TƏŊMORFANNE 27
27
Isak ẽe Yakuɓ
1Ne cok Isak mo tamme, nahnǝn ah ka kwan cok pǝsãh yao, ɗii Esau wel ah malii faa nyi ko: We ɓe. Esau zyii: Awai. 2Faa nyi ko: Mo ẽe me tam ɓe, me tǝ zah'nan wul ɓe ya. 3Mo woo fan gao ɓo, suguu tǝkine saŋne. Mo ge cok ne ka mo i nǝǝ gee me ne ko, 4so ka mo joŋ farel ma'nyah mai me 'yah nyi me ne ko, ka mo gee me ne me re ka me ẽe mo kǝpel wul ɓe.
5Ne cok Isak mo tǝ faa ɓǝ nyi wel ah Esau, Rebeka laa ɓe. So Esau kal ge fah cok ka kyeɓ nǝǝ gin yaŋ ne ko. 6Rebeka faa nyi wel ah Yakuɓ: Me laa pa ɓo tǝ faa ɓǝ nyi naa ma ɓo Esau, 7faa: Mo kyeɓ nǝǝ cok ge ne ka mo joŋ farel ma'nyah ah nyi me ne re ka me ẽe mo pel Masǝŋ kǝpel wul ɓe. 8Zǝzǝ̃ǝko na ɓe, mo laa ɓǝ mai me tǝ faa nyi mo. 9Mo ge gbah wee sǝgwii masãh ah gwa gee me ne ko ka mo joŋ farel ma'nyah ah nyi pa ɓo ne na mai mo 'yahko, 10ka mo gee pa ɓo ne mo reko, ka mo ẽeko mo kǝpel wul ahe.
11Yakuɓ faa nyi mah ah Rebeka: Mo ẽe ɗǝ, naa ma ɓe Esau ne syiŋ wo suu, amma ame ka ne syiŋ wo suu ya. 12Ɗah maki pa ɓe a laɓ suu ɓe, me so ga yea wol ah tǝgbana dǝɓ ma joŋ vǝrvǝr ne ki, me so 'nahm zahyee ge tǝ ɓe ne soɓ ẽere. 13Amma mah ah zyii faa: Zahyee ah ge tǝ ɓe ba, na ɓe, mo laa ɓǝ faa ɓe sye to, mo ge gbah gwii ah gee me ne ko. 14Yakuɓ kal ge gbah gwii gee mah ah ne ko. So mah ah joŋ farel ne tǝgbana mai pah ah mo 'yahe. 15Rebeka ɓaŋ mbǝro Esau wel ah malii masãa ah mai mo no ɓǝr yaŋ, ɓoo nyi Yakuɓ wel ah malaŋne. 16So woo wak wee sǝgwii koo jol ah ne sol ah ne ko, mor a bai syiŋ. 17So nyi farel ma'nyah ne paŋgasso mai mo kǝǝko nyi wel ah Yakuɓ jolle.
18Yakuɓ kal ge wo pah ah ne faa: Daddǝ. Pam zyii: Awai. Fii ko: Amo ye zune, na ɓe? 19Yakuɓ faa nyi pamme: Ame Esau, we ɓo malii, me joŋ fan mai mo faa nyi me ko ɓe, me pǝǝ mo, mo ur kaa sǝŋ, mo re nǝǝ cok ɓe kŋ ka mo ẽe me kǝpel wul ɓo. 20Isak faa nyi Yakuɓ: Joŋ ɗii mo lwaa gwari nai ne, na ɓe? Zyii faa: Mor Dǝɓlii Masǝŋ ɓo ye nyi pejii ah nyi me. 21Isak faa nyi Yakuɓ: Mo tǝɓ ge ka me laɓ mo na ɓe, mor ka me tǝ ryakryak amo ye na ɓe Esau 'manna. 22Yakuɓ tǝɓ ge wo pah ah Isak. So laɓ ko faa: Kyaŋ, kyaŋ Yakuɓ yo, amma jolle, jol Esau yo. 23Isak tǝ ko ya, mor jol ah ne syiŋ na mǝ naa mah ah Esau. Coŋ biŋ ka mo ẽe ko, amma so fii ko, 24faa: Amo ye na ɓe Esau 'manna ne? Yakuɓ zyii faa: Ame yo. 25So Isak faa: Mo gee me ne nǝǝ cok na ɓe, ka me re, me ẽe mo kǝpel wul ɓe. Yakuɓ ge nyi ne farel ah re, so nyi bii lee kpuu vin nyi ko zwǝ ta. 26Pah ah Isak faa nyi ko: Mo tǝɓ ge ka mo nyiŋ me ne zahe na ɓe. 27So tǝɓ ge zwǝ pah ah ne zahe. So Isak laa fuŋ mbǝro ahe, ẽe ko faa: Fuŋ na ɓe a tǝgbana fuŋ 'wah mai Masǝŋ mo ẽe ɓo. 28Masǝŋ mo nyi 'wah sãh nyi mo, mo soɓko mahm coksǝŋ nǝ tǝl ah ka mo lwaa sor tǝkine bii lee kpuu vin pǝlli. 29Za sǝr daŋ ga joŋra mor ɓo. Zahban daŋ ga keara sǝŋ pel ɓo. Amo ye ga yea dǝɓlii wee pa ɓo. Wee ma ɓo ga keara sǝŋ pel ɓo. Dǝɓ mo tǝǝ mo ɓe, a ga ciŋ dǝɓ zahyee. Dǝɓ mo ẽe mo ɓe, a ga ciŋ dǝɓ ma ne ẽe tǝl ah ta.
Isak ẽe Esau
30Isak vǝr ẽe Yakuɓ, Yakuɓ pǝ̃ǝ gin wol ah kal ge lalle. Fahfal ah sǝ, naa mah ah Esau pii soo gin gao ge. 31Esau laŋ joŋ farel ma'nyah ah ɓaŋ ge pam ne ko, faa nyi pah ahe: Daddǝ, mo ur sǝŋ, mo re nǝǝ cok na ɓo mor ka mo ẽe me. 32Pah ah Isak fii ko: Amo ye zune? Zyii faa: Ame Esau we ɓo malii. 33Zahzyil nǝǝ Isak, suu kal tǝ coo ko, so faa: Azu ye i nǝǝ cok joŋ farel gee me ne me re kǝpel ka mo ge ya ba ne? Me ẽe ko ɓe, ẽe ah laŋ ciŋ mǝ ah ɓe ta. 34Ne cok Esau mo laa ɓǝ faa pah ah naiko, ɓyaŋ ɓǝ ne yee faa nyi pah ahe: Daddǝ, mo ẽe me ta. 35Amma Isak faa: Naa ma ɓo ge ne vǝrvǝr nyiŋ ẽe mai me 'yah ka ẽe mo ne ko kal ne ɓe. 36Esau faa: Ɗiira ko ɓo ka ne Yakuɓ ya ne ? Joŋ me ɓo ɓal gwa ɓe, nyiŋ welii ɓe, zǝzǝ̃ǝ so nyiŋ ẽe mai mo 'yah ẽe me ne ɓe kpǝ. Esau so faa: Mo coŋ ẽe mor ɓe ya ne? 37Isak zyii zah Esau faa: Mo ẽe ɗǝ, me ɓaŋ ko kan dǝɓlii tǝ ɓo ne ɓe. Me nyi wee pah ah nyi ko ne za yeɓ ah daŋ. Me nyi sor tǝkine bii lee kpuu vin nyi ko ɓe ta. Me so nyi fẽe nyi mo faɗa ne na ɓe? 38Esau faa nyi pah ahe: Daddǝ, mo ne ẽe vaŋno to ne? Mo ẽe me ta, Daddǝ. Isak so kaa 'wa, so Esau lai yee pǝ'manne. 39Fahfal ah pah ah Isak faa nyi ko: Mahm ka ga nǝ tǝ 'wah ɓo ka joŋ fan nyi mo ya. 40Mo ga lwaa fan ne zǝǝ. Mo ga joŋ yeɓ zahmor naa ma ɓo, amma ne cok mo ge ŋwookyaŋ ne ki ɓe, mo ga lwaa tǝtǝl suu ɓo.
41Esau syiŋ Yakuɓ mor ẽe mai pah ah mo ẽe ko. Esau foo pǝ zahzyil ah faa: Zah'nan wul pa ɓe a gwari. Fahfal ah me ga i naa ma ɓe Yakuɓ pǝ wulli.
42Ge keera ɓǝ Esau we malii nyi mah ah Rebeka. So Rebeka ɗii Yakuɓ wel ah malaŋ faa nyi ko: Naa ma ɓo Esau yah faŋ val tǝ ɓo ka in mo pǝ wulli. 43Zǝzǝ̃ǝko, na ɓe, mo laa zah ɓe, mo urri, mo ɗuu ge wo naa ma ɓe Laban Karan. 44Mo kaa ne ki, sai ka kpãh naa ma ɓo wuu ɓe. 45Ka kpãh naa ma ɓo mo ɓaŋ ɓo tǝ ɓo mo vǝr ɗǝ, ka mo yaŋko ɓǝ mai mo joŋ wol ahe, me so pepee ga ɗii mo gŋ ba. We ga wuk jol ɓe com vaŋno tǝ fẽe gwa daŋ ne?
Isak pee Yakuɓ kal ge yaŋ Laban
46Rebeka faa nyi Isak: Ɓǝ foo ɓe gaɓ me tǝ ɓǝ ŋwǝǝ Esau mai mo woo ra ɓo kǝsyil Hetien. So Yakuɓ mo ɓaŋko ŋwǝǝ kǝsyil za marai ta ɓe, pǝram wul ɓe.
Currently Selected:
TƏŊMORFANNE 27: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.