1 Tes 1
1
‑Ayopalɩɛ
1Silivɛɛn, Timoti ɩya ‑amʋ Pɔlʋ, ‑anyɩ ‑ɔ zie 'lɛ anyɩ Tesalonikidua 'kʋ 'la ‑laagɔnɩkplaa -a ‑kʋ 'lɛ To Laagɔ ɩya ‑Kwlenyɔ Zozi Klisi nɩkplaan na. 'Nyupalɩɛ ɩya pupue kʋ anyɩ 'kʋ.
Tesalonikinyaa la Dɩnanɩa ‑nʋawlɛ
2Clɩɩa 'fɩan, ‑a bhɔlʋ Laagɔ anyɩa 'fɩan 'la gbʋ, ‑a ‑ka ala da bhibhieda ‑kʋ na. 3‑A To Laagɔ 'ci 'kʋ, ‑a luoli ala pɔɔtɛtɛa 'la nʋnʋgbɩa, ala ‑walʋa 'la lobholia ɩya ala pɔlɛkʋtɛlɔa 'la ‑nwɔviliea -ala ‑Kwlenyɔ Zozi Klisi 'nyɩ 'lɛ ‑anyɩ na. 4Bholiecɩnyɩ, ‑a ‑ci sɛɛ lebhe ka Laagɔ wabha 'lɛ anyɩ 'nyɩ ɔ ya 'lɛ anyɩ desla, le a 'ka ɔ 'nʋa 'plɩ. 5Sa, Dɩnanɩa* ‑a ‑sa 'lɛ anyɩ na, 'ta wɔɔnyɩtʋ bhlobhlo nɩkplaan ‑tɛɛ 'plɩlɩ, ‑ma Laagɔ 'la 'tɛtɩa ɩya ‑Kplɔkplɔ ‑Wugoa* 'la nʋnʋgbɩ ‑kʋa 'mɩɩ nɩkplaan 'nyɩ a 'tɛlɩa 'mɩɩ ‑deli 'kʋ. ‑Awlɛ, a ‑ci saa ‑a namʋnamʋnʋ 'lɛ anyɩ sidiin, ala 'nanɩ 'la gbʋ na. 6'Nyɩ anyɩ ‑ma, a ya ‑anyɩ dɩbalɩ 'nyɩ a ya ‑Kwlenyɔ ‑ma dɩbalɩ. 'Kwlɩ 'kadɩa ‑ɩ bhɩa 'lɛ anyɩ na sidiin, a ya ŋonu a ya Laagɔ 'la wɔɔnyɩtʋa 'ma, pɔlɛkʋmɛnɔa ‑Kplɔkplɔ ‑Wugoa* nyɩ 'lɛ na, nɩkplaan. 7Na, a yanɩ ncɛlɩa Masedʋanɩ ɩya Akayiibhlɩa 'kʋ 'la ncɛlɩa ‑ɔ ‑ka 'lɛ Zozii 'la pɔɔtɛtɛ na, kope 'lɛ 'ciin na, 'plɩ. 8Sa a 'bhlɩ ‑Kwlenyɔ 'la wɔɔnyɩtʋa 'wlʋlʋ 'lɛ 'nyɩ ʋ ya 'lɛ Masedʋanɩ ɩya Akayiibhlɩa 'kʋ dlolu. ‑Awlɛ ala pɔɔtɛtɛa a ‑zʋɔ 'lɛ Laagɔ 'kʋ na, 'la 'dɩa ya daa ‑tɛtɛa dlolu 'nyɩ 'ɩ 'matɩ 'tanɩ le a nyɩtɛ ‑awlɩɩ. 9Sa ncɛlɩa 'fɩan nyɩtɛ saa ‑a mʋa 'lɛ anyɩ 'bhlɩ 'nyɩ a klaklalɩ 'lɛ -anyɩ ɩya saa a ‑tlatlalɩ 'lɛ ala wlɩɩn 'la nʋnʋlɩɩa a gʋgwlaa 'lɛ na, kɔkʋʋn 'nyɩ a ya 'lɛ Laagɔ 'klʋtla, le a 'kanɩ ɔmɔa ‑ɔ ‑kʋ 'lɛ 'nyɩ ‑ɔ ‑glɩ Laagɔ 'titi na, lobho 10ɩya a 'kanɩ Zozii, ɔla 'Cʋa ɔ ‑bho 'lɛ 'kwɩɩn 'kʋ 'nyɩ ‑ɔ tlʋbhalɩ 'lɛ -anyɩ Laagɔ 'la dɔgbɛa ‑ɛ ci 'lɛ 'yɛpɩ na cɩ da na, ‑bɛ ɩya ɔ 'ka ‑laagɔɔn 'wlʋ ɩya ɔ 'ka ci na, ɩla wɔlɩa.
Currently Selected:
1 Tes 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.