TIKO VOLI MAI NA LEKUTU 4
4
Tavi e Nodra na Luve i Koaca ena Mataqali Livai
1Sa kaya vei rau o Mosese kei Eroni ko Jiova, ka vaka, 2“Mo drau wiliki ira tani mada na luve i Koaca mai vei ira na Livai, ena nodra veivuvale, me vaka na veitokatoka ni nodra qase, 3ka volai ira ka tiko na nodra yabaki ni bula ena maliwa ni 30 kei na 50, ia o ira ga era rawa ni qarava na cakacaka ni Vale ni Veitavaki.#4.3 Vale ni Veitavaki; ohel: na valelaca, se vale vakacevaceva ena kena i balebale vakaiperiu; miqedas: na tikina tabu, se rumu tabu, se vale tabu (ena kena i balebale vakaiperiu). 4Oqo na nodra i tavi na luve i Koaca ena Vale ni Veitavaki: me ra maroroya na veika tabu kece sara.
5Ni sa vakarau cavu tu me lako na lewenivanua, me ratou qai curu o Eroni kei rau na luvena, ka luvata na i latilati, ka ubia kina na Kato ni Veiyalayalati; 6ka tevuka e delana na i ubi talei sa caka ena kuli-ni-manumanu, ka qai ubia yani e cake e dua na i sulu karakarawa, ka daramaka na kena i vua.
7Me ra tevuka talega e dua na i sulu karakarawa ki na dela ni teveli ni Madrai sa Dauraici, ka biuta kina na kena veleti, na disi ka boi vinaka, na i taki, na beseni, na bilo kei na kena joke; ia na Madrai sa Dauraici me sa dau tu ga kina; 8me ra qai tevuka e cake e dua na i ubi damudamu, ubia tale ena kuli-ni-manumanu talei, ka daramaka na kena i vua.
9Me ratou taura e dua tale na i ubi karakarawa, ka ubia kina na i tutu ni cina, kei na kena cina eso, na i koti ni cina, kei na kena bilo kecega ni waiwai ka solia vata kaya: 10me ra qai ubia vata na kena veiyaya ena dua na i ubi kuli-ni-manumanu, ka biuta ki na kena i lavelave.
11Me ra tevuka talega na i ubi karakarawa ena i cabocabonisoro koula ubi ena kuli-ni-manumanu, ka daramaka na kena i vua. 12Na i yaya kecega ni cakacaka sa dau taurivaki ena vale tabu, me solegi ena dua na i sulu karakarawa, ka ubi ena kuli-ni-manumanu, ka biu ki na kena i lavelave. 13Me ratou kauta tani na dravusa ni cabocabonisoro, ka ubia e delana na i sulu lokaloka; 14ia me ra qai tuva kina na kena i yaya kecega ka dau taurivaki ena veiqaravi e kea, na disi ni dravusa ni buka, na i cula, na i sivi, kei na beseni, na i yaya kecega ni cabocabonisoro; ka me ra qai ubia kece ena kuli-ni-manumanu, ka daramaka na kena i vua. 15Ni yaco mai na gauna me toki kina na keba, o ira na luve i Koaca me ra na qai kauta na veiyaya tabu ni Vale ni Veitavaki ena gauna sa ratou ubia oti kina na i yaya oqo o Eroni kei rau na luvena. Ia me ra kakua ga ni tara e dua na i yaya tabu, de ra mate kina.
Oqo na nodra i tavi na luve i Koaca ena veigauna kece sara e tosoi yani kina na Vale ni Veitavaki.
16Ia me nona i tavi o Iliesa na luve i Eroni na bete na waiwai ni cina, na ka boi vinaka me vakamai, na i madrali laukana, na waiwai ni veilumuti, ka me vakaraica talega na vale tabu kei na kena i yaya kece sa vakatabui vei Jiova.
17A sa vosa ko Jiova vei rau o Mosese kei Eroni, ka kaya, 18“Me qarauni me ra kakua ni vakarusai na nodra veivuvale na luve i Koaca ena kedra maliwa na Livai 19ni ra sa toro volekata yani na veiyaya vakatabui kece sara. Kevaka me na yaco vakakina oqo, ia me curu mada ki loma o Eroni kei rau na luvena ka lesia na nodra i tavi yadua kei na nodra i colacola. 20Ia kevaka era curu ki na vale tabu o ira na luve i Koaca, me ra kakua ni raica na veika tabu ena dua mada ga na gauna lekaleka, de ra na mate kina.”
21A sa vosa ko Jiova vei Mosese, ka kaya, 22Mo wiliki ira talega na luve i Kerisoni, mai na veitokatoka ni nodra qase kei na kena matavuvale; 23ka volai ira na turaga ka nodra yabaki ni bula tiko ena maliwa ni 30 kei na 50, o ira era rawa ni ra cakacaka ena Vale ni Veitavaki. 24Sai koya oqo na nodra i tavi na luve i Kerisoni, o ya me ra dau veiqaravi kina: 25me ra dau colata na Vale ni Veitavaki, na latilati e loma ni vale tabu, ka vakakina na kuli-ni-manumanu ka i ubi e cake ni i lati ni katuba ni Vale ni Veitavaki, 26kei na i sulu ni bai ni rara, na i sogo ni katuba ni bai ka volita na vale tabu kei na i cabocabonisoro, na kedra dali kei na i yaya kecega sa dau vakayagataki. Oqo me nodra i tavi kece sara me vaka sa vakaroti. 27Ena lewa o Eroni kei rau na luvena na nodra cakacaka kecega na luve i Kerisoni, ena nodra i colacola kei na veika kecega me ra cakava; ia mo lewa na i votavota ni i colacola me ra colata. 28Oqo na nodra i tavi na veimataqali ni luve i Kerisoni ena Vale ni Veitavaki, ia me lewa na nodra cakacaka o Icama na luve i Eroni na bete.
29“Mo wiliki ira na luve i Mirari vakavuvale kei na veitokatoka ni nodra qase; 30o ira ka sa tolusagavulu na nodra yabaki ni bula ka lako cake, ka yacovi ira sa yabaki limasagavulu, o ira kecega ka rawa ni vakaitavi ena Vale ni Veitavaki. 31Ia oqo na veika sa lesi vei ira me ra colata: na i tavi me ra qarava vakatabakidua ena Vale ni Veitavaki: me ra colata na feremi ni vale, na kena kau balavu, na kena duru kei na i qaso ni duru, 32ka vakakina na duru ni bai sa volita na bai, na kedra i qaso, na kena i vakadei, na kena dali, na kena i yaya kecega, kei na veitikidra lalai kecega. Na tamata yadua me lesi vei ira na i yaya me ra colata. 33Oqo na nodra i tavi taucoko na veimataqali ni luve i Mirari ena Vale ni Veitavaki, ka me lewai ira o Icama na luve i Eroni na bete.”
Wiliki na Nodra Kawa na Livai
34Ia o Mosese, kei Eroni, kei ira na turaga ni Isireli, era sa wiliki ira na tagane mai vei ira na luve i Koaca, ena nodra veivuvale, kei na veitokatoka ni nodra qase. 35Oqo me vakatekivu mai vei ira ka tiko na nodra yabaki ni bula ena maliwa ni 30 ki na 50, o ira kecega sa rawa ni yaga ena cakacaka ni veiqaravi ena Vale ni Veitavaki. 36Na kedra i wiliwili, ena nodra veivuvale, era sa lewe 2,750. 37Oqo na kedra i wiliwili ena nodra veimataqali na luve i Koaca, o ira kecega sa cakacaka ena Vale ni Veitavaki. E a wiliki ira o rau o Mosese kei Eroni me vaka na i vakaro i Jiova vei Mosese.
38Na kedra i wiliwili na tagane era luve i Kerisoni, ena nodra veivuvale kei na veitokatoka ni nodra qase, 39o ira e tiko ena maliwa ni yabaki 30 ki na 50, ka rawa ni yaga ki na cakacaka ena Vale ni Veitavaki; 40na kedra i wiliwili ena nodra veivuvale kei na veitokatoka ni nodra qase, era sa lewe 2,630. 41Sai koya oqo na kedra i wiliwili na veimataqali ni luve i Kerisoni, o ira kecega ka ra cakacaka ena Vale ni Veitavaki. A wiliki ira o Mosese kei Eroni, me vaka na i vakaro i Jiova.
42Na kedra i wiliwili na tagane era luve i Mirari, ena nodra veivuvale kei na veitokatoka ni nodra qase, 43o ira e tiko ena maliwa ni yabaki 30 ki na 50, o ira kecega ka rawa ni veiqaravi ena cakacaka ni Vale ni Veitavaki, 44era sa lewe 3,200. 45O ira oqo sa wiliki ira o Mosese kei Eroni, me vaka na i vakaro i Jiova vei Mosese.
46O ira kecega na luve i Livai sa wiliki oti, ka wilika o Mosese kei Eroni kei ira na turaga ni Isireli, ena nodra veivuvale kei na veitokatoka ni nodra qase, 47o ira e tiko ena maliwa ni yabaki 30 ki na 50, o ira kecega ka rawa ni veiqaravi ena cakacaka ni Vale ni Veitavaki, 48era sa lewe 8,580. 49Era sa volai na tamata yadua me vaka na i vakaro i Jiova vei Mosese; ka ra wasei ki na nodra veicakacaka yadua ni veiqaravi se cola i yaya, oqo me vaka sa vakarota vei Mosese ko Jiova.
Currently Selected:
TIKO VOLI MAI NA LEKUTU 4: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.