TIKO VOLI MAI NA LEKUTU 5
5
Tamata Tawa Savasava
1A sa kaya vei Mosese ko Jiova, 2“Mo vakarota vei ira na Isireli me ra kauti ira tani mai na i tikotiko o ira kecega na tauvi vukavuka, o ira na tauvi turi, kei ira kecega sa sega ni savasava ena vuku ni nodra veitaratara kei na yagomate. 3Mo ni kauti ira tani talega na tagane kei na yalewa sa tawa savasava, me ra kakua kina ni vakadukadukalitaka na i tikotiko, ka oqori na vanua au sa tiko kina ena kemudou maliwa.” 4Era sa kitaka vakakina na Isireli, ka ra sa kauti ira ki na i bili ni koro, me vaka sa kaya vei Mosese ko Jiova.
Na i Sau ni Valavala Ca
5A sa vosa ko Jiova vei Mosese, ka kaya, 6“Mo kaya vei ira na Isireli, kevaka e dua na tamata sa caka cala vei Jiova se ki vua e dua tale na tamata, 7ia me vakatusa na nona caka cala ka vakaisosomitaka lesu na kena i sau taucoko vata kei na kena tubu me ruasagavulu na pasede, ka me vakatutusa ka sausaumi vua na tamata e caka cala kina. 8Kevaka sa mate na tamata e caka cala kina, ka qai sega na wekana me sauma vua na caka cala, ia me na soli vei Jiova na i sau ni caka cala oqo ka me nona na bete. Na i sau me saumi oqo e i kuri ni sipi tagane ena vakacabori me ia kina na veibulubuluti ena vukuna. 9Na i veisolisoli tabu talega era cabora na Isireli ki vei Jiova e sa nona ga na bete ka vakacabora na i solisoli. 10Na bete yadudua e dodonu me ra ciqoma ka maroroya na veisolisoli kece sara e soli vei ira me ra vakacabora.”
Baleta na Yalewa Vakawati e Veibutakoci
11A sa kaya vei Mosese ko Jiova. 12“Mo tukuna oqo vei ira na Isireli: Kevaka sa lako vakaveitalia na watina e dua na tagane ni sa sega ni yalodina, 13kevaka sa la'ki veilasavi na yalewa oqo kei na dua tale na tagane ka vunitaka na ka oqo vua na watina, ka sa sega ni kilai oqo ka dina ga ni sa vakadukadukalitaki koya, ka sa sega ni dua me vakadinadinataka na nona cala baleta ni a sega ni tobo ena gauna sara ga e caka cala tiko kina; 14ia kevaka sa curumi koya na watina tagane na yalo ni vuvu, ka sa vuvutaki watina ni sa vakadukadukalitaki koya; se sa curumi koya na yalo ni vuvu, ka sa vuvutaki watina yalewa ka dina ga ni sa sega ni vakadukadukalitaki koya baleta ni a sega ni cala; 15me qai kauta na watina vua na bete na tagane o ya. Me kauta talega na nona i madrali na yalewa, o ya e dua na kilokaramu na valawa barile sa sega ni livi kina na waiwai se veiwaki vata kei na ferekiniseni, ni sai madrali ni veivuvutaki oqo, na i madrali ni veivakananumi, me kilai kina e dua na cala.
16Na bete me na qai kauti koya yani na yalewa ki liu ka me duri tu ena mata ni cabocabonisoro, ena mata i Jiova; 17ka me qai kauta na bete na wai sa vakatabui ena loma ni dua na kuro qele; ka taura eso na qele ena buturara ni vale tabu, ka biuta ki na wai me gaga kina. 18Me qai vakaraitaki koya na yalewa ena mata i Jiova, ka sereka na i vau ni drau-ni-uluna, ka solia ki ligana na i madrali ni vakananumi, o ya na i soro ni veivuvutaki. Me taura tu e ligana na bete na wai gaga sa kauta mai na cudruvi. 19Na bete me qai vakabubuluitaki koya na yalewa me cavuta vua na vosa ni yalayala oqo: Kevaka sa sega na tagane o drau veilasavi kaya, ia o na sega ni vakaleqai mai na cudru ni wai gaga oqo. 20Ia kevaka o sa lako vakaveitalia ka o sa vakadukadukalitaki iko baleta ni o sa veilasavi kei na dua na tagane tani, 21me qai vakabubuluitaka na yalewa o koya na bete ka cavuta vua na vosa ni cudru oqo: “Ena vakavuna ko Jiova me cudruvi na yacamu mai vei ira na kai nomu, ka vakalutuma na nomu kato ni gone, ka vakavucera na ketemu. 22Na wai oqo me na curu ki ketemu me la'ki vakavuna na kena vuvuce, ka o na sega tale vakadua ni vakaluveni.”
Me na qai kaya na yalewa, “Au sa vakadinata na noqu cala; io me yaco vakakina na lewa i Jiova.”
23Ia me vola na bete na vosa ni cudru oqo ena kena i vola, ka me qai bokoca laivi tale e loma ni wai gaga. 24Me na qai gunuva na yalewa o ya na wai gaga ni veicudruvi; ia na wai oqo ena vakavuna na mosi rarawa ena gauna e curumi koya kina. 25Me taura talega na i madrali ni veivuvutaki o koya na bete mai na ligana na yalewa, ka laveta cake vei Jiova, ka kauta cake yani ki na i cabocabonisoro; 26ka me qai yakuta eso na i madrali na bete, me kena i vakananumi, ka vakama ena dela ni cabocabonisoro, ka qai vagunuva sara na yalewa ena wai.
27Ni sa vagunuva oti na yalewa ena wai, na veika oqo ena qai yaco: Kevaka sa vakadukadukalitaki koya dina ni sa caka cala vua na watina, na wai ni cudru sa gunuva ena vakavuna na mosi kei na rarawa levu, na vuvuce ni ketena, kei na vakaleqai ni tikina tabu vakayalewa. Ena dau vakasisilataki ka cudruvi mai vei ira na kai nona. 28Ia kevaka sa sega ni vakadukadukalitaki koya ka sa savasava ga, ena qai vagalalataki, ka na rawa ni kunekune me vakaluveni tale.
29Oqo na lawa virikotori ni sa yaco na veivuvutaki kevaka sa dua na yalewa vakawati sa lako vakaveitalia ka veilasavi kei na tagane tani, ka vakadukadukalitaki koya kina, 30se ni sa curuma e dua na tagane na yalo ni vuvu, ka sa vuvutaki watina; ia me qai vakaraitaki yalewa ena mata i Jiova na bete, ka me vakayacori vua na i vakaro kece oqo. 31Na tagane vakawati sa vagalalataki mai na cala oqo, ia na yalewa, kevaka sa vakadinadinataka na nona cala, ena sotava na i sau ni nona i valavala ca.
Currently Selected:
TIKO VOLI MAI NA LEKUTU 5: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.