Lobh 5
5
Ananɩasɩ ɩya Safila ya yodi zʋ
1Nclɔɔ bhlo ‑kʋa, ma laa 'mɔɔ Ananɩasɩ. Ɔya ɔ nʋŋlɔ Safila ya bhlo 'plɩ 'nyɩ ma ya mala ‑dʋdʋ 'pɛlʋ zʋ. 2'Nyɩ ɔya ɔ nʋŋlɔ ya neennununu 'nyɩ ɔ ya ‑dʋdʋa 'la 'dalaa nɩkplaan 'dɩ, ɔ ya 'kle 'kʋ kʋlʋ 'nyɩ ɔ ya ‑daa 'klea lobhulobhunyaa* ‑deliin ‑la. 3Na, Pɩɛlɩ yɔɔ 'cla lebhe: «Ananɩasɩ, 'lɩsaa 'la gbʋ Sataan* ya 'lɛ ‑sa ‑naa pɔlɛa yeli bha? ‑N ya ‑Kplɔkplɔ ‑Wugoa* yodi zʋ, ‑n ya ‑dʋdʋa 'la 'pɛlʋzʋdalaa nɩkplaan 'dɩ 'nyɩ ‑n ya 'lɛ 'kle 'kʋ kʋlʋ. 4Ʋ ‑glɩa 'lɛ ‑mɔ 'titi ‑naa ‑dʋdʋ na, ‑n cɩ 'taa mino ‑n 'kaa 'mʋʋ kalɩ, ɩya ‑n 'la kaa 'mʋʋ 'pɛlʋ zʋ bha? ‑Aana ‑n ‑kaa 'mʋʋ 'pɛlʋ zʋ na, ‑n cɩ 'taa mino ɩya ‑n kaa ʋla 'dalaa 'saa ‑n ‑wa 'lɛ na nʋ bha? 'Nsasa ‑n nʋnʋnʋ 'lɛ 'nyɩ ‑sa 'la wɔlɩ yɔɔ 'lɛ pɔlɛɛn ci bha? ‑N 'ta ncɛlɩ ‑n 'ta 'lɛ yodi zʋ, ‑ma Laagɔ ‑n zʋ 'lɛ yodi». 5Daa Ananɩasɩ 'nu 'lɛ wɔlɩ ‑naa na, ɔ ya bhli 'nyɩ ɔ ya 'ku. 'Nyɩ ŋanɔ ya maa 'fɩan ‑ɔ 'nui 'lɛ na pla gbasa. 6Na, ncaanyɩgbɩaa ya ci, ma ya ‑blaanyɛkɛa lokwi cɩ gʋa 'nyɩ ma yɛɛ ziziekan mʋ.
7'Ŋwacɩwli ‑mɔta 'plɩ 'lɛ na, ɔ nʋŋlɔ ya ci, ɔ 'taa wɔlɩa ‑ɩ 'plɩ 'lɛ na ‑ci. 8Na, Pɩɛlɩ yɔɔ la 'nyɩ ɔ yɔɔ neencla lebhe: «Solu ka kaan, 'pɛlʋ ‑naa 'kʋ ma ‑pɩalɩ 'lɛ ‑dʋdʋa a zʋ 'lɛ 'pɛlʋ na bha?» Ɔ nabhe: «‑Ghɛɛ, ʋla 'pɛlʋa ‑kʋ 'lɛ 'dɛ.» 9Na, Pɩɛlɩ yɔɔ 'cla lebhe: «'Nsasa a nʋnʋnʋ 'lɛ a ya 'lɛ bhlo 'plɩ le a 'ka ‑Kwlenyɔ 'la 'Wugoa vʋvʋalɩ bha? Po 'nyukwliin, maa ‑ɔ wlʋ 'lɛ ‑n ‑ŋuto ziziekaan na, 'la kplia gbalɩ gbinea 'kʋ. ‑Mɔɔ ‑ma sɛɛ, ma cɩ 'kɔɔ famʋ.» 10'Kplookʋ, ɔ ya Pɩɛlɩ ‑zɔn bhlili 'nyɩ ɔ ya 'ku. Daa ncaanyɩgbɩa ble 'lɛ na, ɔla 'kukunaanɔa ma ŋeni 'lɛ, ma yɔɔ 'lɛ 'ma 'nyɩ ma yɔɔ 'lɛ ɔ ‑ŋuto cɩ ziziekaan mʋ. 11Na, ŋanɔ 'kadie ya ‑laagɔnɩkplaa ‑tɛtɛa ɩya maa 'fɩan ‑ɔ 'nua 'lɛ wɔlɩ ‑naa na pla.
Lobhulobhunyaa ya 'ciinzizielɩlobholi nʋ
12Lobhulobhunyaa* gbaa ghledɩ ‑bhutukpa 'plɩa 'nyɩ ma nʋa nikpooslaslawɔlɩ ‑bhutukpa 'bhlɩnyaa sidiin. Maa 'fɩan 'wlalɩa pɔlɛ 'kʋ 'nyɩ ma 'nylugoa Salomɔɔn ‑paaplua ‑zɔn. 13‑Buun nclɔɔ bhlogbɩɩ 'lɩ 'taa 'tɛtɩ ɩya ɔ 'kaa maa nɩkplaan bhlili. 'Bhlɩmɔɔn, 'bhlɩnyaa jakaa maa, 14'nyɩ ncaabhutukpa, 'ŋwlɛ ɩya ŋodie zʋa mala pɔɔtɛtɛa ‑Kwlenyɔ 'kʋ. 15Ma lamʋa guzenyaa 'clikpua nɩkplaan, ma zʋa maa 'kusi ‑aana ‑gbiti 'kʋ le Pɩɛlɩ kasɛ 'plɩda 'kʋ na, ɔla ‑zuzua 'bhebhe 'kasɛ maa nɩkplaan bhlo ko. 16Ncaabhutukpa 'wlʋlʋa 'dia ‑ɩ mɛa 'lɛ Zolizalɛmʋdua cɩ na 'kʋ, ma lamʋa guzenya ɩya ncɛlɩa 'wugwi ‑nyinyi bhɩa 'lɛ 'kwlɩ na, 'nyɩ maa 'fɩan jabhaa.
Ma ya lobhulobhunyaa ‑palʋʋn 'pa
17Daa ‑teyiyinyɔ ‑kpasaa ɩya ɔla cɩkʋnyaa ‑tɛtɛa ‑ɔ ‑glɩ 'lɛ Saduseyɛɛnnyaa* 'la ‑kandinyaa 'nu 'lɛ wɔlɩ ‑naa na, dɔgbɛ ya maa pla. 18Ma ya gba, ma ya lobhulobhunyaa* 'kʋbhli 'nyɩ ma ya maa 'dua 'kʋ 'la ‑palʋʋnpapalʋa ‑zɔn 'pa. 19‑Ma dobhesa, ‑Kwlenyɔa 'la 'bhlaandleea* ya ‑palʋʋnpapalʋa 'la gbinia kalɩ, ɔ ya maa ‑zɔnwla 'nyɩ ɔ ya maa 'cla lebhe: 20«A 'plɩ, a mʋ Laagɔpaakadiea* ‑zɔn, a 'nylugo ɩya a ‑sa 'bhlɩnyaa wɔɔnyɩtʋa ‑ʋ 'nyɩ 'lɛ jabhʋa na 'la 'dɩa.» 21Ma ya ɔla niwɔlɩa 'kʋ 'plɩlɩ, 'nyɩ daa ‑zelia mʋ 'lɛ zekan na, ma ya Laagɔpaakadiea ‑zɔn mʋ. Ma ‑kʋa 'yɛpɩ 'nyɩ ma caa. Dɩpɩa bhlogbɩɩ, ‑teyiyinyɔ ‑kpasaa ya ci ɔya ɔla cɩkʋnyaa, ma ya Zifʋnyaa* 'la 'tɩtɩplakaandikadiea 'wluwlalɩ, 'nyɩ ma ya gba ma ya lobhulobhunyaa ‑palʋʋnpapalʋa ‑zɔn 'makan mʋ. 22Daa lobhocuoa mʋ 'lɛ na, ma 'ta maa ‑palʋa ‑zɔn ŋeni. Ma ya cɔlɔ 'nyɩ ma ya 'dɩ ‑la lebhe: 23«‑A mʋ 'lɛ na, ‑a ya ‑palʋʋnpapalʋa 'lɩ, ʋ ‑kpaslɩlɩɔ ʋla saa 'nyɩ ʋla ‑bɛnyaa 'nylugoa 'lɛ gbinia ne 'kʋ, nclɔɔ nclɔɔ ɔla daa. ‑Ma daa ‑a kalɩ 'lɛ gbinia na, ‑a 'tʋʋ ‑zɔn nclɔɔ bhlogbɩɩ ŋeni.» 24Ma 'nu 'lɛ wɔlɩ ‑naa na, nikpoo ya Laagɔpaakadiea 'la 'sojaa toa ɩya ‑teyiyinyaa tocɩa slaa, lobhulobhunyaa 'la gbʋ 'nyɩ ma claa macɩ wɔlɩa 'titia ‑ɩ plɩa 'lɛ na neen. 25‑Ma nclɔɔ bhlo ya ci 'nyɩ ɔ ya maa 'cla lebhe: «Ncɛlɩa a 'paa 'lɛ ‑palʋʋn na, 'lɩka maa ‑ɔ 'nylugo 'lɛ 'yɛpɩ Laagɔpaakadiea ‑zɔn 'nyɩ ma ca 'lɛ ncɛlɩ.»
26Na, 'sojaa toa ɩya ɔla ncɛlɩa ya mʋ le ma 'ka lobhulobhunyaa ‑lamʋ, 'bhlɩmɔɔn ma 'ta maa gblɔɔgblɔɔ kla, sa ŋanɔ bhlaa maa, ncɛlɩa 'la kasɛ maa cɔkʋ vʋ na ɩla gbʋ.
Lobhulobhunyaa ‑kʋ 'tɩtɩplakandea ‑deliin
27Na, ma ‑ya maa ‑lamʋ, ma ya maa 'tɩtɩplakandea ‑deliin zʋ, 'nyɩ ‑Teyiyinyɔ ‑kpasaa ya maa neencla lebhe: 28«‑A yaa anyɩ tie le a 'la 'maanɩa ŋlɩ ‑naa ɩya a 'la caa. ‑Ma anyɩ, a ya ala cacawɔlɩa Zolizalɛmʋdua yeli. Na, ‑anyɩ a 'matɩ 'lɛ lebhe a 'ka nclɔɔ ‑naa 'la ‑dolua 'wlu ‑gblii bha?» 29Pɩɛlɩ ɩya ‑daa lobhulobhunyaa* yɔɔ neenŋonu lebhe: «Laagɔ ɩ ‑fata 'lɛ lebhe ma zʋ ɩya ma zi ncɛlɩ 'kʋ. 30‑A tokadɔcɩ 'la Laagɔa ya Zozii, a 'bhlalɩ 'lɛ dabhlalɩsʋa 'ciin na, 'kwɩɩnkʋbho. 31Ɔmɔ Laagɔ zʋ 'lɛ ɔla 'lɩpasɔa 'kʋ, le ‑Kwlenyɔ ɩya gbʋʋnsanyɔ ɩya ɔ 'ka gba Izlayɛlɩnyaa* 'ka kwlacala ɩya mala nyinyia 'ka valɩɛ 'lɩ. 32‑A ‑lio wɔlɩ ‑naa 'la ‑danʋfʋɛ, ‑anyɩ ɩya ‑Kplɔkplɔ ‑Wugoa* Laagɔ 'nyɩ 'lɛ maa ‑ɔ zʋɔ 'lɛ na.» 33Daa ma 'nu 'lɛ wɔɔnyɩtʋ ‑naa na, ʋ ya maa pɔlɛ 'kʋ ‑sie, 'nyɩ ma yaa wabha le ma 'kaa maa 'bhla.
34‑Ma nclɔɔ bhlo ya 'tɩtɩplakandea nɩkplaan 'kʋbho. Ma laa 'mɔɔ Gamalɩɛlɩ, ɔ ‑glɩa Falizɩɛnnyɔ* ɩya ‑jlɩmaacanyɔ* 'nyɩ ncɛlɩa ‑tɛtɛa zʋa 'mɔɔ. Ɔ ya 'clalɩ le ma wlaa ncɛlɩa ma zʋ 'lɛ 'tɩtɩa na 'pɛpɛ ‑zɔn. 35'Nyɩ, ɔ ya 'cla lebhe: «Izlayɛlɩnyanyɩ, a zʋlʋ ɩmɩa a 'matɩ 'lɛ le a 'ka ncɛlɩ ‑naa cɩ nʋ na pɔlɛ 'kʋ. 36Clɩɩkli ‑naa nɩkplaan, ‑a ya nclɔɔ bhlo 'lɩ, ma laa 'mɔɔ Teodasɩ. Ɔ laa ɔcɩ ‑gɩganclɔɔ 'nyɩ ncɛlɩ ‑gwlɩɩ ‑ngbi 'la dɩpici ‑nmɔɔna yaa 'mɔɔ gɩlɩ. ‑Ma ma yɔɔ 'bhla, 'nyɩ maa 'fɩan ‑ɔ gɩlɩa 'mɔɔ 'lɛ na ya dlolu, nclɔɔ bhlogbɩɩ 'ta -to.
37Ɩla leen, 'bhlɛsʋa nɩkplaan ma zʋa 'lɛ ncɛlɩ ‑afluwaan na, Galileenyɔ Zuda 'wlʋa 'lɛ ‑zɔn 'nyɩ ncaabhutukpa yaa 'mɔɔ 'lɛ gɩlɩ. Ɔmɔ ‑ma, ɔ ya 'ku 'nyɩ maa 'fɩan ‑ɔ gɩlɩa 'mɔɔ 'lɛ na ya 'lɛ dlolu. 38Na, n solu anyɩ lebhe a 'la falɩanɩ ncɛlɩ ‑naa 'la wɔlɩa pɔlɛ cɩ ɩya a 'talɩ maa 'cin ma 'plɩ ma 'ka mʋ! Ɩ ‑ka ‑kʋ le ncɛlɩ wlɩɩn mala nʋnʋgbɩa ‑ka 'wlʋlʋ na, ɩmɩ 'titi cɩ 'ka mlɔ. 39‑Ma Laagɔ wlɩɩn ɩ ‑ka 'wlʋlʋ na, 'a cɩ 'ta mino ɩya a 'ka gba ma 'ka mlɔ. A zʋlʋ pɔle 'kʋ ɩya aya Laagɔ 'la ka tʋ 'kʋ 'cɩlɩ!» Ma ya ŋonu, ma ya Gamalɩɛlɩ 'la wɔlɩa 'ma. 40Ma ya ‑awlɛ lobhulobhunyaa la, ma ya gba ma yaa maa paan bhutili, ma ya maa tie le ma 'la slaanɩ Zozii 'ŋlɩ, 'nyɩ ma ya maa 'cintalɩ. 41Lobhulobhunyaa ya 'tɩtɩplakandea ‑deliin 'wlʋ, pɔlɛkʋmɛnɔ nɩkplaan, saa Laagɔ ya 'lɩ lebhe ma ‑ŋwaa 'kʋ le ma ‑sʋkpɔɔ Zozii 'la 'ŋlɩa 'la gbʋ na. 42Na, clɩɩa 'fɩan, Laagɔpaakadiea* ‑zɔn, ‑aana 'sleen, ma sɛ 'taa calɩɛ ɩya Zozii, Laagɔ 'la ‑Sasanyɔa* 'la Dɩnanɩa* 'la ‑salɩɛa 'kʋ.
Currently Selected:
Lobh 5: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.