Markus 14
14
Yuda ma ga̰l ma ɓyare viya̰ ge hun Jeso
(Mat 26:1-5, Luk 22:1-2, Yoh 11:47,49,53)
1Dam ga azi ge naa ke vḛso Paska ma ne vḛso ge katugum ge be jiya̰l hore ne#Wat 12:1-27., naa ge ke tuwaleya ma ga̰l ma ne naa ge njaŋgeya ma ɓyare viya̰ ge wan Jeso ne son ndwara hun na. 2A ka jan ta go: «Na ka dam vḛso go to, ne da pe na kaage ɓase ma iigi to.»
3Jeso ne suwal Betaniya go, Siman bage ne kṵ swama yadiŋ. Swaga zam kaŋzam go, gwale a̰me mbo ya ne kolbo ge albatre ne wiya ne idir ge Nar ne ge siŋli, ge ye gḛ, ɓa kolbo mbe, kan idir mbe na pala digi.
4Naa a̰me ma laar vḛne, a ka jan ta go: «Te vḛne idir mbe uzi go gyana ɗaa? 5Mbya a yat na te uzi sile waɗe kikis ataa, a var a̰se ma na.» A saŋge pore gwale mbe pal. 6Amma Jeso jan nama go: «Aŋ te iigi na gyana ɗaa? Ya̰ me na cwagat! Ke temel ge kwaɗa ne mbi pe. 7Ago aŋ da ne a̰se ma aŋ ta ɗaɗak#Dwa 15:11., kadɗa aŋ ɓyare ya, aŋ da ne pool ge ke nama kwaɗa, amma mbi ɗe, mbi ne aŋ ɗaɗak to. 8Ke kaŋ ge na ne mbya kerra, nṵsi mbi duur zḛ tek ne idir ne mbulla pe. 9Fareba mbi jan aŋ, swaga ge daage go pet ge a ne mbo oy fare ya ge dunya zi mwaɗak, a mbo ka wan na fare ge ne ke mbe pe ne vot pala pe.»
Yuda ɓyan Jeso naa tok go
(Mat 26:14-16, Luk 22:3-6)
10Yuda Iskariyot, na ge ne ka naa ge wol para azi ma buwal zi, mbo ɓol naa ge ke tuwaleya ma ga̰l ma ndwara na ba ɓyan Jeso nama tok go. 11Swaga ge a ne za̰ fare mbe no, a ke laar saal, a ke wak tuli go bama hon na bware. Yuda ka ɓyare viya̰ ge jwab ge na ba ɓyan nama na.
Kaŋzam ge vḛso Paska ne nṵsiya
(Mat 26:17-19, Luk 22:7-13)
12Dam ge zḛ ge ge vḛso ge katugum ge be jiya̰l hore ne go, na ge a ne vyan tame ne ke kaŋzam ge vḛso Paska ne pe go, na naa ge ame hateya ma jan na go: «Mo ɓyare go i mbo ke mo kaŋzam ge vḛso Paska da ɗaa?» 13Teme na naa ge ame hateya ma azi, jan nama go: «Mbo me suwal diŋ ya, aŋ ma̰ ɓol ndu a̰me ne in mam ne tóól, kare me na pe. 14Swaga ge ma̰ watɗa go, jya̰ me bageyal go: Bage hateya jan go: ‹Mbi zok gwasal ge i ne mbi naa ge ame hateya ma ba zam kaŋzam ge vḛso Paska ne zi ya da ɗaa?› 15Ge burgu digi, ma̰ ŋgay aŋ zok pul a̰a̰l, ge ne nṵsi nṵsi ne kaŋ ma pet. A swaga mbe go no, aŋ ba ke nee kaŋzam ne vḛso Paska pe.» 16Naa ge ame hateya ma mbo, a det ya suwal diŋ, a ɓol kaŋ mbe ma dimma ne Jeso ne jya̰ bama go, a ke kaŋzam ne vḛso Paska pe.
Ndu ge ne ɓyan mbi naa tok go ya aŋ buwal zi
(Mat 26:20-25, Luk 22:14, Yoh 13:21-30)
17Swaga ge swaga ne ke gasamal, a ne na naa ge wol para azi ma mbo ya. 18Swaga ge a ne ka kaŋzam wak go zamma, Jeso jan nama go: «Fareba mbi jan aŋ: ndu a̰me ɗu ne aŋ buwal zi, na ge ne zam dagre ne mbi, mbo ɓyan mbi naa tok go#Kmb 41:10..» 19A ke laar pisil, ndu ge daage ɗage jan na go: «A mbi’a?» 20Jan nama go: «A ndu a̰me ɗu ne naa ge wol para azi ma buwal zi, a na ge ne par na tok dagre ne mbi kaŋzam pal. 21Vya ge ndu ne mbo su, dimma ne a ne njaŋge ne na pal maktub zi go#Kmb 22:2-19, Isa 53., amma woo ne ndu ge ne ɓya̰ Vya ge ndu ne naa tok go pe! Golgo ndu mbe no a tol na dana to!»
Pe dolla ge ba̰a̰n ne
(Mat 26:26-29, Luk 22:15-20, 1Kor 11:23-26)
22Swaga zam kaŋzam go, hé katugum, swaga ge ne e wak busu na pal, siɗi na se, hon nama na, jan go: «Ame me, no a mbi sḛ duur ne.» 23Gwan he kop, swaga ge ne gwa̰ ne gugu hon Dok, hon nama na, nama sḛ ma pet a njot na. 24Jan nama go: «No a mbi swama ne, swama ge wak tuli ne, na ge ne ka̰ se ne naa gḛ pe. 25Fareba mbi jan aŋ, mbi mbo gwan njot oyo̰r jiya̰l ne go̰r go to bat, diŋ mbi mbo gwan njot na dḛ muluk ge Dok ne zi ya.»
26Swaga ge a ne mbá kaŋ, a zut mbo njal olive pala digi ya. 27Jeso jan nama go: «Aŋ mbo det mwaɗak, ago a njaŋge go: ‹Mbi mbo iyal bage koy tame ma, tame ma mbo ɓarse se#Zak 13:7..› 28Amma swaga ge mbi ne mbo tan ya digi, mbi mbo mbo aŋ ndwara zḛ Galile ya.» 29Bitrus jan na go: «Ko mo ka kaŋ syal koo ne naa pe pet puy, mo mbo kat kaŋ syal koo ne mbi pe to bat.» 30Jeso jan na go: «Fareba, mbi jan mo, ɗaal mbe no zi, ge baare tó fyaso ndwara azi, mo ma̰ njuɗi mo wak go mo kwa mbi to ndwara ataa.» 31Amma gwan ndage na ka̰l digi janna go: «Ko na ka go mbi su poseya ne mo puy, mbi ne pool njuɗi mbi wak go mbi kwa mo to to bat.» Naa ge may ma pet jan go me.
Kaɗeya ge Jeso ne Jetsemani go
(Mat 26:36-46, Luk 22:39-46)
32A mbo ya swaga a̰me ge a ne tol na Jetsemani go, Jeso jan na naa ge ame hateya ma go: «Ká me go go, mbi mbo mbo ke kaɗeya.» 33Abe Bitrus ma, ne Yakub, ne Yohanna ma ya na pe go, ɗage ɓol laar pisil ne iigiya ge be to. 34Jan nama go: «Mbi sḛ wanna kḭḭmi ɗiŋ mbo siya zi. Ka me go go, ka me yaŋyaŋ.» 35Abe tene uzi ya kaal nde, gur na koo se, ka kaɗeya go, kadɗa na day day, swaga mbe na kale ne na pal uzi. 36Jan go: «Abba, Báá, ne mo ta kaŋ ma pet a day day, hé kop mbe ne mbi pal uzi nde. Na ka be laar ɓyareya ge mbi ne to, amma laar ɓyareya ge mo ne!» 37Gwan ya, ɓol nama ne fí dam, jan Bitrus go: «Siman, mo fí dam’a? Mo ne pool ge kat ne mo ndwara swak to’a? 38Ka me yaŋyaŋ, ke me kaɗeya, ne da pe, na kaage aŋ dé pe herra zi to. O̰yom vḭ vin, amma duur taŋgay.» 39Gwan abe tene uzi ya nde, ke kaɗeya, ka gwan dwage fare ge ɗu mbe janna. 40Gwan gwan’a uwale, set nama ne fí dam, nama ndwara fa̰ ma kat ge be ge gwan hage digi to. A gwan ɓol fare ge janna to. 41Gwan gwan’a ge ndwara ataa, jan nama go: «Fí me dam, ɗigli me ta ɗaŋ! Swaga mbyat go! Ndi me, ler ge a ɓyan Vya ge ndu ne naa ge sone ma tok go yan ja. 42Ɗage me digi, mbo me nee! Ndi, bage ne ɓyan mbi naa tok go ne yan ja no.»
Wanna ge Jeso ne
(Mat 26:47-56, Luk 22:47-53, Yoh 18:3-12)
43Ne swaga jan fare go gale, ndi Yuda, ɗu ne nama ge wol para azi ma buwal zi, yan’a poseya ne naa gḛ na pe go, ne kasagar ma ne calaŋ ma bama tok go. A naa ge ke tuwaleya ma ga̰l ma, ne naa ge njaŋgeya ma, ne ga̰l ma teme nama ya ne. 44Na ge ne ɓyan Jeso naa tok go, jya̰ nama zḛ tek go: «Ndu ge mbi ma̰ abe na ya zi ne so̰meya, a na ne! Wá̰ me na, gene me na, koy me na zi kwaɗa!» 45Swaga ge Yuda ne ya̰ ya, mbo ya na ta, tol na: «Rabbi!» Abe na nà sḛ zi. 46A e tok na pal, a wan na. 47Ndu a̰me ɗu ge ne ka swaga mbe go, pwat na kasagar, fete kep tuwaleya dore togor uzi. 48Jeso her fare, jan nama go: «Aŋ zu ya ne kasagar ma ne calaŋ ma mbo ya wan mbi dimma ne naa ne yan syala pe go. 49Mbi te va ya go dam ne dam katɗa aŋ zok ge mbegeya zi hate naa, aŋ te wa̰ mbi to kyaɗa? Kaŋ mbe ma pet a dé ya kerra, ne da pe fare njaŋgeya ma wak wi.» 50Swaga mbe go, naa pet, a ya̰ na, a syat bama pe so. 51Vya dore a̰me ka kare na pe, ka da ne ba̰r larra na ta gagak. A ɓyare wan na, 52amma sot na ba̰r mbe nama tok ya, syat na pe so suli.
Jeso, Yuda ma ga̰l ma ndwara se
(Mat 26:57-68, Luk 22:54-55,63-71, Yoh 18:13-14,19-24)
53A gene Jeso mbo kep tuwaleya diŋ ya. Naa ge ke tuwaleya ma ga̰l ma, ne naa ga̰l ma, ne naa ge njaŋgeya ma, a kote ya pet swaga mbe go. 54Bitrus ka kare na pe ne kaal ya, ɗiŋ mbo ya kep tuwaleya yapul diŋ. Kat naa ge koy zok wak ma ta uwal ol.
55Naa ge tuwaleya ma ga̰l ma ne Yuda ma naa ga̰l ge kun sarya ma, a ka ɓyare viya̰ ge e fare Jeso pal, ndwara go bama ba hun na. Amma a ɓol fare a̰me to bat. 56Ne jo̰ naa gḛ a ka ke sayda ge hale na pal puy ɗe#Kmb 27:12, 35:11., nama fare mbe ma ɓan digi to bat. 57Naa a̰me ma ɗage digi ke sayda ge hale na pal janna go: 58«I za̰ na janna go: ‹Mbi mbo gul zok ge mbegeya ge naa dasana ma ne sḭ na mbe no se, dam ge ataa ma pul zi, mbi mbo gwan sin ge ɗogle digi, na ge naa dasana ma ne sḭ na ne to›.» 59Ge fare mbe no pal puy ɗe, nama fare ma ɓan digi dagre to bat. 60Kep tuwaleya ɗage digi mḛya ɓase ma buwal zi, ele Jeso go: «Mo gwan ne fare janna ge fare ge naa mbe ma ne jan mo pal to’a?» 61Amma kat wak ɗamal, gwan ne fare a̰me janna to. Kep tuwaleya gwan ele na go: «Mo Kris, Dok ge ne mbya uwareya vya ne’a?» 62Jeso jan go: «Mbi na ne! Aŋ mbo kwa Vya ge ndu ne katɗa Bage pool pet tok matoson pal, ne gwanna ge na ne ya pḭr ge ne digi zi ya pal#Kmb 110:1, Dan 7:13..» 63Kep tuwaleya taabe na ba̰r ne na ta uzi, jan go: «Ne gwan ɓyare ma sayda pe iya ɗaa? 64Aŋ za̰ na sáso salla ge ne sal Dok ya go. Aŋ dwat gyana?» Nama sḛ ma mwaɗak a kun sarya na pal go na mbya suya#Lev 24:16.. 65Naa a̰me ma ɗage sen waktwara na ta, a vwal na ndwara zi, a ka iyal na, a ka jan na go: «Jya̰ i gale, a wuɗi iya mo ne ɗaa?» Naa ge koy viya̰ wak ma ka yar na#Isa 50:6..
Wak njuɗiya ge Bitrus ne
(Mat 26:69-75, Luk 22:56-62, Yoh 18:15-18,25-27)
66Swaga mbe go, Bitrus ne katɗa yapul zum, kep tuwaleya kale a̰me mbo, 67kwa Bitrus ne uwal ol, ndil ɗeer, jan na go: «Mo me, mo ka dagre ne Jeso, ndu ge suwal Nazaret ne.» 68Amma njuɗi na wak, jan go: «Mbi kwa, mbi wan fare ge mo ne jan mbe pe to.» Mbo viya̰ wak ya, baare tol fyaso#14:68 Maktub ge zaŋgal a̰me ma jan fare ge baare tol fyaso ne to., 69Kale mbe kwa na, gwan ɗage jan naa ge a ne ka swaga mbe go ma go: «Ndu mbe no ya nama buwal zi!» 70Gwan njuɗi na wak uwale. Ta swak, nama ge a ne ka swaga mbe go ma gwan jan Bitrus go: «A fareba mo ya nama buwal zi, ago mo Galile ne!» 71Ɗage guni tene ne kaŋ tolla na pal, ka janna go: «Mbi kwa ndu ge aŋ ne jan na fare mbe no to bat!» 72Swaga mbe go, baare gwan tol fyaso ge ndwara azi. Bitrus dwat ne fare ge Jeso ne jya̰ na go: «Zḛ ge go baare tó fyaso ndwara azi, mo ma̰ njuɗi mo wak go mo kwa mbi to ndwara ataa.» Par na wak fyaso.
Currently Selected:
Markus 14: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.