Huan 16
16
1Mi a bisa boso e kosnan akí pa boso fe no tambaliá. 2Nan lo ekspulsá boso for di snoa i sí, lo bini un tempu ku ken ku mata boso, ta pensa ku e ta sirbi Dios di e forma ei. 3Nan lo hasi asina, pasobra nan no a konosé ni Tata ni Ami. 4Ma Mi a bisa boso e kosnan akí pa ora e momento yega, boso kòrda loke Mi a bisa.
Trabou di Spiritu Santu
Mi no a bisa boso e kosnan akí for di kuminsamentu, pasobra Mi tabata huntu ku boso. 5Pero awor Mi ta bai serka Esun ku a manda Mi i niun di boso no ta puntra Mi unda Mi ta bai. 6Awor ku Mi a bisa boso, boso kurason ta yen di tristesa. 7Ma Mi ta sigurá boso: ta kumbiní boso ku Mi ta bai, pasobra si Mi no bai, Esun ku ta yuda boso no ta bini serka boso. Ora Mi bai, Mi ta mand'É pa boso. 8Ora E bini, lo e konvensé e hendenan di mundu di kiko ta piká, hustisia i huisio. 9Di nan piká, pasobra nan no a kere den Mi; 10di nan hustisia ku no ta sirbi, pasobra Mi ta bai serka mi Tata i boso lo no mira Mi mas; 11i di nan huisio, pasobra gobernadó di e mundu akí ta husgá kaba.
12Mi tin hopi kos mas di bisa boso, ma boso lo no por soportá nan awor akí. 13Ma ora e Spiritu di bèrdat bini, lo E guia boso na bèrdat kompleto i konta boso tokante kos ku ta bai pasa. Pasobra loke E bisa no ta sali di E mes, ma E ta papia tur loke E tende. 14Lo E duna Mi gloria, pasobra loke E konta boso E ta haña sa di Mi. 15Tur loke Tata tin ta di Mi; p'esei mes Mi a bisa boso ku loke Spiritu Santu papia E ta hañ'É di Mi.
16Aki poko tempu boso no ta mira Mi mas; ma despues di un tempu kòrtiku boso lo mira Mi atrobe.’ 17P'esei algun di su disipelnan a puntra otro: ‘Kiko E ke bisa nos ku “aki poko tempu boso no ta mira Mi mas, ma despues di un tempu kòrtiku boso lo mira Mi atrobe” i tambe ku “pasobra Mi ta bai serka mi Tata?” ’ 18Nan tabata puntra otro: ‘Kiko E ke men ku “un poko tempu”? Nos no ta komprondé ta kiko E ta papia!’ 19Hesus a komprondé ku nan ker a pidiÉ un splikashon i El a bisa nan: ‘Boso ta buska nifikashon di “Aki poko tempu boso no ta mira Mi mas; ma despues di un tempu kòrtiku boso lo mira Mi atrobe.” 20Mi ta sigurá boso: boso lo lamentá den un mundu ku lo gosa. Ma ounke boso lo ta tristu, boso tristesa lo kambia den legria. 21Ora un muhé ta bai duna lus, e ta tristu, pasobra e ora a yega, ma unabes ku e yu a nase, e no ta pensa mas riba e ansha ku el a pasa aden. Asina kontentu e ta ku un hende a bini na mundu! 22Meskos asina boso tambe ta pasa un tempu difísil awor akí, ma lo Mi bolbe mira boso i boso kurason lo yena ku alegria, un alegria ku niun hende no por kita for di boso.
23E dia ei boso lo no pidi Mi niun splikashon mas. Mi ta sigurá boso: Tata lo duna boso kiko ku boso pidiÉ den mi nòmber. 24Te ainda boso no a pidi nada den mi nòmber; pidi i boso lo haña, ya asina boso legria lo ta kompleto.#Mateo 7:7-11; Hakobo 1:5-6
Hesus a vense mundu
25Mi a usa parábola pa konta boso e kosnan akí; e ora lo yega ku Mi no ta papia asina mas, ma ku Mi ta papia bon kla tokante Tata. 26E dia ei boso lo kuminsá pidi Tata den mi nòmber. Esei no ke men ku t'Ami lo mester pidi Tata pa boso. 27Pasobra Tata mes ta stima boso, ya ku boso a stima Mi i a kere ku Mi a bini di Dios. 28Mi a bini di Tata i Mi a bini na mundu; awor Mi ta bai laga mundu i Mi ta bai serka Tata.’ 29Su disipelnan a bisa: ‘Awor Bo ta papia kla i no den parábola! 30Awor nos sa ku Bo sa tur kos i ku no ta na nodi pa niun hende pidi Bo splikashon. Esaki ta pone nos kere ku Bo a bini di Dios.’
31Hesus a kontestá nan: ‘Awor boso ta kere! 32Mira, e ora ta yega, sí el a yega kaba, ku lo plama boso for di otro, kada hende den direkshon di su mes kas i boso lo laga Mi so. Ma Mi no ta Mi so, pasobra Tata ta huntu ku Mi. 33Mi a bisa boso tur e kosnan akí pa boso tin pas den Mi. Na mundu boso lo pasa den tribulashon; ma tuma kurashi, Ami a derotá mundu!’#Romanonan 8:37; 2 Korintionan 2:14; Revelashon 3:21; 5:5
Currently Selected:
Huan 16: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013