1 Juan 3
3
Teyta Diospa wamrankuna kanqantsik
1¡Käyikuyë! ¡Teyta Dios alläpam kuyamantsik! Kuyamarnintsikmi <<wamräkunam kayanki>> nimantsik.#Juan 1.12. Rasunpam wamrankuna këkantsik. Wamrankuna kashqantsiktaqa Teyta Diosta mana chaskikuq nunakuna manam käyiyantsu. Tsënö käyiyantsu Teyta Diosta mana reqirmi.
2Kuyë wawqikuna y panikuna, Teyta Diospa wamran kashqantsikta kanan musyarpis manam musyantsikraqtsu imanö kanantsikpaq kashqanta. Tsënö këkaptinpis musyantsikmi Jesucristo kutimuptin pëwan tinkur kikin niraqman tikrarinantsikpaq kashqanta.#Fil. 3.21. 3Tsënö kanantsikpaq kashqanta shuyakïkarqa Jesucristo jutsannaq püru kashqannö noqantsikpis jutsannaq püru kashun.
4Pipis jutsata rurarqa Teyta Diospa leyninkunata manam cäsuntsu. 5Musyantsikmi jutsannaq kanantsikpaq Jesucristo kë patsaman shamushqanta. Pëqa manam imëpis jutsata rurashqatsu. 6Tsëmi Jesucristupa makinchö kawaqkunaqa jutsa rurëta jaqiriyan. Jutsa rurëta mana jaqiriqkunaqa manam Jesucristuta chaskiyantsu ni reqiyantsu.
7Kuyë wamralläkuna, pipis <<Teyta Diostam cäsukü>> nirqa Jesucristunömi allikunata ruranan. <<Cäsukümi>> nikar jutsata ruraptinqa yachatsiyäshushqëkita ama chaskiyëtsu. 8Jutsa rurëta mana jaqiriq kaqqa diablupa munëninchömi këkan. Diabluqa kë patsa qallashqanpitam jutsata ruran. Diablu rurashqankunata ushakätsinanpaqmi Teyta Diospa Tsurin Jesucristo shamurqan.#Heb. 2.14-15.
9Teyta Diospa wamran kaqkunaqa manam jutsata rurayannatsu, sinöqa Teyta Dios munashqannönam kawayan. Teyta Diospa wamran karmi jutsa rurëta jaqiriyan. 10Pipis jutsata rurar nuna mayinta chikirqa manam Diospa wamrantsu, sinöqa diablupa wamranmi. Tsënöpam musyantsik Diospa wamran pï kashqanta y diablupa wamran pï kayashqantapis.
Pïmëwanpis kuyanakunantsikpaq ninqan
11Juknintsik juknintsikpis kuyanakunantsikpaq kashqantaqa unëpitanam musyantsik.#Juan 13.34; 15.12. 12Ama kashuntsu Caínnöqa. Pëqa diablu munashqanta rurarmi wawqin Abelta wanuratsirqan.#Gén. 4.8. ¿Imanirtaq wanuratsirqan? Kikinpa rurëninkuna mana alli kaptin y wawqinpa rurëninna alli kaptinmi wanuratsirqan.
13Kuyë wawqikuna y panikuna, musyantsikmi jutsa ruraq nunakuna chikimashqantsikta. 14Tsënöllam musyantsik wanushqanö kashqantsikpita wiñë kawëtana tarishqantsikta. Tsëta musyantsik wawqikunawan y panikunawan kuyanakur kawakurmi.#Juan 5.24. Mana kuyakuq kaqqa wanushqanömi këkan. 15Llapanpis nuna mayinta chikiqkunaqa wanutsikuq cuentam këkäyan. Musyashqantsiknöpis wanutsikuqkunaqa manam Teyta Diospa nöpanman chäyanqatsu.
16Kuyakuq kanantsikpaqqa Jesucristo noqantsik rëkur wanushqanta käyikushun.#Juan 15.13. Noqantsikpis kuyakuq karqa nuna mayintsik rëkur wanurinantsikpaqpis listum këkashwan. 17Këkäpamashqaqa nuna mayintsik pishipakïchö këkaptin mana yanaparqa manam Teyta Dios kuyakuq kashqannötsu këkantsik.
18Kuyë wamralläkuna, janan shonqullaqa ama kuyanakushuntsu, sinöqa imëpis yanapanakur rasunpa kuyanakushun. 19Tsënö kuyanakurmi musyantsik Teyta Diospa willakïninta rasunpa chaskikushqantsikta y jutsantsikpita perdonamashqantsikta. 20Mana perdonamashqantsikta yarpashqapis pëqa shonquntsikchö llakikushqantsikta musyarmi perdonamantsik.
21Kuyë wawqikuna y panikuna, perdonashqana kashqantsikta musyëkarqa mana mantsakushpa Teyta Diosta mañakushun. 22Mandamientunkunata cäsukur pë munashqannö kawarqa imata mañakushqantsiktapis chaskishunmi.
23Teyta Diospa mandamientunmi nikan Tsurin Jesucristuman markäkunantsikpaq y juknintsik juknintsikpis kuyanakunantsikpaq.#Juan 13.34; 15.12, 17. 24Mandamientunkunata cäsurmi pëwan këkantsik y pëpis noqantsikwanmi këkan. Noqantsikwan pë këkashqanta musyantsik kachamushqan Espíritu Santuta chaskikushqa karmi.
Currently Selected:
1 Juan 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.