Zan 12
12
Malii ya ‑asʋnbanyɩ Zozii 'la kplia 'kʋ 'kɔsɔ
(Mat 26.6-13; Mak 14.3-9; Luk 7.36-50)
1Daa ‑ɔ ‑toanɩa 'lɛ clɩɩ ‑ngbʋflʋ ɩya ma 'kaa Zifʋnyaa* 'la geyliinwlʋfɛtlɩa* li na, Zozii ya Betanii, 'dua nɩkplaan Lazalɩa -ɔ galɔa 'lɛ 'kwɩɩn na, ‑kʋa 'lɛ na, mʋ. 2Ma yɔɔ 'tlɔnblɩ sapalɩ. Mata zʋa nyɩa. Lazalɩ ‑kʋmʋa maa ‑ɔya Zozii ‑kʋ 'lɛ 'tlɔnblɩa 'kʋ na, sidiin.
3Na, Malii ya 'pɛlʋtɛtʋ ‑asʋnbanyɩ 'titi 'la 'litlikle 'ma, ɔ ya Zozii 'la kplia 'kʋ 'kɔsɔ 'nyɩ ɔ ya ɔla 'nyɩa 'ma ɔ yɔɔ kpli cɩ sɩsɩɛ. 'Nyɩ ‑asʋnbanyɩa 'la 'ŋɔnɔa ya ‑palʋa 'ma.
4Na, Zuda Iskalɩɔtʋ, Zozii 'la gɩlɩnyaa* sidiin 'la bhlo, ɔmɔa ‑ɔ ‑cɩ kaa 'mɔɔ 'lɛ 'pɛlʋ zʋ na, ya 'cla lebhe: 5«'Lɩsaa 'la gbʋ ‑a 'ta 'lɛ ‑asʋnbanyɩ ‑naa 'pɛlʋ zʋ, ɩya ‑a ka liowlu ‑totobhuo 'la lobholinʋdala 'lɩ ɩya -a kaa ŋaazɩnya 'nyɩ bha?» 6‑N 'ta ŋaazɩnya 'la pɔlɛ ɔ ple 'taa 'lɛ, ‑ma ka ɔ nyɩtɛa 'lɛ ɩmɩ ‑naa, ‑ofi lebhe ɔ ‑glɩa 'winyɔ 'nyɩ ɔ ‑glɩa 'lɛ mala 'dalaa 'la saazʋnyɔ na, ɔ faa 'maa nɩkplaan sɔ. 7Na, Zozii ya 'cla lebhe: «'Talɩɔ 'cin 'cɩɩ! 'Na 'nyɛkɛa 'la ‑gluuzʋlɩɛa 'la gbʋʋ ɔ nʋ 'lɛ ɩmɩ ‑naa. 8Ŋaazɩnyaa, a ‑ka maa clɩɩa 'fɩan acɩ cɩ, ‑ma ‑amʋ, a 'taan clɩɩa 'fɩan ‑ka.»
Ma ya Lazalɩ 'la 'bhlawɔlɩ gʋa
9Zifʋnya* ‑bhutukpa ya 'nu lebhe Zozii ‑kʋa Betanii. Ma ya 'yɛpɩ mʋ, ‑n 'ta Zozii bhlo 'la gbʋʋ, ‑ma ma 'kaa Lazalɩ, Zozii galɔa 'lɛ 'kwɩɩn na, ‑masɛɛ 'ciinlɩ. 10Na, ‑teyiyinyaa tocɩa ya Lazalɩ ‑ma ɔla 'bhlawɔlɩ kpo 'kʋ zʋ, 11sa ɔmɔ 'wluku, Zifʋnya ‑gbɔɔn wlʋa maa leen 'nyɩ ma zʋa mala pɔɔtɛtɛa Zozii 'kʋ na.
Zozii ble Zolizalɛmʋ
(Mat 21.1-9; Mak 11.1-10; Luk 19.28-38)
12Daa ‑zeli ze 'lɛ na, ncaabhutukpaa ‑ɔ cia 'lɛ 'fɛtlɩa 'kʋ na, ya 'nu lebhe Zozii cia Zolizalɛmʋ. 13Na, ma ya -gbedi 'dɩ 'nyɩ ma yɔɔ ‑gugwie 'kʋ mʋnʋ. Ma ‑gaa nɩkplaan 'nyɩ ma claa lebhe:
«'Klʋagba ŋeni Laagɔ!
'Nyupalɩɛ ŋeni ɔmɔa ‑ɔ cili 'lɛ ‑Kwlenyɔa 'la 'ŋlɩa nɩkplaan na!
'Nyupalɩɛ ŋeni Izlayɛlɩnyaa* 'la nyɩbhɛlʋa!»
14Zozii ya 'flumuco 'lɩ 'nyɩ ɔ yʋʋ 'kʋ 'tɔ, saa Zieziewɔlɩa* bhli 'lɛ 'kʋ na:
15«Zolizalɛmʋ, Siyɔɔnŋlʋgbɩɔ, ŋanɔ 'la 'bhlɔɔ!
Kopeka, ‑naa nyɩbhɛlʋa ci 'yɛpɩ,
ɔ ‑gbɛ 'flumu 'la 'cilee 'kʋ.»
16‑Bɛɛ, Zozii 'la gɩlɩnyaa* 'taa wɔlɩ ‑naa 'la ‑zɔn 'nu. ‑Ma daa Laagɔ -gbɔɔ 'lɛ 'klʋ na, ma ya luoli lebhe ɔla gbʋ ɩmɩ ‑naa ‑zieoa 'lɛ 'nyɩ ɩmɩ 'titi ma nʋ 'lɛ 'nyɩ ma yɔɔ 'lɛ 'nyɩ.
17Maa 'fɩan ‑ɔya Zozii ‑kʋa 'lɛ 'dɛ, daa ɔ laa 'lɛ Lazalɩ le ɔ 'wlʋ lesua nɩkplaan 'nyɩ ɔ galɔɔ 'lɛ 'kwɩɩn na, ma lia ‑danʋfʋɛ. 18Ɩla gbʋ na, dɛ ‑alawleea cilia 'mɔɔ 'lɛ ‑gugwie 'kʋ, sa ma yaa 'nu lebhe ɔ yaa 'ciinzizielɩlobholi ‑naa nʋ na. 19Na, Falizɩɛnnyaa* bhlobhlo solusolulua lebhe: «A lɩ lebhe a cɩ 'tɔɔ mino. 'Lɩka, ka ncɛlɩa 'fɩan gɩlɩɔ 'lɛ.»
Zozii nyɩtɛ ɔla gɩlɩlɩɛ 'la wɔlɩ
20Lowie ‑zlʋsaasa, ‑ɔ ‑glɩa 'lɛ Glɛkɩnya na ya Zolizalɛmʋ 'fɛtlɩa 'kʋ mʋmʋ le ma 'kaa Laagɔ gʋgwla. 21Ma ya Filipʋ, ‑ɔ 'wlʋlʋ 'lɛ Galileebhlɩa 'la 'dua ma la 'lɛ Bɛsayida 'kʋ na, ŋeni 'nyɩ ma yɔɔ 'cla lebhe: «‑A to, ‑a ‑waa lebhe ‑a ka Zozii 'ciinlɩ.» 22Filipʋ yaa mʋ, ɔ ya sɛɛ Andlee solu 'nyɩ maa ‑mɔsɔa ya mʋ, 'nyɩ ma ya sɛɛ Zozii solu. 23Zozii ya maa 'cla lebhe: «Nclɔɔa 'Cʋa* 'la 'klʋagbaa 'la 'ŋwacɩa ya ŋeni. 24N solu anyɩ, ɩ ‑glɩ ‑nʋawlɛ: Gbazɩ ma 'ta ka 'bleecie ‑gluu zʋ ɩya ɛ ka zɛ na, 'cie bhlo ɛ ‑glɩ 'lɛ. ‑Ma ɛ ka zɛ na, dɛ ɛ tlʋ 'lɛ 'caa ‑bhutukpa. 25Ɔmɔa ‑ɔ ‑wa 'lɛ ɔla jabhʋa na, ɔla jabhʋa cɩ mlɔ, ‑ma ɔmɔa, ‑laagɔzɔn, ‑ɔ cɩ ka 'lɛ ɔla jabhʋa ‑blɔ na, ɔ cɩ 'kʋ kalɩ ‑aan jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na nɩkplaan. 26Nclɔɔ ‑ɔ ‑ka ‑wa lebhe ɔ 'kaan lobho na, 'naa ɔ gɩlɩɩn, ɩya daa n ‑kʋ 'lɛ na, 'na lobhocoa 'ka dɩpɩa kʋmʋ. Nclɔɔ ‑ɔ ‑kaan lobho na, n To cɩ 'kɔɔ 'klʋgba.
Zozii nyɩtɛ ɔla 'kwɩa 'la wɔlɩ
27‑Pɔtɔnʋ, 'na pɔlɛa 'tanɩ 'cɩɩ ‑kʋ. 'Nyɩ wɔɔsaa n cɩ 'kanɩ 'lɛ nyɩtɛ bha? N 'ka 'cla lebhe: To gba ɩya 'kwlɩbhɩɛ ‑naa 'la ŋenia bha? ‑Ma 'kwlɩbhɩɛ ‑naa 'titi 'la gbʋ n ci 'lɛ ‑dʋdʋa 'kʋ. 28To, 'maa ‑gba ‑naa 'ŋlɩa 'klʋ.» Daa Zozii nyɩtɛ 'lɛ ‑sa na, ‑blɩɩzɔn bhlo ya ‑laagɔɔn 'wlʋlʋ 'nyɩ ʋ claa lebhe: «N yɩɩ tooto 'klʋgba, 'nyɩ n cɩ 'ka ‑awlɩɩ 'klʋgba.» 29‑Alawleea ‑a ‑kʋa 'lɛ dɩpɩa, 'nyɩ ‑a 'nua 'lɛ ‑blɩɩzɔn ‑naa na, ala nɩkplaan ncɛlɩa ‑anʋa claa lebhe gude gbɛtɛ 'lɛ 'nyɩ ‑da -naanʋaa claa 'lɛ lebhe 'bhlaandlee* bhlo soluo 'lɛ. 30Na, Zozii ya ‑awlɛ maa 'cla lebhe: «‑N 'ta 'na gbʋ ‑blɩɩzɔn ‑naa 'ta 'lɛ nyɩtɛ, ‑ma ala gbʋ. 31‑Pɔtɔnʋ Laagɔ kanɩ 'lɛ ‑laagɔzɔn ‑naa 'tɩtɩpla ɩya ɔ 'ka ‑laagɔzɔan 'la ‑kwletoa 'tli. 32‑Ma ‑amʋ, daa ma cɩ 'ka 'lɛ 'kʋbho na, n cɩ 'ka gba ɩya ncɛlɩa 'fɩan 'kaan cili.» 33Wɔɔnyɩtʋ ‑naa nɩkplaan, ka Zozii palaa 'lɛ 'kwɩa ɔ cɩ 'ka 'lɛ 'ku na. 34Na, ‑alawleea yɔɔ 'cla lebhe: «‑A ya ‑ala ‑jlɩmaa 'la ‑afluwia nɩkplaan 'nunu lebhe, Laagɔ 'la ‑Sasanyɔa* cɩ 'ka kʋ 'lʋkʋlʋkʋ. Na, 'lɩsaa 'la gbʋ ‑n claa 'lɛ lebhe ma cɩ 'ka Nclɔɔa 'Cʋa* 'kʋbho bha? Ncaasaa ‑ɔ ‑glɩa 'lɛ 'dɛ 'la Nclɔɔa 'Cʋa bha?» 35Zozii ya maa neenŋonu lebhe: «Zezezelia ‑kʋ ka anyɩ cɩ clɩɩ ‑klipɛ 'titi nɩkplaan. Na, daa a ‑ka ka 'lɛ zezezelia na, a namʋ ɩya 'tutua 'la ka sɛ anyɩ ‑zɔnvu, sa ɔmɔa ‑ɔ namʋnʋ 'lɛ 'tutuun na, ɔ 'ta daa ɔ mʋ 'lɛ na ‑ci. 36Na, daa a ‑ka ka 'lɛ zezezelia na, a la zezezelia ‑nʋawlɛ ɩya a 'ka zezezeli 'la 'cuo 'plɩ.» Zozii bhɩalɩ 'lɛ ɩmɩ ‑naa nyɩtɛlɩɛ na, ɔ ya maa cɩɩnwlʋlʋ 'nyɩ ɔ ya daa ɔ ‑ka 'lɛ ‑kʋ 'nyɩ 'ma cɩ 'tɔɔ 'lɛ 'lɩ na mʋ.
Zifʋnyaa 'ta Zozii 'la pɔɔtɛtɛ ‑ka
37Zozii ya 'ciinzizielɩlobholi ‑bhutukpa maa 'ci 'kʋ nʋnʋ, ‑ma ma 'taa ɔla pɔɔtɛtɛ ‑ka, 38ɩya wɔlɩa Laagɔnekʋnyɩtɛnyɔ* Izayii 'bhlia 'lɛ 'kʋ na, ɩ 'kaa 'kʋglalɩ, daa ɔ claa 'lɛ lebhe:
«‑Kwlenyɔ, ncaasaa ‑ɔ ya 'lɛ ‑ala niwɔlɩa ‑nʋawlɛ la bha?
Ncaasaa ‑Kwlenyɔ pala 'lɛ ɔla 'tɛtɩa bha?»
39Izayii ya ‑awlɛ wɔlɩa 'la gbʋa 'ma cɩ 'ta 'lɛ pɔɔtɛtɛ 'lɩlɩɛ mino na 'kʋbhli 'nyɩ ɔ ya 'cla lebhe:
40«Laagɔ ya maa 'tutu 'ciin zʋ
'nyɩ ɔ ya mala pɔlɩa titlili
le ma 'la ka mala 'cia nɩkplaan salɩlɩ,
ma 'la ka wɔlɩ pɔlɛcɩfalɩ,
ma 'la ka kwlacala,
ɩya ma 'la kaan 'bɩɩncili ɩya n 'na ka sɛ maa jabha.»
41Ka Izayii nyɩtɛa 'lɛ wɔlɩ ‑naa, sa ɔ yaa Zozii 'la 'klʋagbaa 'ciinlɩ 'nyɩ ɔ yaa ɔla wɔlɩ nyɩtɛ.
42'Bhlɩmɔɔn Zifʋnyaa* tocɩa nɩkplaan, ‑bhutukpa ya mala pɔɔtɛtɛa Zozii 'kʋ zʋ, ‑ma Falizɩɛnnyaa* 'la gbʋ na, 'ma nyɩtɛlɩ 'taa 'mɩɩ ncaacikʋ, ma 'la ka sɛa maa bhibhiepalʋa* ‑zɔn 'tli. 43Sa ma ‑waa ncɛlɩ 'la 'ŋwleenfalɩlɩɛa 'nyɩ ma zia Laagɔ 'nɩa 'kʋ na.
Zozii ‑glɩ 'lɛ zezezelia
44Zozii ya nɩkplaan ‑gaa 'nyɩ ɔ ya 'cla lebhe: «Ɔmɔa ‑ɔ ‑ka 'lɛ 'na pɔɔtɛtɛ na, ‑n 'ta ‑amʋ 'na pɔɔtɛtɛ ‑ɔ 'ta 'lɛ ‑ka, ‑ma ɔmɔa ‑ɔ lobhuun 'lɛ na. 45'Nyɩ ɔmɔa ‑ɔ ‑jlɛɛn 'lɛ na, ɔmɔa ‑ɔ lobhuun 'lɛ na, ɔ ‑jlɛ 'lɛ. 46‑Amʋ, n ya ‑laagɔzɔan ci le n 'ka ɩla zezezeli 'plɩ ɩya ncaatʋtʋʋntʋa ‑ɔ zʋʋn 'lɛ ɔla pɔɔtɛtɛa 'kʋ na, ɔ 'la kanɩ 'tutuun kʋ. 47Gbazɩ nclɔɔ ‑ka 'na niwɔlɩa 'nu 'nyɩ ɔ 'tɩɩ 'kʋplɩlɩ na, ‑n 'ta ‑amʋ ‑ɔ cɩ 'tɔɔ 'lɛ gbaylɩsa. Sa n 'ta ci le n 'ka ‑laagɔzɔan 'tɩtɩpla, ‑ma ka n ci 'lɛ le n 'kɩɩ gbʋʋnsa. 48Na, ɔmɔa ‑ɔ paan 'lɛ 'kwlaan 'nyɩ ‑ɔ 'ma 'ta 'lɛ 'na niwɔlɩa na, ɔ ‑ka ɔla 'tɩtɩplanyɔ: Wɔɔnyɩtʋa ‑ʋ 'wlʋlʋʋn 'lɛ neen na, ʋmʋ ‑ʋ ‑cɩ kɔɔ 'lɛ bhɩalɩclɩɩa 'kʋ 'tɩtɩpla. 49‑Amʋ, n 'ta 'na 'wluun 'manɩ ɩya n 'ka nyɩtɛ, ‑ma Toa ‑ɔ lobhuun 'lɛ na, ɔmɔ 'titi ‑ɔ palaan 'lɛ ɩmɩa n cɩ 'ka 'lɛ nyɩtɛ ɩya saa n cɩ 'kɩɩ 'lɛ nyɩtɛnyɩtɛlɩ na. 50'Nyɩ n ‑ci sɛɛ lebhe ɔ nyɩtɛ 'lɛ na, ɩ nyɩ jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. Na, ɩmɩa n nyɩtɛ 'lɛ na, saa Toa soluun 'lɛ na, sɛɛ n nyɩtɩɩ 'lɛ.»
Currently Selected:
Zan 12: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.