TƏŊMORFANNE 18
18
Masǝŋ faa ɓǝ byaŋ Isak nyi Abraham
1Comki Abraham kaa ɓo zah jul mbǝro ah ka com dǝwee lǝǝ suu ɓo, Dǝɓlii ge wol ah kǝsyil kpuu kah yaŋ Mamre. 2Abraham ɓaŋ nahnǝn ah ge sǝŋ ẽe cokki, kwo za sai uura ɓo pel ah pǝɗǝk ne ki nje. Ne cok mo kwo ra o, ur gin zah jul ah ne ɗul ge zyaŋ tǝ ɓǝǝra, so kea ge sǝŋ. 3Faa: Me pǝǝ we zaluuri , wee zyii no ɓe, we pǝ̃ǝ tǝ dǝɓ yeɓ ɓii lal ka. 4We soɓ mo beera bii ge we ne biŋ ka vãh ɓal ne ko, we ge hai mor cee kpuu nyee 'yak ɗao ta. 5Me ga kyeɓ farel nyi we biŋ ka we lwaa swah ne ɗao, ka we pǝ̃ǝ kal ba, mor we pǝ̃ǝ ge ɓo tǝ dǝɓ yeɓ ɓiiri. Faara nyi ko: Mo joŋ tǝgbana mai mo faa ɓo. 6Abraham hǝǝ gaŋ kal ge pǝ jul wo Sara faa: Mo fõo sum manik ah zahtǝfah sai, mo joŋ paŋgasso ne gwari. 7So Abraham ɗuu kal ge wo dǝǝ, ge gbǝ we dǝǝ maŋwoo ah ma suu sãhe, so nyi nyi dǝɓ yeɓ ah ka mo hǝǝko ne joŋ ahe. 8So Abraham ɓaŋ nǝm won tǝkine wonni, ne nǝǝ we dǝǝ mai mo joŋ farel ɓo ne ko ge rǝk pel ɓǝǝra, so uu mor kpuu kah ɓǝǝra, rera farel ahe.
9So fiira Abraham: Mawin ɓo Sara kẽne? Abraham zyii faa: A no pǝ julli. 10Dǝɓ vaŋno kǝsyil ɓǝǝ faa: Tǝ'nanki ne cok nai mee ga pii soo ge wo ɓo, me gin lwaa mawin ɓo Sara ne we jolle. Ka Sara uu ɓo zahfah fahfal Abraham nǝfah kǝɓǝr yaŋ, laa ɓǝ faa ɓǝǝ ɓe. 11Abraham ne Sara gwa daŋ tamra ɓe, joŋra syii ɓo pǝlli o, Sara laŋ sǝ̃ǝ ŋgoŋ mor ah ɓe. 12So Sara syak ɓǝ ah ne pǝ cii ɓǝr faa: Me tam ɓe, wor ɓe laŋ tam ɓe ta, me ga laa pǝ'nyah kpǝ faɗa ne?
13So Dǝɓlii faa nyi Abraham: Mor fẽe Sara syesyak ne faa, azye mai zye tam ɓe zye gak byaŋ we kpǝ ne ne? 14Fan ma kal swah Dǝɓlii no ne? Tǝ'nanki ne cok nai me ga pii soo ge wo ɓo, me gin lwaa Sara ne we jolle. 15So Sara fofoo faa: Me syesyak ɗǝ ya. Faa nai mor a ɗuu galle. Amma Dǝɓlii zyii zah ah faa: Mo syesyak ɓe.
16Za rai urra ka ga o, woora nahnǝn ẽe yaŋ Sodoma. Abraham syee ge ne ra, swǝ fahlii ɓǝǝra. 17Dǝɓlii faa: A pǝsãh ka me muŋ ɓǝ mai me tǝ ga joŋ wo Abraham ne? 18Mor wee ɓǝr ah a ga yea pǝyǝk ne swah wo sǝrri, me ga ẽe za sǝr daŋ mor ahe. 19Mor ame nǝǝ ko ɓo ka mo laiko wee ah tǝkine za yaŋ ah ka fahfal ah mo gbǝra ɓǝ faa Dǝɓlii ne joŋ fan matǝ njaŋ tǝkine ɓǝ sãhe, mor ka Dǝɓlii mo joŋko ɓǝ mai mo faa ɓo nyi ko.
20Dǝɓlii so faa: Me tǝ ɓǝ za Sodoma ne Gomorra ɓe, a pǝɓe' pǝlli, fan joŋ ɓǝǝ daŋ a pǝɓeare. 21Mor mai me ga ɗǝr gin ka ẽere, ɗah ɓǝ ɓǝǝ ɗǝne? Ɓǝ ah mo ɗǝne daŋ, me ga ẽe ba.
22Za matǝ gwa kalra ge fah Sodoma o, Abraham so uu ne Dǝɓlii. 23Abraham tǝɓ ge wol ah faa: Mo ga tai za matǝ njaŋ muŋ ne za faɓe' ne? 24Mo lwaa za matǝ njaŋ mo yaŋ ah jemma dappe ɓe, mo ga muŋ yaŋ ah kpǝ ne? Mo ka soɓ yaŋ ah mor za matǝ njaŋ mo gŋ jemma dappe ya ne? 25Mo joŋ ɓǝ ah nai ka. Ka in dǝɓ matǝ njaŋ ne dǝɓ faɓe' ŋhaa ka dǝɓ matǝ njaŋ mo so yea tǝgbana dǝɓ faɓe' ta, ka pǝsãh ya. Wala pa ŋgoŋ kiita tǝ sǝr daŋ ka ŋgoŋ kiita goŋga ya ne? 26Dǝɓlii zyii faa: Me lwaa za matǝ njaŋ yaŋ Sodoma jemma dappe ɓe, me ga soɓ yaŋ ah daŋ mor ɓǝǝra. 27Abraham zyii faa: Oseni Dǝɓlii, mo rõm me, ame laŋ me ye dǝfuu, me kii kǝnah nǝn pǝkoŋ faa ɓǝ ne mo ya. 28Amma za matǝ njaŋ mo coŋ ɓo lal dappe ka joŋ jemma dappe ba ɓe, mo ga ɓeɓ yaŋ ah mor matǝ dappe mo coŋ ɓii ne? Zyii faa: Me lwaa ra gŋ jemma nai tǝtǝl dappe ɓe, me ka ɓeɓ yaŋ ah ya. 29So Abraham kal ne pǝǝ ko kpǝ faa: Ko maki mo coŋ ɓo gŋ jemma nai ɓe, ɗǝne? Faa: Me soɓ yaŋ ahe. 30So Abraham faa: Mo ɓaŋ kpãh ka Dǝɓlii ɓe, me ga faa ɓǝ ne mo kpǝ. Mo lwaa ra gŋ jemma sai ɓe, ɗǝne? Dǝɓlii faa: Me lwaa ra gŋ jemma sai ɓe, me soɓɓe. 31So faa: Mo rõm me Dǝɓlii, mor me tǝ faa ɓǝ ne mo ba, ko mo gŋ jemma gwa to ɓe, ɗǝne? Zyii faa: Ara mo gŋ jemma gwa ɓe, me ka ga ɓeɓ yaŋ ah ya. 32Abraham so faa: Mo ɓaŋ kpãh ka, Dǝɓlii ɓe, me ga faa ɓǝ nyi mo vaŋno to o, mo lwaa ra gŋ jemma ɓe, ɗǝne? So zyii faa: Ara mo gŋ jemma ɓe, me ka ga ɓeɓ yaŋ ah ya ta.
33Dǝɓlii vǝr ɓǝ faa ah ne Abraham, so kalle. Abraham laŋ pii soo ge zah jul ahe.
Currently Selected:
TƏŊMORFANNE 18: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.