1 Tes 2
2
Lobholia Pɔlʋ nʋ 'lɛ na
1Bholiecɩnyɩ, anyɩ 'titi a ‑ci sɛɛ lebhe ‑ala a 'bhlɩ la ciliea 'ta 'kpɔkpɔ 'plɩ. 2'Fɩɔn ɩya ‑a ka 'lɛ a 'bhlɩ mʋ na, 'kwlɩɩ wlʋa 'lɛ anyɩ bhɩada 'nyɩ ma wlʋa 'lɛ anyɩ vlada 'yɛpɩ Filipʋdua 'kʋ, a ‑ci sɛɛ. ‑Ma, Laagɔ ya ‑anyɩ 'tɛtɩa ‑ɩ ‑fataa 'lɛ le ‑a kalɩ, ɩya 'kwlɩbhɩɛa ‑tɛtɛa sidiin ‑a ka anyɩ ɔla Dɩnanɩa* ‑sa na 'nyɩ. 3Sa ‑ala pliciea 'ta yodi 'kʋ 'slalɩ naa, ‑ɛ 'wlʋlʋ 'ta wɔɔgugwie ‑nyinye nɩkplaan 'nyɩ ɛ 'ta ‑kplakpla nɩkplaan ‑ka. 4‑Ma Laagɔ ya -anyɩ nɩkplaan cla, le ɔ 'ka -anyɩ Dɩnanɩa 'la ‑salobholia wlɩɩn zʋ. Na ka a plici 'lɛ 'sa ɔ 'matɩ 'lɛ na. ‑A 'matɩ 'ta le ‑a ka ncɛlɩ 'tʋpla, ‑ma Laagɔa ‑ɔ ‑jlɛ 'lɛ ‑ala pɔlɛa nɩkplaan na, ɔmɔ ‑a ‑wa 'lɛ le ‑a ka 'tʋpla. 5Ɩla gbʋ dɛ ‑a 'ta ka ‑azla 'lɛ nclɔɔ 'nyiglili, a ‑ci sɛɛ, ‑a 'ta ka ‑azla ‑nvʋsʋɛ 'la wɔlɩ gugu, Laagɔ ‑lio ɩla ‑danʋfʋɛ. 6'Nyɩ ‑a 'ta ka ‑azla ncɛlɩ wlɩɩn 'ŋwleenfalɩlɩɛ 'matɩlɩ. ‑A 'ta ka ‑azlɩɩ anyɩ 'bhlɩ 'matɩlɩ naa, ‑a 'ta ka ‑azlɩɩ ‑buun -naanʋa 'bhlɩ 'matɩlɩ. 7'Bhlɩmɔɔn, ‑a ‑glɩ 'lɛ Klisi 'la lobhulobhunya* na, ‑a cɩa mino ‑a cɩa anyɩ 'kʋ kʋlʋ. ‑Ma, daa ‑a ‑kʋa 'lɛ anyɩ sidiin na, ‑a ya anyɩ ‑pɔɔnpɔɔn kla, le saa 'cuo 'nɔ pɩa 'lɛ 'cuoa ɔ lolu 'lɛ na. 8Na, ‑a ya tete ‑a ya anyɩ wabha 'nyɩ -n 'taanɩa Laagɔ 'la Dɩnanɩa ‑tɛɛ ‑a 'taa 'lɛ -bhɔsʋa le ‑a kaa anyɩ ‑sa, ‑ma ‑a ‑bhɔsʋa ‑awlɛa le ‑a cɩa ‑acɩ ‑sa, ala gbʋ, saa a ‑tete 'lɛ ‑a kalɩanɩa 'lɛ ‑anyɩ gbʋ na. 9Na, bholiecɩnyɩ, a luoli ‑ala lobholia ɩya ‑ala sɛsʋa. ‑A ya lobholi nʋ zezezeliin ɩya bhlibhliylʋʋn le ‑a 'la ka sɛ anyɩ nɩkplaan bhlogbɩɩ 'kʋ kʋlʋ 'nyɩ ‑a ya 'lɛ anyɩ Dɩnanɩa ‑sa.
10A -lio ‑danʋfʋɛ 'nyɩ Laagɔ ‑ma ‑lio 'lɛ ‑danʋfʋɛ lebhe ‑aya anyɩ pɔɔtɛtɩkalɩnyaa ya ‑kplɔlɩɛɛn ɩya 'kʋnylugolulɩɛɛn namʋnʋ 'nyɩ ‑a 'ta nclɔɔ ‑ylɛylɛ 'la ‑ngasi tʋ. 11'Nyɩ a ‑ci ‑awlɛ sɛɛ lebhe ‑a ya anyɩa 'fɩan, nclɔɔ nclɔɔ kla le saa to kla 'lɛ ɔla 'cuo na. 12‑A ya anyɩ wɔlɩ pɔlɛcɩfalɩ, ‑a ya anyɩ 'tɛtɩɩn zʋ 'nyɩ ‑a ya 'lɛ anyɩ 'wlusla lebhe a namʋ saa ‑ɩ ‑ŋwa 'lɛ 'kʋ le ‑aya Laagɔ, ‑ɔ la 'lɛ anyɩ ɔla Nyɩbhɛlɩdua* ɩya ɔla 'klʋagbaa nɩkplaan na, namʋ na.
Pɔlʋ falɩ Tesalonikinyaa 'ŋwleen
13'Lɩka wɔlɩa 'la gbʋa ‑a bhɔlʋ ‑awlɛ 'lɛ Laagɔ clɩɩa 'fɩan ala gbʋ na. Daa a 'nu 'lɛ Laagɔ 'la wɔɔnyɩtʋa ‑a solua 'lɛ anyɩ na, a yʋʋ 'ma. A 'tʋʋ 'ma le ncɛlɩ 'la niwɔlɩ, ‑ma a yʋʋ 'ma le lʋʋa 'titita ʋ ‑glɩ 'lɛ na, a yʋʋ 'ma le Laagɔ 'la wɔɔnyɩtʋa. 'Nyɩ ʋmʋ ‑ʋ nʋnʋ 'lɛ anyɩa ‑ɔ ‑ka 'lɛ Zozii 'la pɔɔtɛtɛ na lobholi nɩkplaan. 14Bholiecɩnyɩ, a ya Zudeebhlɩa 'kʋ 'la -laagɔnɩkplaa 'la ncɛlɩa ‑ɔ -kʋ 'lɛ Zozi Klisi nɩkplaan na, 'la 'bɩa 'kʋ 'plɩlɩ, sa anyɩ ‑ma a ya a 'bhlɩnyaa 'titi wlɩɩn sɛlɩ, saa ma sɛlɩ 'lɛ Zifʋnyaa* wlɩɩn na. 15Maa ‑naa ‑ɔ 'bhla 'lɛ ‑Kwlenyɔ Zozii ɩya Laagɔnekʋnyɩtɛnyaa* na, ma ya ‑anyɩ gbaylɩsamʋ. Mala nʋnʋgbɩa 'ta Laagɔ 'tʋ ‑ka 'nyɩ ma ‑glɩ ncɛlɩa 'fɩan 'la ‑zɔbhɛlɩgbanya. 16Ma 'ta ‑wa lebhe ‑a plici maa ‑ɔ 'ta 'lɛ Zifʋnya ‑glɩ na Laagɔ 'la niwɔlɩa ɩya ma 'ka gbʋʋnsalɩɛ 'lɩ 'nyɩ ma zʋlʋzʋlʋlʋ 'lɛ ‑sa, clɩɩa 'fɩan, mala nyinyia 'kʋ. ‑Ma bhɩalɩdaa Laagɔ 'la dɔgbɛa ya maa 'wlu bhlili.
Pɔlʋ ‑wa lebhe ɔ 'ka ‑awlɛ Tesalonikinyaa 'ciinlɩ
17Bholiecɩnyɩ, ‑ɔ ‑glɩ 'lɛ anyɩ na, ‑a -ya anyɩsɔ ya cɩsasalɩ clɩɩ ‑zlʋsaasa, ‑a 'ta anyɩ ‑jlɛ 'bhlɩmɔɔn, ‑ma ‑ala pɔlɛa ‑kʋ anyɩ cɩ. ‑A ya 'sɩslɩlɩ le ‑a ka anyɩ 'ciinlɩkan mʋ, sa ala 'ciinlɩlɩɛ 'la 'tʋ bhlaa anyɩ na. 18Ɩla gbʋ na, ‑a ya wabha lebhe ‑a ka a 'bhlɩ ci, ‑amʋ Pɔlʋ 'titi, n ya dɩ ‑gbɔɔn cla, ‑ma Sataan* ya ‑anyɩ ‑gugwieen 'dɩ. 19Na, 'lɩsaa ‑glɩa 'lɛ ‑ala pɔlɛkʋtɛlɔ, ‑ala pɔlɛkʋmɛnɔ ɩya, 'klʋagbaa -a cɩ 'ka 'lɛ ‑ala ‑asɩkɛkpoonkpo 'plɩ ‑ala ‑Kwlenyɔ Zozi 'ci 'kʋ, ɔla cɔlɔclɩɩa 'kʋ, ɩ ‑ka ‑kʋ lebhe ‑n 'ta anyɩ na bha? 20‑Ghɛɛ, anyɩ ‑glɩ 'lɛ ‑ala 'klʋagba ɩya ‑ala pɔlɛkʋmɛnɔ.
Currently Selected:
1 Tes 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.