TƏŊMORFANNE 17
17
1Ne cok Abram mo joŋ syii jemma doraŋ tǝtǝl doraŋ, Dǝɓlii ge wol ah faa: Ame Masǝŋ ma ne swah daŋ. Mo syee ne ɓǝ foo ɓe, mo joŋ fan pǝsãhe. 2Me ga swaa ɓǝ gbanzah ɓe me gbǝ ɓo ne mo, me ga joŋ morsǝ̃ǝ ɓo yea pǝpãare. 3Abram ɗǝŋ tǝtǝl ge sǝŋ. 4So Masǝŋ faa ɓǝ nyi ko: Ɓǝ gbanzah ɓe me gbǝ ɓo ne mo a naiko: Mo ga yea pah za pǝlli. 5Ka ɗiira mo ne Abram faɗa yao, amma a ga ɗiira mo ne Abraham, mor me joŋ mo ka mo yea pah za pãare. 6Me ga ɓoo tǝnah ɓo ga pelle, me ga joŋ za nyi mo pǝlli, goŋ ga pǝ̃ǝra gin morsǝ̃ǝ ɓo.
7Me ga swaa ɓǝ gbanzah ɓe me gbǝ ɓo ne mo ne wee ɓǝr ɓo fahfal ɓo tǝkine zahŋhǝǝtǝ̃ǝ ma fahfal ɓǝǝra. Ɓǝ ah a yea ga lii. Me ga yea Masǝŋ ɓo ne mǝ wee ɓǝr ɓo fahfal ɓo. 8Me ga nyi sǝr Kanaan mai mo kaa mowoo ɓo gŋ daŋ nyi mo tǝkine wee ɓǝr ɓo ga lii, ame ye ga yea Masǝŋ ɓǝǝra.
9So Masǝŋ faa nyi Abraham faɗa: Mo gbǝ ɓǝ gbanzah ɓe, amo tǝkine wee ɓǝr ɓo ma fahfal ɓo ne zahŋhǝǝtǝ̃ǝ ma fahfal ɓǝǝ ra daŋ. 10Ɓǝ mai amo tǝkine wee ɓo ma fahfal ɓo we yea ne joŋ ah a naiko: Wee ɓii mawǝǝ daŋ mo daara kanne. 11Ɓǝ daakan ɓii a ga yea tǝgbana fan ma cuu ɓǝ gbanzah ɓe ma kǝsyil ɓe ne we. 12We wor ma kǝsyil ɓii daŋ mo byaŋ joŋ zah'nan nama ɓe, we daakan nyi ko. Morsǝ̃ǝ ɓii mawǝǝ daŋ mo daara kanne, koo wee wǝǝ ma bem piicel ɓiiri, wala mai we lea jol za gwǝǝ ne lakre, koo mai mo saaŋ ki ne zahban ɓiir a laŋ, mo daara kanne. 13We daakan nyi ra vaŋno vaŋno daŋ. Ɓǝ ah a ga yea wo suu ɓii tǝgbana fan ma cuu fan mai moo yea ga lii. 14Amma dǝɓ mai mo daakan a, mo ne gãhnyah ah 'wa ɓe, we nĩi ko kǝsyil ɓii ge lalle, mor ɓeɓ ɓǝ gbanzah ɓe ɓo.
15So Masǝŋ faa nyi Abraham: Mo ɗii mawin ɓo ne Sarai kao, amma mo ɗii ko ne Sara. 16Me ga ẽe ko, me ga nyi we wor nyi mo ne ki. Me ga ẽe ko, a ga yea tǝgbana mah za sǝrri, goŋ za sǝr ga pǝ̃ǝra gin morsǝ̃ǝ wee ɓǝr ahe.
17Abraham ɗǝŋ tǝtǝl ge sǝŋ. So syesyakke, foo pǝ zahzyil ah faa: Dǝɓ ma joŋ syii tǝ temere a so byaŋ we kpǝ ne? Sara laŋ joŋ syii ɓo jemma doraŋ ɓe, a so byaŋ faɗa ne? 18So faa nyi Masǝŋ: Moo zyii no ɓe, Ismael ye mo yea pa ren yaŋ ɓe. 19Amma Masǝŋ faa: A'a, mawin ɓo Sara ga byaŋ we wor nyi mo ka mo ɗii ko ne Isak. Me ga swaa ɓǝ gbanzah ɓe ne ki, ɓǝ ah laŋ a yea mor wee ɓǝr ah fahfal ah ga lii. 20Mǝ Ismael laŋ, me laa pǝǝ ɓo mor ah ɓe, me ga ẽe ko, a ga bem pǝlli, me ga ɓoo tǝnah ah pǝlli, a ga bem wee jemma tǝtǝl gwa, wee ah ga kaara goŋ daŋ, me ga joŋ ban ah pǝ'manne. 21Amma me ga swaa ɓǝ gbanzah ɓe ne Isak mai Sara mo ga byaŋ ko tǝ'nanki ne cok naiko.
22Fahfal Masǝŋ mo vǝr ɓǝ faa ne Abraham o, so zol kalle. 23So Abraham ɓaŋ wel ah Ismael ne wee mai mo bemra ɓǝr yaŋ ah tǝkine byak makẽne mo lea ra ne lak ah daŋ, za wǝǝ mai mo piicel ah daŋ daakan nyi ra com ah tǝgbana Masǝŋ mo faa nyi ko. 24Ne cok Abraham mo daakan ka joŋ syii ɓo jemma doraŋ tǝtǝl doraŋ. 25Ne cok wel ah Ismael mo daakan laŋ, ka joŋ syii ɓo jemma tǝtǝl sai. 26Daga com ah sǝ Abraham daakan ne wel ah Ismael, 27tǝkine za yaŋ ah ne za ma bemra piicel ah tǝkine mai mo lea ra ne lak daŋ daara kan ne ki.
Currently Selected:
TƏŊMORFANNE 17: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.