TƏŊMORFANNE 28
28
1Isak ɗii Yakuɓ, ẽe ko, so lai ko faa: Mo ɓaŋ ŋwǝǝ kǝsyil wee ŋwǝǝ Kanaan ka. 2Mo urri, mo ge sǝr Mesopotamia wo Betuel pah ma ɓo, ka mo ɓaŋ mawin gŋ kǝsyil wee Laban naa mah ma ɓo kanne. 3Masǝŋ ma ne swah daŋ mo ẽe mo ka mo joŋko morsǝ̃ǝ ɓo pǝpãare, a ga ɓoo za ga nyi mo pel pǝlli, ka mo yea na pah za pãare. 4A ga jin ẽe mai mo ẽe Abraham ne ko ge tǝ ɓo tǝkine morsǝ̃ǝ ɓo daŋ mor ka mo re sǝr mai mo kaa ɓo gŋ na mowoore, sǝr ah Masǝŋ nyi Abraham. 5Isak nyi fahlii nyi Yakuɓ, so Yakuɓ kal ge Mesopotamia wo Laban we Betuel Arameyo, naa mah Rebeka mah Yakuɓ ne Esau.
Esau ɓaŋ mawin maki ah faɗa
6Esau kwo Isak ẽe Yakuɓ, nyi fahlii nyi ko ka mo geko Mesopotamia ka mo ɓaŋko mawin gŋ. Ne cok mo tǝ ẽe ko, lai ko faa: Mo ɓaŋ ŋwǝǝ kǝsyil wee Kanaan ka. 7Yakuɓ laa zah pah ah ne mah ahe, kal ge Mesopotamia. 8So Esau tǝ ɓe, ɓǝ wee Kanaan maŋwǝǝ 'nyah suu pah ah Isak ya. 9Esau zol kal ge wo Ismael, ge ɓaŋ Mahalot mǝlaŋ Ismael we Abraham naa mah Nebajot mawin ge tai ŋwǝǝ ah ma yaŋ ne kanne.
Yakuɓ lolom Betel
10Yakuɓ zol gin Beerseba kal ge Karan. 11Ge dai cok maki ahe, swǝ gŋ, mor com dan ɓe. Ɓaŋ tǝsal cok ah vaŋno kan tǝtǝl gŋ, so nǝnǝm pǝ cok ahe. 12Lolomme, kwo kpuucel syii ɓo tǝ sǝrri, sok ah ge dai masyiibamme, angeloi a yeera tǝl ah ga sǝŋ, a so ɗǝrra tǝl ah gin sǝŋ. 13So Dǝɓlii ge uu tǝl ah sǝŋ faa: Ame Dǝɓlii Masǝŋ pa ɓo lii Abraham ne Masǝŋ Isak. Sǝr mai mo swǝ ɓo tǝl ah me ga nyi nyi mo tǝkine morsǝ̃ǝ ɓo. 14Pãa morsǝ̃ǝ ɓo ga yea tǝgbana ɓǝm sǝrri. A ga myahra ga kaa laa sǝr nai daŋ. Za sǝr daŋ ga lwaara ẽe mor ɓo tǝkine morsǝ̃ǝ ɓo. 15Mo ẽe ɗǝ, me no ne mo. Me ga byak mo pǝ cok daŋ moo ga gŋ. Me ga pii soo ge sǝr mai ne mo. Me ka soɓ mo ya, sai ka me joŋ fan mai me faa nyi mo daŋ ɓe.
16Yakuɓ kpiŋ gin tǝ nǝm ah faa: Masǝŋ no nyeeno, amma ame tǝ ɓǝ ah ya. 17Gal re Yakuɓ, so faa: Cok mai cok ren gal o, fan ki ka nyee ya, yaŋ Masǝŋ ye to. Zahfah coksǝŋ no nyeeno.
18Yakuɓ ur ne zah'nan pim, ɓaŋ tǝsal mai mo kan tǝtǝl gŋ, pee ge sǝŋ ka mo yea na fan ma foo ɓǝ ahe, so syee nǝm ge tǝl ahe. 19So ɗii cok ah ne Betel , amma kǝpel a ɗii yaŋ ah ne Lus. 20Yakuɓ haa zah faa: Masǝŋ mo no ne me ɓe, mo so byak me tǝ fahlii mai me tǝ ga ɓe, mo nyi farel me ka ren tǝkine fan wo suu ka ɓooni, 21so me pii soo ge yaŋ pa ɓe jam ta ɓe, Dǝɓlii ga yea Masǝŋ ɓe. 22Tǝsal mai me pee ge sǝŋ ka yea na fan ma foo ɓǝ ahe, a ga yea yaŋ Masǝŋ, fan mai moo ga nyi nyi me daŋ me ga nyi patǝ jemma ah nyi mo.
Currently Selected:
TƏŊMORFANNE 28: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.