Lobh 4
4
Zifʋnyaa ya Pɩɛlɩ ɩya Zaan 'tɩtɩ zʋ
1Pɩɛlɩ ɩya Zaan ‑kʋa ncɛlɩa soluda, 'nyɩ ‑teyiyinyaa, Laagɔpaakadiea* 'la 'sojaa toa ɩya Saduseyɛɛnnyaa* ya 'lɛ futo. 2Ma 'lɩ 'lɛ lebhe ma caa ncɛlɩa, 'nyɩ ma 'plɩlɩa Zozii 'la 'kwɩɩnkʋbhue 'kʋ, 'nyɩ ma claa ma lebhe ncɛlɩ cɩ 'ka 'kwɩɩnkʋbho na, ɩ ya maa pɔlɛ 'kʋ ‑sie. 3Na, ma ya gba, ma Pɩɛlɩ ɩya Zaan 'kʋbhli 'nyɩ ma ya maa ‑palʋʋn 'pa le ma 'ka 'yɛpɩ kʋ ‑aan ɩya ‑zeli 'ka ze, sa 'ylʋ yaanɩa tooto mʋ na. 4Ncɛlɩa ‑ɔ poa 'lɛ wɔɔnyɩtʋa 'nyukwliin na, ‑bhutukpa ya mala pɔɔtɛtɛa Zozii 'kʋ zʋ. Ma cɩa sa ncaatabhli ‑ngbi 'wlʋ.
5Na, daa ‑zelia ze 'lɛ na, Zifʋnyaa* tocɩa, ncaakpasɩa* ɩya ‑jlɩmaazienyaa* ya Zolizalɛmʋdua nɩkplaan 'wluwlalɩ. 6‑Teyiyinyɔ ‑kpasaa ma la 'lɛ Anɩ na, Kayifʋ, Zaan, Alɛzandlɩ ɩya maa ‑tɛtɛa ‑ɔ 'wlʋlʋ 'lɛ ‑teyiyinyaa tocɩa 'la 'lɔlʋ 'kadiea nɩkplaan na, maa ‑tɛtɛa ‑kʋa 'dɛ. 7Ma ya gba ma ya Pɩɛlɩ ɩya Zaan maa ‑deliin ‑la 'nyɩ ma ya maa neencla lebhe: «'Tɛtɩ saa a 'maa 'lɛ ‑aana 'ŋlɩ saa a laa 'lɛ 'nyɩ a ya 'lɛ ɩmɩ ‑naa nʋ bha?» 8Na, Pɩɛlɩ ‑kʋa 'dɛ, ‑Kplɔkplɔ ‑Wugoa* yɔɔ yeli, 'nyɩ ɔ ya maa 'cla lebhe: 9«'Bhlɩtocɩnyɩ, ‑a tocɩnyɩ, ma ya ‑anyɩ 'tɩtɩ zʋ ‑yaka, sa ‑a ya bhubhubhubhunyɔ 'nanɩ nʋ, 'nyɩ ma cla ‑anyɩ neen le ‑a ‑sa saa ɩ 'plɩplɩlɩ 'lɛ 'nyɩ nclɔɔ ‑naa ya 'lɛ jabha na ɩla wɔlɩa ‑zɔn. 10Na, anyɩa 'fɩan ‑ɔ ‑kʋ 'lɛ da na, ɩya Izlayɛlɩnyaa* ‑tɛtɛa, a cibhlili lebhe Zozi Klisi, Nazalɛtɩnyɔa a bho 'lɛ dabhlalɩsua 'ciin 'nyɩ Laagɔ -bho 'lɛ 'kwɩɩn 'kʋ na, ɔla 'ŋlɩa nɩkplaan nclɔɔ ‑naa jabhalɩ 'lɛ, 'nyɩ ɔ 'nylugo 'lɛ ‑da anyɩ 'ci 'kʋ. 11Ɔmɔ ‑ɔ ‑glɩ 'lɛ cokwiea anyɩ ‑paaslanyaa 'pa 'lɛ 'kwlaan na. Ɛmɛ ‑ɛ 'plɩ 'lɛ lopolugbuducokwiea. 12Gbʋʋnsalɩɛ 'ta ‑buun da bhlogbɩɩ ‑kʋ, ɩ ‑ka ‑kʋ le ‑n 'ta ɔmɔ nɩkplaan ‑tɛɛ na. Sa, ‑buun ŋlɩ bhlogbɩɩ 'ta ‑laagɔzɔan ncɛlɩa ‑nyɩɔ, ‑a cɩ 'ka 'lɛ 'kʋ 'plɩlɩ ɩ ya ‑a 'ka 'lɛ gbʋʋnsalɩɛ 'lɩ na.»
13Ma lɩa 'lɛ lebhe Pɩɛlɩ ɩya Zaan 'tɛlɩa macɩ ‑deli 'kʋ na, 'nyɩ ma ‑ci 'lɛ lebhe ma 'taa ‑aflucibhlilinya 'kadɩ ɩya 'klʋnya ‑glɩ na, ɩ yaa maa nikpoo ‑sla. Ma ya sɛɛ cibhlili lebhe ma ‑glɩa Zozii 'la 'namʋnya. 14‑Ma ma kopea nclɔɔa ‑ɔ jabhaa 'lɛ, 'nyɩ ‑ɔ 'nylugoa 'lɛ maa cɩ na 'ciin, 'nyɩ maa 'lɩ 'taanɩa wɔlɩ ɩya ma 'ka nyɩtɛ. 15Na, ma ya 'cla lebhe ma wlaa maa ‑zɔn, 'nyɩ maa bhlobhlo 'tɩtɔnɩa wɔlɩa. 16Ma claa lebhe: «'Lɩsaa ‑a ‑cɩ kaa 'lɛ ncɛlɩ ‑naa nʋ bha? ‑Masa, ma ‑glɩ 'ciinzizielɩlobholia ‑ɩ 'ta 'lɛ ‑zizieo na 'la nʋnya na. Zolizalɛmʋdua nɩkplaan 'la ncɛlɩa ‑tɛtɛa ‑lio wɔlɩa 'la ‑danʋfʋɛ, 'nyɩ ‑a cɩ 'tɩɩ cɩcɛlɩlɩɛ mino. 17'Bhlɩmɔɔn, ɩ ‑fata lebhe ‑a 'nylugolu wɔlɩ ‑naa ɩya ɩ 'la ka 'bhlɩnyaa ‑tɛtɛa 'kʋcɩlɩ. Na, ‑a ka maa 'cizalalɩ ɩya ma 'la kanɩ ŋlɩ ‑naa nclɔɔ bhlogbɩɩ 'ci 'kʋ 'ŋlɩsla.» 18Na, ma ya gba, ma ya ‑awlɛ Pɩɛlɩ ɩya Zaan la, 'nyɩ ma yaa maa tie lebhe ma 'la slaanɩ Zozii 'la 'ŋlɩa 'ŋlɩ, ‑aana ma la 'maanɩɩ ɩya ma 'la caa. 19‑Ma Pɩɛlɩ ɩya Zaan ya maa 'cla lebhe: «‑A ka 'lɛ anyɩ 'nyukwliin po, ‑aana ‑a ka 'lɛ Laagɔ 'nyukwliin po na, ‑anɩsaa ‑ɩ ‑gɩlɩɔa 'lɛ 'ciin Laagɔ 'ci 'kʋ bha? Anyɩ 'titi a kope wɔlɩa nɩkplaan ‑na! 20'Bhlɩmɔɔn, ‑ɔ ‑glɩ 'lɛ ‑anyɩ na, ‑a cɩ 'ta mino ‑a ka -ala nia mɛ, ɩya ɩmɩa ‑ala 'ci ya 'lɛ 'lɩ 'nyɩ ‑ala 'nyukwli ya 'lɛ 'nu na, ‑a 'la kɩɩ nyɩtɛ.» 21Na, ma ya ‑awlɛ maa 'cizalalɩ 'nyɩ ma ya maa 'cintalɩ, ‑ofi lebhe ma 'ta wɔlɩa ma cɩ 'kaa 'lɛ maa ‑slo na 'lɩ. 'Bhlɩnyaa 'la gbʋ, ma 'ta 'lɛ maa wɔlɩ ‑slo, sa ncɛlɩa 'fɩan gbaa Laagɔ 'klʋ wɔlɩa ‑ɩ 'plɩ 'lɛ na 'la gbʋ. 22‑Masa nclɔɔa Laagɔ 'plɩlɩ 'lɛ 'ciinzizielɩlobholi ‑naa 'kʋ 'nyɩ ɔ jabha 'lɛ na ɔla lioa plɩa liowli ‑gwlɩɩ ‑mɔsɔ cɩ.
Gɩlɩnyaa bhibhie
23Daa ma 'talɩ 'lɛ Pɩɛlɩ ɩya Zaan 'ciin na, ma ya mʋ, ma ya mala 'namʋnyaa ŋeni 'nyɩ ma ya maa ɩmɩa ‑tɛtɛa ‑teyiyinyaa tocɩa ɩya ncaakpasɩa solua 'lɛ maa na 'dɩkʋsalɩ. 24Ma ya maa 'nyukwliinpo. 'Nyɩ ɩla leean, maa 'fɩan ya pɔlɛ 'kʋwlalɩ, 'nyɩ ma ya Laagɔ bhibhie. Ma yɔɔ 'cla lebhe:
«‑Kwlenyɔ, ‑mɔ nʋ 'lɛ ‑laagɔɔn,
ɩya lɩɩa ‑tɛtɛa ‑ɩ ‑kʋ 'lɛ ‑laagɔa nɩkplaan na,
‑dʋdʋ, ɩya lɩɩa ‑tɛtɛa ‑ɩ ‑kʋ 'lɛ ‑dʋdʋa 'kʋ na,
ge ɩya lɩɩa ‑tɛtɛa ‑ɩ ‑kʋ 'lɛ gea nɩkplaan na.
25‑Mɔ ‑ɔ 'plɩlɩ 'lɛ ‑Kplɔkplɔ ‑Wugoa* 'kʋ 'nyɩ n ya 'lɛ ‑a to Daviti, ‑naa lobhocoa wɔɔnyɩtʋ ‑naa neen zʋ:
'Lɩsaa 'la gbʋ ‑laagɔzɔan 'dɩdɔa 'lɛ ‑sa bha?
'Lɩsaa 'la gbʋ ncɛlɩ ‑ka 'lɛ ‑sa 'la 'kpɔkpɔ -wɔɔgugwie bha?
26 ‑Dʋdʋa 'kʋ 'la nyɩbhɛlɩa ya cɩmɛmɛnɩ,
‑kwletocɩa ya 'wluwlalɩ,
ma ya bhlo 'plɩ
'nyɩ ma mʋnʋ ‑Kwlenyɔa ɩya ɔla ‑Sasanyɔa gbatlɩ.
27‑Ghɛɛ, ma ya ‑zaagbʋsa duu ‑naa nɩkpklaan 'wluwlalɩ, Ewlɔdʋ ɩya Pɔnsʋ Pilatɩ, maya Izlayɛlɩnyaa* ɩya ‑buun bhlɩ 'kʋ 'la ncɛlɩa, 'nyɩ ma mʋnʋ Zozii, ‑naa ‑kplɔkplɔ lobhocoa ‑n -sa 'lɛ na gbatlɩ. 28Wɔlɩa ‑n wabha 'lɛ 'nyɩ ‑naa 'tɛtɩa nɩkplaan, ‑n ya 'lɛ tooto kpo 'kʋ zʋ na, ‑sa ma ‑glalɩɩ 'lɛ 'kʋ. 29‑Kwlenyɔ, kopenɩ ‑pɔtɔnʋ mala 'cia ma zalalɩ 'lɛ ‑anyɩ na 'ciin ɩya ‑n 'nyɩ ‑naa lobhocuoa 'tɛtɩ ɩya ma 'ka ‑naa wɔɔnyɩtʋa ncɛlɩ ‑delikʋtɛlɔ nɩkplaan solulu. 30Na, 'maa ‑glɔ ‑naa sɔa nɩkplaan ɩya ncɛlɩ 'ka jabha, ma 'ka ghledɩ 'ciinlɩ ɩya nikpooslaslawɔlɩ 'ka ‑nʋɔ, Zozii, ‑naa ‑kplɔkplɔlobhocoa 'la 'ŋlɩa nɩkplaan.» 31Daa ma bhɩalɩ 'lɛ bhibhielɩɛ na, ‑palʋa ‑zɔan ma 'wlalɩa 'lɛ 'wlu na ya 'dɩdɔ. ‑Kplɔkplɔ ‑Wugoa ya maa 'fɩan yeli 'nyɩ ma plicianɩa ncɛlɩ Laagɔ 'la wɔɔnyɩtʋa ‑delikʋtɛlɔ nɩkplaan.
Klisi 'la gɩlɩnyaa 'wlalɩa pɔlɛ 'kʋ
32Ncaabhutukpaa ‑ɔ 'plɩ 'lɛ Zozii 'la pɔɔtɛtɩkalɩnyaa na, 'wlalɩanɩa pɔlɛ ɩya 'wugo 'kʋ 'nyɩ nclɔɔ ‑ylɛylɛ 'ma 'tanɩa ɔla kalɩkalɩlʋʋ bhlogbɩɩ le ɔmɔ 'titi ɔ 'nʋ. ‑Ma, ka ma 'wlalɩanɩa 'lɛ lɩɩa ‑tɛtɛa 'kʋ. 33'Tɛtɩ 'kadie nɩkplaan, lobhulobhunyaa* lilia 'lɛ ‑Kwlenyɔ Zozii 'la 'kwɩɩnkʋbhuea 'la ‑danʋfʋɛa 'nyɩ Laagɔ 'la 'nyupalɩɛa ‑kʋa 'lɛ maa ‑tɛtɛa 'kʋ nikadieen. 34‑Miemienyɔ bhlogbɩɩ 'taa maa sidiin ‑kʋ. ‑Masa, maa ‑ɔ ‑kaa 'lɛ ‑dʋdʋ ‑aana ‑palɩ na, zʋa 'mɩɩ 'pɛlʋ, ma lamʋa lɩɩa ma zʋ 'lɛ 'pɛlʋ na 'la 'dalaa, 35'nyɩ ma palɩa 'maa 'lɛ lobhulobhunyaa ‑deliin sa. Ma polia 'maa 'nyɩ ma nyɩa nclɔɔ nclɔɔ 'la da, lʋʋa ɔ ‑miea 'lɛ na 'la 'sasʋʋn.
36Na, nclɔɔ bhlo, ma laa 'mɔɔ Zozɛfʋ, 'nyɩ lobhulobhunyaa paa 'mɔɔ 'ŋlɩ 'kʋ ma laa 'mɔɔ Banabasɩ, ɩ sa ‑zɔn le pɔlɛɛnzʋnyɔ. Ɔ ‑glɩa Levii 'la 'lɔkpʋnyɔ ɩya Siplʋlekpoa 'kʋ 'la ‑dʋdʋvalɩnyɔ. Nclɔɔ ‑naa ‑kaa 'kwla. 37Ɔ ya ɔla 'kwlaa 'pɛlʋzʋ, ɔ ya 'dalaa ‑lamʋ 'nyɩ ɔ ya lobhulobhuyaa ‑deliin sapalɩ.
Currently Selected:
Lobh 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.