Zan 11
11
Lazalɩ ya 'ku
1Nclɔɔ bhlo ‑kʋa Betaniidua 'kʋ, ma laa 'mɔɔ Lazalɩ. Ɔ 'taa ‑ja. Mɛɛncɩ ‑mɔsɔ ‑kʋa du ‑naa bhlogbɩɩ 'kʋ, ma laa maa Malii ɩya Mata. 2Malii ‑naa, ɔ ‑glɩa 'ŋlɔa ‑ɔ 'kɔsɔwa 'lɛ ‑asʋnbanyɩa ‑Kwlenyɔa 'wlu 'nyɩ ‑ɔ 'mawa 'lɛ ɔla 'nyɩa 'nyɩ ɔ sɩsɩɛɔ 'lɛ kpli cɩ na. Ɔ bholi Lazalɩ 'taa 'lɛ ‑ja. 3Na, mɛɛncɩa ‑mɔsɔa ya nclɔɔ lobhu le ɔ 'cla Zozii lebhe: «‑Kwlenyɔ, ‑n 'nagɔa ‑n ‑wa 'lɛ na, ɔ 'ta ‑ja.»
4Daa Zozii 'nu 'lɛ sɛɛ na, ɔ ya 'cla lebhe: «Guu -naa 'ta 'kwɩ 'la gu ‑glɩ, ‑ma ka Laagɔ 'kʋʋ 'lɛ 'kʋ 'plɩlɩ ɩya ɔ ‑ka 'lɛ ɔla 'klʋagba pala ɩya Laagɔ 'la 'Cʋa 'la 'klʋagbaa 'ka ‑zɔnwlʋ.» 5Zozii ‑waa Mata ɩya ɔ mɛnɔ ɩya ma bholi Lazalɩ. 6Ɔ ya 'nu lebhe Lazalɩ 'taa ‑ja, 'bhlɩmɔɔn, ɔ ya ‑awlɛ daa ɔ ‑kʋa 'lɛ na clɩɩ ‑mɔsɔ li. 7'Nyɩ ɩla leean, ɔ ya ɔla gɩlɩnyaa* 'cla lebhe: «A cɔlɔ Zudee.» 8Gɩlɩnyaa yɔɔ 'cla lebhe: «Canyɔ, Zifʋnyaa* ‑kaa 'lɛ 'matɩ lebhe ma 'kɔɔ 'bhla na, ɩla clɩɩ 'ta 'kaan bɔ ‑ylɛylɛ 'nyɩ ‑n 'matɩ lebhe ‑n ka 'yɛpɩ cɔlɔ bha?» 9‑Ma Zozii ya maa 'cla lebhe: «'Ŋwacɩwli 'kʋgba ‑mɔsɔ 'ta 'lɛ Zezezeli nɩkplaan ‑kʋ bha? Nclɔɔ ‑ka ‑gagazeliin namʋ na, ɔ gozo 'ta, sa ɔ ‑jlɛ ‑laagɔzɔn ‑naa 'la zezezelia na. 10‑Ma 'tutu ‑ka ‑pla 'nyɩ nclɔɔ ‑ka namʋ na, ka ɔ gozo 'lɛ, sa zezezeli 'tɔɔ nɩkplaan 'kʋ na.» 11Daa Zozii 'bhli 'lɛ wɔlɩ ‑naa 'kʋ na, ɔ ya ‑awlɛ 'cla lebhe: «‑A 'nagɔ Lazalɩ ya ŋɔmʋ, ‑ma n cɩ 'ka mʋ ɩya n 'kɔɔ galɔ.» 12Gɩlɩnyaa yɔɔ 'cla lebhe: «‑Kwlenyɔ, ɩ ‑ka ‑kʋ lebhe ka ɔ ŋɔmʋ 'lɛ na, ɔ cɩ 'ka jabha.» 13Lazalɩ 'la 'kwɩa 'la wɔlɩ Zozii ‑waa 'lɛ lebhe ɔ 'kaa nyɩtɛ, ‑ma maa, ma gugua lebhe claa 'titi 'la wɔlɩ ɔ nyɩtɛa 'lɛ. 14Na, Zozii ya maa solu 'kpataa lebhe: «Lazalɩ ya 'ku, 15'nyɩ ɩ nʋʋn ‑pɔpʋɛ anyɩ 'wluku, saa n 'ta 'lɛ 'yɛpɩ ‑kʋ 'nyɩ ɔ ya 'lɛ 'ku na, ɩya a 'ka pɔɔtɛtɛ 'lɩ. ‑A mʋɔ cɩ!» 16Na Tomaa, ma la 'lɛ daplɩcoa na, ya ‑daa gɩlɩnya 'cla lebhe: «‑Anyɩ ‑masɛɛ ‑a mʋ ɩya ‑aya ‑ala canyɔa 'ka nebhlo 'kulu.»
Zozii ‑glɩ 'lɛ 'kwɩɩnkʋbhuɛ ɩya jabhʋa
17Daa Zozii ŋeni 'lɛ na, ɔ ya 'nu lebhe ma ya Lazalɩ 'la 'kuoa lesuun zʋ, ɩ nʋanɩa clɩɩ ‑nmɔɔna. 18Sa Zolizalɛmʋ ɩya Betanii 'ta 'lɛ tlʋ 'nyɩ ɩ nʋ 'lɛ ‑kiloo ‑mɔta na, 19Zifʋnya ‑bhutukpa ya Mata ɩya Malii 'bhlɩ ci le ma 'ka maa pɔlɛɛn zʋ, ma bholia 'la 'kwɩa 'la gbʋ. 20Daa Mata 'nu 'lɛ lebhe Zozii cia 'yɛpɩ na, ɔ yɔɔ ‑gugwie 'kʋ mʋnʋ, ‑ma Malii ‑kʋa 'sleen sa. 21Mata ya Zozii 'cla lebhe: «‑Kwlenyɔ, ɩ ‑ka ‑kʋ lebhe ‑n ‑kaa ‑da ‑kʋ na, n bholi cɩ 'taa 'ku. 22‑Ma ‑pɔtɔnʋ 'titio, n ‑ci sɛɛ lebhe ‑tɛtɛa 'fɩan n cɩ 'ka 'lɛ Laagɔ 'clalɩ na, ɔ cɩɔ mɩ 'nyɩ.» 23Zozii yɔɔ 'cla lebhe: «‑N bholi cɩ 'ka 'kwɩɩnkʋbho.» 24‑Ma Mata yɔɔ 'cla lebhe: «N ‑ci sɛɛ lebhe leenbhɩalɩ clɩɩa 'kʋ ɔ cɩ 'ka 'kwɩɩnkʋbho.» 25Na, Zozii yɔɔ 'cla lebhe: «‑Amʋ ‑glɩ 'lɛ 'kwɩɩnkʋbhue ɩya jabhʋa. Ɔmɔa ‑ɔ ‑ka 'lɛ 'na pɔɔtɛtɛ na, ka ɔ 'ka 'ku 'titio na, ɔ cɩ 'ka jabha. 26'Nyɩ ncaatʋtʋʋntʋa ‑ɔ ‑ja 'lɛ 'nyɩ ‑ɔ ‑ka 'lɛ 'na pɔɔtɛtɛ na, ɔ cɩ 'tanɩ 'ku. ‑N -ka ɩmɩ ‑naa 'la pɔɔtɛtɛ bha?» 27Ɔ yɔɔ neenŋonu lebhe: «‑Ghɛɛ ‑Kwlenyɔ, n li ‑danʋfʋɛ lebhe ‑mɔ ‑glɩ 'lɛ Laagɔ 'la ‑Sasanyɔa*, Laagɔ 'la 'Cʋa, ɔmɔa ‑ɔ ‑cɩ kaa 'lɛ ‑laagɔzɔan ci na.»
Zozii ya Lazalɩ 'kwɩɩnkʋbho
28Mata 'bhli 'lɛ ɩmɩ ‑naa 'kʋ na, ɔ ya 'plɩ ɔ ya mʋ, ɔ ya ɔ mɛnɔ Malii la 'nyɩ ɔ yɔɔ ‑wɛsɛwɛsɛ solu lebhe: «Canyɔa ‑kʋ ‑da, ɔ 'clɔɔ bɩkʋ.» 29Daa Malii 'nu 'lɛ wɔlɩ ‑naa ‑jaa na, ɔ ya 'kʋbho 'fan, ɔ ya Zozii 'bɩɩnmʋnʋ. 30Sa Zozii 'ta ka kaa 'dua nɩkplaan ble, ‑ma ɔ ‑kʋ kaa daa Mata ŋenia 'mɔɔ 'lɛ na. 31Daa Zifʋnyaa* ‑ɔ ya Malii ‑kʋa 'lɛ ‑palʋa ‑zɔn le maa 'kaa 'mɔɔ pɔlɛɛn zʋ na, 'lɩɔ 'lɛ 'nyɩ ɔ bho 'lɛ 'kʋ 'fan na, ma yɔɔ gɩlɩ. Ma gugua lebhe, ka ɔ mʋa 'lɛ lesua 'kʋ ɩya ɔ 'kaa 'tu.
32Daa Malii ŋeni 'lɛ daa Zozii ‑kʋa 'lɛ 'nyɩ ɔ 'lɩɔ 'lɛ na, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «‑Kwlenyɔ, ɩ ‑kaa ‑kʋ lebhe ‑n ‑kaa ‑da ‑kʋa na, n bholi cɩ 'taa 'ku.» 33Daa Zozii 'lɩ 'lɛ lebhe ɔ tua 'nyɩ maa ‑ɔ gɩlɩa 'mɔɔ 'lɛ na ‑ma 'tumʋa na, ɩ yɔɔ ‑gbɔɔn 'dɩdɔ. 34Ɔ ya maa neencla lebhe: «'Ndagbazɩ a zʋlʋ 'lɛ ɔla ‑blaanyɛkɛa bha?» Ma yɔɔ neenŋonu lebhe: «‑Kwlenyɔ, ci ɩya ‑n 'ka 'lɩ.» 35'Nyɩ Zozii ya 'tu. 36Na, Zifʋnyaa claa lebhe: «A kopeka saa ɔ ‑waa 'mɔɔ 'lɛ na!» 37‑Ma maa nɩkplaan bhloonbhloon 'cla lebhe: «Ɔmɔa ‑ɔ ya 'lɛ 'citutunyɔa 'la 'cia 'gbokalɩ na, ɔ cɩ 'taa mino ɔ 'ka gba ɩya Lazalɩ 'la 'kaa 'ku bha?»
38Wɔlɩ ‑naa ya ‑awlɛ Zozii ‑gbɔɔn 'dɩdɔ 'nyɩ ɔ ya lesua 'kʋ mʋ. Ʋ ‑glɩa ‑cokwiea ma kɔtɔ 'lɛ nɩkplaan, 'nyɩ cokwie kpaslɩlɩɔa 'lɛ ʋla nea na. 39Na, Zozii ya 'cla lebhe: «A ‑sa 'dɛ ‑cokwiea.» Mata, 'kuoa mɛnɔa yɔɔ 'cla lebhe: «‑Kwlenyɔ, ‑a ‑kaa 'mɔɔ 'lɛ zizie na, ɩ nʋnɩ clɩɩ ‑nmɔɔna. Na, ɔ sanɩ ŋlɛ.» 40‑Ma Zozii yɔɔ 'cla lebhe: «N 'tɔɔ 'cla lebhe, ‑n 'ka pɔɔtɛtɛ ‑ka na, ‑n ‑cɩ ka Laagɔ 'la 'klʋagbaa 'ciinlɩ bha?» 41Ma ya 'dɛ cokwiea ‑sa. Na, Zozii ya 'wlu 'kʋbhli, ɔ ya ‑laagɔɔn kope 'nyɩ ɔ ya 'cla lebhe: «To, n bhɔlʋɔ saa ‑n yaan 'lɛ neen 'nu na. 42N ‑ci sɛɛ lebhe ‑n nuun ‑azla neen, ‑ma ncɛlɩa ‑ɔ ‑didio 'lɛ na, ma 'la gbʋ n bhli 'lɛ sɛɛ 'ku ɩya ma 'ka ‑nʋawlɛ la lebhe ‑mɔɔ lobhuun 'lɛ.» 43Ɔ bhli 'lɛ ‑sa 'kʋ na, ɔ yaan ‑gaa 'nyɩ ɔ ya 'cla lebhe: «Lazalɩ, 'wlʋ ‑zɔn.» 44'Nyɩ 'kukukuoa ya ‑zɔnwlʋ, ala sɩa ɩya ala bhɩa gʋalɩɔa lokupɛlɩ cɩ 'nyɩ ala 'klʋa ‑wɔlɩa 'lɛ lokwipɛlʋ 'kʋ. Zozii ya ncɛlɩa 'cla lebhe: «A ‑bluluo ɩya a 'talɩɔ 'cin, ɔ 'ka mʋ!»
Ma ya Zozii 'la 'bhlawɔlɩ gʋa
45Zifʋnyaa* ‑ɔ cia 'lɛ Malii cɩ 'nyɩ ‑ɔ 'lɩa 'lɛ ɩmɩa Zozii nʋa 'lɛ na, maa sidiin ‑bhutukpa yɔɔ mala pɔɔtɛtɛ 'kʋ zʋ. 46‑Ma maa nɩkplaan bhloonbhloon ya mʋ, ma ya Falizɩɛnnyaa* ŋeni 'nyɩ ma ya ɩmɩa Zozii nʋa 'lɛ na, 'dɩkʋsalɩ. 47Na, ‑teyiyinyaa tocɩa ɩya Falizɩɛnnyaa ya 'tɩtɩplakandikadiea 'wluwlalɩ 'nyɩ ma 'claclalɩa neen lebhe: «Nclɔɔ ‑naa nʋ 'lɛ ‑sa 'ciinzizielɩlobholi ‑bhutukpa na, 'lɩsaa ‑a cɩ 'ka 'lɛ nʋ bha? 48Ɩ ‑ka ‑kʋ lebhe ‑a ‑kɔɔ ne te na, ncɛlɩa 'fɩan cɩ 'kɔɔ mala pɔɔtɛtɛa 'kʋ zʋ ɩya Wlɔmʋnyaa 'ka ci ɩya ma 'ka ‑ala Laagɔpaakadiea* ɩya ‑ala 'bhlɩa nyumo.»
49Mala sidiin 'la nclɔɔ bhlo, ma laa 'lɛ Kayifʋ 'nyɩ ɔ ‑glɩa 'lɛ 'dɛ 'la lioa nɩkplaan ‑teyiyinyɔ kpasaa na, ya maa 'cla lebhe: «A 'nu 'ta wɔlɩa ‑ɩ 'plɩ 'lɛ na. 50A gugu 'ta ‑ylɛylɛ lebhe ɩ 'nanɩ ala da lebhe nclɔɔ bhlogbɩɩ 'ku ncɛlɩa 'fɩan 'la 'jeen ɩya 'bhlɩa ‑tɛtɛa 'la ka nyumo bha?» 51'Bhlɩmɔɔn ‑n 'ta ɔla 'wluun ɔ 'ta 'lɛ ɩmɩ ‑naa nyɩtɛlɩ, ‑masa ɔ ‑glɩa 'lɛ ‑teyiyinyɔ ‑kpasa 'dɛ 'la lioa nɩkplaan na, ka ɔ nyɩtɛa 'lɛ Laagɔ nekʋ lebhe ɩ ‑fata lebhe Zozii 'kua ɔ 'bhlɩnyaa 'la gbʋ. 52'Nyɩ ‑n 'ta maa bhlobhlo 'la gbʋʋ, ‑ma ɔ 'ka Laagɔ 'la 'cuoa 'fɩan ‑ɔ ‑dloluo 'lɛ ‑laagɔzɔan na, 'wluwlalɩ ɩya ma 'ka bhlo 'plɩ. 53Na, clɩɩ ‑naa 'kʋ ma zʋ 'lɛ ɔla 'bhlawɔlɩa kpo 'kʋ. 54Ɩla gbʋ na, Zozii mʋtaanɩa Zifʋnyaa sidiin. Ɔ ya 'dɛ 'wlʋ 'nyɩ ɔ ya 'bhlɩa ‑ɩ ‑mɛɛ 'lɛ 'pʋpʋa cɩ na 'la 'dua ma la 'lɛ Eflayimʋ na 'kʋ mʋ, 'nyɩ ɔ ya ɔla gɩlɩnyaa* ‑kʋanɩa 'yɛpɩ.
55Zifʋnyaa 'la geyliinwlʋfɛtlɩa* yaanɩa cɩmɛ. 'Nyɩ ncaabhutukpa ‑gblaa Zolizalɛmʋ le ma 'kaa macɩ ‑kplɔ 'fɩɔn ɩya 'fɛtlɩa 'kaa ŋeni. 56Ma 'matɩa Zozii 'nyɩ daa ma ‑kʋa 'lɛ Laagɔpaakadiea ‑zɔn na, ma 'claclalɩa neen lebhe: «Ɔ cɩ 'fɛtlɩa 'kʋ ci bha? ‑Ma ɔ cɩ 'ta ci bha? 'Nsasa a 'lɩlɩlɩɩ 'lɛ bha?» 57‑Teyiyinyaa kpasɩa ɩya Falizɩɛnnyaa yaa 'cla lebhe ncaatʋtʋʋntʋa ‑ɔ cɩ 'lɛ daa ɔ ‑kʋ 'lɛ na cibhlili na, ɩ ‑fata lebhe ɔ solu maa ɩya ma 'kɔɔ 'kʋ 'kubhli.
Currently Selected:
Zan 11: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.