me loo me kwo kpuu vin vaŋno uu ɓo pel ɓe. 10Kpuu vin ah ɓer jol ɓo sai. Ne cok ah juu goo ɓo, jiini, fãini, lee syẽm ah kal tǝ ruŋ pǝsãhe. 11Tahsah Farao no jol ɓe me ɓaŋ lee kpuu vin ah me ŋhǝǝ ge pǝ tahsah Farao, me nyi tahsah ah ge Farao jolle. 12Yuseɓ faa nyi ko: Zah lom ah a naiko: ɓer kpuu ah matǝ sai cuu zah'nan sai ɓo. 13Coŋ zah'nan ɓo sai Farao ga yii mo, amo ga pii soo ga pǝ cok yeɓ ɓo, mo ga nyi fazwan ga nyi Farao jol tǝgbana matãa mo yea tǝ nyi nyi ko. 14Amma fan mai mo joŋ wo ɓo nai ɓe, ka mo foo ɓǝ ɓe. Mo joŋ gboŋgboŋ wo ɓe, mo faa ɓǝ ɓe wo Farao, mor ka mo wǝǝ me gin yaŋ maiko. 15Mor kiŋra me gin sǝr Yahuduen ne nyinni, nyee laŋ me joŋ fan kii nǝ pǝ koŋ ka mo ɓoora me ge daŋgai ya.
16Dǝɓlii za joŋ farel goŋ kwo Yuseɓ kee zah lom ah pǝsãhe, so faa nyi Yuseɓ: Pǝ lom ma ɓe laŋ sye, kee no tǝtǝl ɓe sai, a ne tǝwaa mafãi ah gŋ. 17Pǝ kee ma tǝl ah sǝŋ farel Farao camcam no gŋ ne tǝgǝrri, juu rera farel ah pǝ kee tǝtǝl ɓe. 18Yuseɓ zyii faa: Zah lom ɓo a naiko: kee sai ah zah'nan sai yo. 19Coŋ zah'nan ɓo sai Farao ga ŋgoŋ tǝtǝl ɓo, a ga rao mo tǝ kpuu, juu ga rera nǝǝ ɓo.
20Zah'nan sai ah zah'nan byaŋ Farao yo, joŋ fĩi ɗii zaluu ah daŋ. Wǝǝ dǝɓlii za joŋ fazwan ne dǝɓlii za joŋ farel pel zaluu ah ra. 21So jin dǝɓlii za joŋ fazwan ge tǝ yeɓ ah ka mo nyiko fazwan nyi Farao. 22Amma pee dǝɓlii za joŋ farel ge rao tǝ kpuu. Fan ah joŋ tǝgbana mai Yuseɓ mo kee zah lom ah nyi ra. 23Amma dǝɓlii za joŋ fazwan foo ɓǝ Yuseɓ yao, yaŋ ɓǝ ahe.
Currently Selected:
TƏŊMORFANNE 40: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.