Lobh 6
6
Ma ya ncɛlɩ ‑ngbɔɔsɔ ‑sa
1'Dɛ 'la clɩɩa nɩkplaan, gɩlɩnyaa* 'la nea zʋlʋa 'kʋ. Zifʋnyaa* ‑ɔ nyɩtɛ ‑awlɛ 'lɛ Glɛkɩwɔlɩ na, ma 'manɩa ma 'yea ‑ɔ nyɩtɛa 'lɛ Ebleewɔlɩa bhlobhlo na dɔgbɛ 'kʋ, ‑ofi lebhe ma ‑ka lilinyɩa polida ‑kʋ na, maa falɩ 'taa mala 'kuzluŋwlɛa 'la wɔlɩa pɔlɛ cɩ. 2Na, lobhulobhunyaa* 'kʋgbaa ‑mɔsɔa ya gɩlɩnyaa 'fɩan la, ma ya 'wluwlalɩ 'nyɩ ma ya maa 'cla lebhe: «Ɩ 'ta ‑fata lebhe ‑a te Laagɔ 'la wɔɔnyɩtʋa ɩya ‑a nʋ nyapoli ‑lobholi. 3Bholiecɩnyɩ, a kope acɩ sidiin ɩya a ‑sa ncaaŋodie ‑ngbɔɔsɔ, ncɛlɩa 'fɩan nyɩtɛ 'lɛ mala wɔɔnanɩ, ‑Kplɔkplɔ ‑Wugoa* ‑yelio 'lɛ 'nyɩ ‑ɔ ‑ci 'lɛ dɩgalɩ na, ɩya ‑a ka maa lobholi ‑naa wlɩɩn zʋ, 4ɩya -anyɩ, ‑a ka bhibhielia ɩya Wɔɔnyɩtʋa 'la lobholia 'kʋgɩ.» 5Maa ‑tɛtɛa ‑ɔ 'wlalɩa 'lɛ 'wlu na ya wɔlɩ ‑naa 'ma, 'nyɩ ma ya Etɩɛnɩ ‑sa. Ɔ ‑glɩ nclɔɔa pɔɔtɛtɛ ɩya ‑Kplɔkplɔ ‑Wugoa ‑yelio 'lɛ na, ɔya Filipʋ, Plokɔlʋ, Nikanɔɔ, Timɔɔn, Pamenasɩ ɩya Nikolaa, Antɩɔsʋnyɔa ‑ɔya Zifʋnyaa gʋgwlalɩ 'lɛ nebhlo na. 6Ma ya maa lobhulobhunyaa pala, ma ya maa sɩ 'wlu ‑gbɛ, 'nyɩ ma ya mala da bhibhie.
7Laagɔ 'la wɔɔnyɩtʋa dlolua daa ‑tɛtɛa 'nyɩ Zolizalɛmʋdua nɩkplaan, gɩlɩnyaa 'la nea zʋlʋa 'kʋ. ‑Teyiyinya ‑bhutukpa ‑kanɩa Zozii 'la pɔɔtɛtɛ.
Ma ya Etɩɛnɩ 'kʋbhli
8Laagɔ 'la 'nyupalɩɛa ɩya ɔla 'tɛtɩa ‑kʋa Etɩɛnɩ 'kʋ 'nyɩ ɔ nʋa nikpooslaslawɔlɩ 'nyɩ ɔ gba ma lɩa ghledɩ 'kadɩ 'bhlɩnyaa sidiin. 9Na, Zifʋnyaa* 'la bhibhiepalʋa* ma la 'lɛ ncɩkalɩnyaa 'la bhibhiepalʋa na, 'la nɩkplaan 'la ncɛlɩ maya Silɛnɩ ɩya Alɛzandliidia ɩya Silisii ɩya Aziibhlɩa 'kʋ 'la ncɛlɩ ‑ya Etɩɛnɩ ya wɔlɩ 'tɩtɔlɩɛ bhɔ. 10‑Ma maa mino 'taa 'mɔɔ 'lɛ ‑sɩalɩɛ, dɩgalɩa ɩya 'Wugoa nɩkplaan ɔ nyɩtɛlɩa 'lɛ na ɩla gbʋ na, 11ma ya ncɛlɩ dluplʋ le ma 'cla lebhe: «A yɔɔ neen 'nu, ɔ ya Moyizi ɩya Laagɔ vla.» 12Na, ma ya gba 'bhlɩnyaa ya 'kʋbho 'nyɩ ncaakpasɩa ɩya ‑jlɩmaazienyaa* ya Etɩɛnɩ ‑zɔn 'vu, ma yɔɔ 'kʋbhli 'nyɩ ma yɔɔ 'tɩtɩplakandea ‑deliin fa. 13Ma ya ‑kplakpla ‑danʋfʋɛlinyaa ‑lamʋ, 'nyɩ ma ya 'cla lebhe: «Nclɔɔ ‑naa a ‑jlɛ 'lɛ ‑da na, clɩɩa 'fɩan ɔ nyɩtɛ ‑kplɔkplɔdaa ɩya Moyizi 'la ‑jlɩmaa 'la wɔɔnyinyi. 14‑A yɔɔ neen 'nu ɔ ya 'cla lebhe 'dɛ 'la Nazalɛtɩnyɔ Zoziia, ɔ cɩa ‑kplɔkplɔda ‑naa gbɔlʋ 'nyɩ ɔ cɩa ‑jlɩmaa Moyizi 'nyɩ 'lɛ ‑anyɩ na kaci.» 15Na, maa 'fɩan ‑ɔ ‑kʋa 'lɛ 'tɩtɩplakandea nɩkplaan na, kopea 'mɔɔ 'ciin, ma ‑jlɛa ɔla 'klʋa, 'nyɩ ʋ ya 'plɩ le 'bhlaandlee* 'la 'klʋ 'bhisa.
Currently Selected:
Lobh 6: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.