Markus 15
15
A gene Jeso Pilatus ndwara se ya
(Mat 27:1-2,11-14, Luk 23:1-5, Yoh 18:28-38)
1Cya̰wak vḛ, naa ge ke tuwaleya ma ga̰l ma, ne naa ga̰l ma, ne naa ge njaŋgeya ma, ne Yuda ma naa ga̰l ge kun sarya ma, a ke koteya. Swaga ge a ne vwá na, a gene na ya hon Pilatus. 2Pilatus ele na go: «Mo gan ge Yuda ma ne ne’a?» Gwan ne na janna go: «Mo jya̰ ne!» 3Naa ge ke tuwaleya ma ga̰l ma ka e fare ma gḛ gḛ na pal. 4Pilatus gwan ele na go: «Mo gwan ne fare janna to’a? Za̰ fare ge a ne e mo pal ma gale!» 5Amma Jeso gwan ne fare janna to bat. Pilatus ke ajab.
Sarya kunna ge siya Jeso pal
(Mat 27:15-26, Luk 23:13-25, Yoh 18:39—19:16)
6Ge vḛso Paska go ɗaɗak, dol ndu ne daŋgay zi digi ɗu, na ge ɓase ma ne ɓyare na. 7Swaga mbe go, ndu a̰me ge a ne tol na Barabas ma ne na kaam ma ne daŋgay zi, ne a ne ɗage ne fare digi suwal diŋ pe, a hṵ siya no. 8Ɓase ma mbo ya Pilatus diŋ a jan na go na ho̰ bama kaŋ ge na ne ha̰le hon bama na. 9Pilatus ele nama go: «Aŋ ɓyare go mbi dó aŋ digi gan ge Yuda ma ne’a?» 10Ago kwa kwa tyatyat go, naa ge ke tuwaleya ma ga̰l ma ɓya̰ na ya uzi da ne yil pe baŋ. 11Amma naa ge ke tuwaleya ma ga̰l ma e ɓase ma janna go, na dó Barabas digi. 12Pilatus gwan ele nama go: «Aŋ ɓyare go mbi ke ne na ge aŋ ne tol na gan ge Yuda ma ne da ɗaa?» 13A gwan ɗage oyya digi go: «Pé na uwara kaŋgre pal!» 14Pilatus jan nama go: «Ke ma sone ɗaa?» Amma a ka gwan puwale digi go: «Pé na uwara kaŋgre pal!» 15Ne ke ɓase ma sḛ tuli pe, Pilatus dol nama Barabas digi, e a fó Jeso ne bol, ba ɗage hon nama na, ne da pe a ba mbo pel na kaŋgre pal.
Asagar ma ka cot ta ne Jeso
(Mat 27:27-31, Yoh 19:2-3)
16Asagar ma gene na yapul diŋ ya, ndwara go bage ne dó na ndwara ne suwal pal yadiŋ. A tol asagar ma ya mwaɗak. 17A kan na ba̰r ga̰l ge káál kekeŋ, a tigi kadmul ne uwara ge kḭso, a par na na pal, 18a ɗage san na wak go: «Gan ge Yuda ma ne, i sa̰ mo wak!» 19A ka iyal na pala digi ne kereŋ, a ka sen waktwara na ta, a gur bama koo ma na ndwara se. 20Swaga ge a ne có ta ne na, a fage na ba̰r ga̰l ge káál kekeŋ uzi, a kan na na ba̰r ma na ta. A gene na ya zum, a mbo ne na mbo pella uwara kaŋgre pal.
Pella ge Jeso ne uwara kaŋgre pal
(Mat 27:32-44, Luk 23:26-43, Yoh 19:17-27)
21A set ndu a̰me ne jyatɗa ne ful zi ya, na dḭl Siman, a ndu ge suwal Siren ne, a Alezandre ma ne Rufus#Rom 16:13. bá ne, a wan na ne pool in na uwara kaŋgre. 22A gene na mbo swaga ge a ne tol na Golgota ya, ndwara go: «Swaga pala kal.» 23A hon na oyo̰r jiya̰l kirgiya ne mir na njó, amma kuri. 24A pel na uwara kaŋgre pal, a var ta na ba̰r ma ne baare uusiya ta, ndwara kwa go ndu ge daage ɓol ma̰ da de#Kmb 22:19.. 25Gyala wak horom ndaar, a pel na uwara kaŋgre pal. 26Njaŋgeya ge ne ŋgay kaŋgeya ge na ne njaŋge go: «Gan ge Yuda ma ne.» 27A pél syala ma azi na ziyar go, ɗu na tok matoson pal, ɗu na tok magul pal me. [28A go no fare ge ne njaŋge ne maktub zi wak wi no, jya̰ go: «A isi na naa ge sone ma buwal zi.»]#15:28 Swaga mbe no ne maktub ge zaŋgal a̰me ma zi to, a he na ma̰ da ne Luka zi. Ndi Luk 22:37, Isa 53:12.
29Naa ge ne kale ma ka sal na, a ka pisigi bama pala ma#Kmb 22:8., a ka jan go: «Mo ge ne gul zok ge mbegeya se, mo ba sin na digi dam ge ataa ma pul zi, 30ma̰ tene ɗaŋ, ka̰ mo koo ne uwara kaŋgre pala digi ya se!» 31Go no me, naa ge ke tuwaleya ma ga̰l ma, ne naa ge njaŋgeya ma ka ke ta kalam janna go: «Má naa, day má tene to! 32Kris, gan ge Israyela ne, ka̰ mo koo ne uwara kaŋgre pala digi ya se, go no i ba kwa, i ba hon fareba me!» Nama ge a ne pé nama dagre ne na ma, a ka sal na me.
Suya ge Jeso ne
(Mat 27:45-56, Luk 23:44-49, Yoh 19:28-30)
33Ne gyala pala go tek ɗiŋ mbo gyala tok gasamal, tṵ dibi suwar pet. 34Le gyala tok gasamal, Jeso oy ne ka̰l ndaar, jan go: «Eli, Eli, Lama sabaktani?» Na sḭ go: «Dok ge mbi ne, Dok ge mbi ne, kyaɗa mo ba dol mbi uzi ɗaa#Kmb 22:2.?» 35Naa ge a ne ka swaga mbe go ma mbut, a za̰ na, a jan go: «Ndi, tol Eliya!» 36Ndu a̰me sya, mbo par ba̰r oyo̰r jiya̰l ge ka̰mul pal, fiŋli na kereŋ wak zi, hon na njotɗa#Kmb 69:22., jan go: «Ya̰ me jyan! Nee ndi gale, tamekyala Iliya ma̰ mbo ya fage na ya se!» 37Jeso gwan oy ne ka̰l ndaar, su. 38Ba̰r zok pul ge ne zok ge mbegeya zi#Wat 26:31-33. taabe tene se ne digi ya cat mbo ya pe se. 39Asagar ma ga̰l ge ne mḛ swaga mbe go, ne na ndwara ŋga, swaga ge ne kwa go na su go ɗe, jan go: «Fareba ndu mbe Dok vya ne!» 40Naa zaab a̰me ma mḛ zum ya cat, a ka ndil na. Maryam ge suwal Magdala ne, ne Maryam ge Yakub ge jyale ma ne Yose ná, ne Salome me, a ka nama buwal zi. 41Swaga ge ne ka Galile go, naa zaab mbe ma ka kare na pe, a ka ke temel ma hon na me, poseya ne naa a̰me ma gḛ ge a ne nama ne mbo ya Ursalima go ma.
Eya ge Jeso ne táál zi
(Mat 27:57-61, Luk 23:50-56, Yoh 19:38-42)
42Swaga ge swaga ne ke gasamal, ne jo̰ ka dam nṵsi vḛso, ndwara go dam ge ne dam ɗigliya ndwara zḛ ɗe, 43Yusuf, ndu ge suwal Arimate ne, na ge ne ka naa ga̰l ge gak ma buwal zi, na sḛ ka jobre muluk ge Dok ne me, wan na dulwak, mbo ɓol Pilatus na ho̰ na Jeso duur. 44Swaga ge Pilatus ne za̰ go Jeso su go ɗe, ke ajab. Tol asagar ma ga̰l ya, ele na go Jeso su da ne titi ɓa de. 45Swaga ge asagar ma ga̰l ne wan na fare pe, hon Yusuf na duur. 46Swaga ge Yusuf ne yá ba̰r mbul siya, fage na ne uwara kaŋgre pala digi ya se, worge na ba̰r mbul siya zi, mbo e na táál siya ge a ne á na njal zi zi. Viŋgri njal na wak go. 47Maryam ge suwal Magdala ne, ne Maryam ge Yose ná, a ka kwa swaga ge a ne e Jeso go.
Currently Selected:
Markus 15: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.