Zefania 2
2
Kupo ya ku baka
1Sicaba se si sa swabi, u ikupule! 2Eza cwalo pili u si ka shwa kale sina palisa, bunyemi bwa Muñ'a Bupilo bo bu cisa bu si ka ku tela kale, ni lizazi la ku bonisa ku halifa kwa hae li si ka fita. 3Mu tahe ku Muñ'a Bupilo, mina batu kamukana ba ba ikokobeza mwa naha, ba ba mamela litaelo za hae. Mu eze ze lukile mi mu ikokobeze. Mwendi mu ka punyuha mwa mulatu wa zazi leo Muñ'a Bupilo a ka bonisa ku halifa kwa hae.
Ku sinyeha kwa macaba a potolohile Isilaele
4 #
Isa 14.29-31; Jer 47.1-7; Ezek 25.15-17; Joel 3.4-8; Am 1.6-8; Zak 9.5-7 Ha ku na ya ka siyala mwa muleneñi wa Gaza. Ashikeloni u ka siyala u si na batu. Batu ba Ashidodi ba ka lelekwa mwateñi lizazi li si ka likela kale, mi ba Ekeroni bona ba ka ngiwa. 5Mina Mafilisita, ba ba pila kwa likamba la liwate, mu maibile. Muñ'a Bupilo u mi atuzi. U ka mi timeza, mi ha ku na nihaili a li muñwi wa ku mina ya ka siyala. 6Naha ya mina ye kwatukw'a liwate i ka ba mabala feela a mafulelo a lingu. 7Batu ba Juda ba ba siyezi ba ka nga naha ya mina. Ba ka fuliseza mwateñi mitapi ya bona, ni ku lobala mwa mandu a ba Ashikeloni. Mulena Mulimu u ka ba ni bona, ni ku ba pilisa hande.
8 #
Isa 15.1—16.14; 25.10-12; Jer 48.1—49.6; Ezek 21.28-32; 25.1-11; Am 1.13-15 Muñ'a Bupilo ya Maata Kaufela u li, “Ni utwile ba Moabi ni ba Amoni ba nze ba shendaula batu ba ka, ni ku itumba kuli ba ka ba amuha naha ya bona. 9#Sim 19.24 Kaniti luli, sina ha ni li Mulimu ya pila wa Isilaele, ni konka kuli Moabi ni Amoni i ka timezwa sina Sodoma ni Gomora. I ka fetuha mabumbu a macacani, sibaka sa misima ya lizwai ni matota kuya kuile. Ba bañwi ba batu ba ka, ba ba siyezi, ba ka nga bufumu bwa bona kamukana ni ku ba amuha naha ya bona.”
10Wo ki ona mukwa wo ba Moabi ni ba Amoni ba ka fiwa mulatu ka ona kakuli ne ba ikuhumusa ni ku itumba, mi ba shendauzi batu ba Muñ'a Bupilo. 11Muñ'a Bupilo u ka ba sabisa. U ka felisa milimu ya lifasi, mi cwale sicaba se siñwi ni se siñwi si ka mu lapelela mwa naha ya sona.
12 #
Isa 18.1-7
Mina Maetiopia, ni mina Muñ'a Bupilo u ka mi bulaya.
13 #
Isa 10.5-34; 14.24-27; Nah 1.1—3.19 Muñ'a Bupilo u ka itusisa maata a hae ku timeza Asiria, naha ye kwa mutulo. Muleneñi wa Ninive u ka u eza matota, mo ku si na mezi ni batu. 14U ka ba libutelo la mitapi ya lingu ni ya likomu, ni ya lifolofolo za mifuta kaufela. Masikita a ka na a pila mwa matota a ona ni ku lila mwa mahaulo. Mañwalala a ka lila fa mapahamelo a fa minyako. Likota za miyaho ya ona li ka lutululwa. 15Nto ye ki yona ye ka ezahala kwa muleneñi o n'o ikuhumusa hahulu kabakala maata a ona, ni ku hupula kuli n'o iketile. Batu ba ona ne ba hupula kuli muleneñi wa bona ne i li ona o mutuna ka ku fitisisa mwa lifasi. I ta ba sibaka sa matota a cwañi, sibaka sa mapumulelo a lifolofolo za mwa naheñi! Mutu ni mutu ya ka u fita kwatuko u ka kuta ngombemongo ka sabo ye tuna.
Currently Selected:
Zefania 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.