2 Cronicas 4
4
Dagiti Alikamen ti Templo
(1 Ar. 7:23-51)
1Nagpaaramid#Ex. 27:1-2. ni Ari Solomon iti kuadrado nga altar a bronse: 30 a kadapan ken 15 a kadapan ti kangatona. 2Nangaramid pay iti tangke a sinan-taaw a bronse a nagbukel. Pito ket kagudua a kadapan ti kaunegna, 15 a kadapan ti kalawana ken 45 a kadapan ti aglawlawna. 3Iti aglikmut iti akinruar a ngarab ti tangke, adda dua a kaintar nga arkos a nagtinnuon. Sinan-toro a baka dagitoy nga arkos ket naisukogda iti tangke. 4Naisaad ti tangke iti bukot dagiti 12 a sinan-toro a baka a nakasango iti ruar. Tallo ti nakasango iti amianan, tallo iti laud, tallo iti abagatan ken tallo iti daya. 5Tallo a pulgada ti kapuskol ti tangke. Kasla ngarab ti kopa ti ngarab ti tangke, ket nagsalumpayak a kasla sabong. Aglaon ti tangke iti 15,000 a galon. 6Nangaramidda#Ex. 30:17-21. met iti sangapulo a palanggana. Lima ti maikabil iti akin-abagatan a paset ti Templo, ket lima iti akin-amianan. Mausarda a pangbuggoan kadagiti paset ti animal a daton a mapuoran. Pagbuggo dagiti papadi ti danum iti tangke.
7-8Nangaramidda#Ex. 25:31-40; Ex. 25:23-30. iti sangapulo a kandelero a balitok a nasukog a kas iti sigud a pagtuladan. Nangaramidda pay iti sangapulo a lamisaan a naikabil iti kadakkelan a kuarto ti Templo. Lima a kandelero ken lima a lamisaan ti naikabil iti agsumbangir. Nangaramidda met iti 100 a malukong a balitok.
9Nangaramidda iti akin-uneg a paraangan a pagyanan dagiti papadi ken maysa nga akinruar a paraangan. Nakalupkopan iti bronse dagiti rikep dagiti ruangan nga adda iti nagbaetan dagiti dua a paraangan. 10Naikabil ti tangke iti asideg ti akin-abagatan a daya a suli ti Templo.
11-16Nangaramid pay ni Huramabi kadagiti banga, pala ken malukong. Lineppasna amin nga alikamen nga inkarina ken ni Ari Solomon nga agpaay iti Templo:
Dua nga adigi
Dua a sinan-malukong a paratok dagiti adigi
Dagiti arkos a nalagalaga a kawar kadagiti paratok
Uppat a gasut a bronse a sinan-granada a naurnos iti dua nga intar iti likmut ti arkos ti tunggal paratok
Dagiti sangapulo#11-16 sangapulo; Iti Hebreo, inaramidna. a kariton,
Dagiti sangapulo a palanggana
Ti tangke a sinan-taaw
Dagiti 12 a sinan-toro a baka a nagbatayan ti tangke
Dagiti banga, pala ken tenedor
Inaramid ni Huramabi amin dagitoy nga alikamen.#11-16 amin…alikamen, kuna ti maysa a kadaanan a patarus. Iti Hebreo, amin nga alikamenda. Inaramidna dagitoy iti napasileng a bronse kas imbilin ni Ari Solomon a maaramat iti Templo ni Yahweh.
17Pinaaramid amin dagitoy ni Ari Solomon iti pagpandayan nga adda iti nagbaetan ti Succot ken Zaretan, iti Tanap ti Jordan. 18Nakaad-adu ti naaramid ket awan ti makaammo no mano ti pakadagupan ti kadagsen ti bronse a nausar. 19Nagpaaramid pay ni Ari Solomon kadagiti balitok nga alikamen ti Templo: ti altar, dagiti lamisaan a pakaisaadan dagiti tinapay a maidatag iti Dios; 20dagiti kandelero ken dagiti pagsilawan a naaramid iti kasayaatan a balitok a mapasgedan iti sangoanan ti Kasantoan a Disso, kas naituding a maaramid; 21dagiti arkos a sinan-sabong, dagiti pagsilawan ken dagiti sipit; 22dagiti pagarsangan, dagiti malukong, dagiti alikamen a maaramat iti panagpuor iti insenso ken dagiti palanggana a pagkargaan kadagiti beggang. Naaramid amin dagitoy iti puro a balitok. Nakalupkopan iti balitok dagiti akinruar a ridaw ti Templo ken dagiti ridaw ti Kasantoan a Disso.
Currently Selected:
2 Cronicas 4: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society