2 KORINICA 11
11
O Paula kei Ira na i Apositolo Lasu
1Au kerea mo ni vosoti au me'u tei vosa tiko mada me vaka na lialia. 2Au sa vuvutaki kemuni me vaka na vuvu vakalou. Au sa soli kemuni vei Karisito me vaka na watina savasava e dua na tagane. 3#Vteki 3.1-5,13Ia na ka au leqataka sai koya na nona a vakacalai Ivi na gata ena nona qaseqase; de na qai vakacalai talega na lomamuni mai na kena savasava kei na kena yalodina vei Karisito. 4Ni o ni sa vakadonuya mo ni ciqoma ena marau na lako mai nei koya sa vunautaka e dua tani tale na Jisu mai na kena keitou a vunautaka. O ni sa ciqoma talega e dua tani tale na i tukutuku vinaka mai na kena o ni a sa ciqoma.
5Au nanuma ni'u sega ni lailai sobu vei ira na i apositolo lasu oqori. 6E dina beka ni'u sega so ni matai ena vosa, ia sa tu vei au na vuku. Keitou sa vakamatatataka na ka oqo vei kemuni ena veigauna kecega kei na veisala kecega.
7Au sega ni bau tukuna vei kemuni mo ni saumi au ena noqu vunautaka na i Tukutuku Vinaka vei kemuni. Au a vakalolovirataki au mo ni cecere cake kina. E i valavala ca li o ya? 8Ena gauna ka'u a veiqaravi voli kina vei kemuni, era a saumi au ena cakacaka oqori na i soqosoqo lotu tale eso. E vaka ga ni'u sa butako mai vei ira, ia me rawa kina ni'u vukei kemuni. 9#Fpai 4.15-18Ia ena gauna ka'u a tiko kina kei kemuni, au a sega ni bau vakaoga e dua ena gauna ni noqu leqa, baleta ni ra sa kauta mai vei au na ka kecega o ira na wekada era lako mai Masitonia. Sa i koya oqo au sa sega ni vakaoga kina e dua; ka'u na sega talega kina ni vakaogai kemuni ena dua na ka. 10Me vaka na dina i Karisito sa tu vei au, au na sega kina ni galu me'u cibitaka na ka oqo e Kirisi taucoko. 11Au sa kaya li oqo baleta ni'u sa sega beka ni lomani kemuni? Sa kila ga na Kalou na noqu lomani kemuni!
12Au na cakava tikoga na ka au sa cakava tiko oqo, me'u tarovi ira kina na i apositolo tale eso mai na nodra vakalevulevui ira kei na nodra tukuna voli ni sa tautauvata ga na nodra veiqaravi vata kei keitou. 13Era sai apositolo vakailasu o ira era vakaoqo, era sa tamata dauveivakaisini ka lasutaka ni ra i apositolo i Karisito. 14Sa sega ni ka veivakurabuitaki oqo. O Setani sara mada ga e rawa me vukici koya me vaka e dua na agilosi ni rarama. 15Sa sega kina ni ka veivakurabuitaki ke ra vukici ira na nona dauveiqaravi me ra vaka na i talatala ni valavala dodonu. Ia ena gauna mai muri era na taura ga na i sau dodonu ni nodra i valavala.
Na Veika Rarawa e Sotava o Paula me Vaka e Dua na i Apositolo
16Au sa kaya tale kina: me kakua ni dua e nanuma ni'u sa lialia oi au. Kevaka o ni nanuma ni vakakina, mo ni okata mada ga me'u sa lialia ka me'u bau dokadokai au kina vakalailai. 17Ia na ka au tukuna tiko oqo, e sega ni ka e vinakata na Turaga me'u kaya, ia au dokadokai au me vaka na lialia. 18E vuqa na tamata era boletaka na veika vakavuravura, ia sa vaka talega kina oi au. 19O ni sa vuku, ia o ni sa vosoti ira tu na lialia ena marau. 20O ni vosota ke dua e vakabobulataki kemuni, se vakadravudravuataki kemuni, se coriti kemuni, se beci kemuni, se sabica na balumuni. 21Au kaya ena noqu madua, keitou rerevaka ni cakava na ka o ya.
Ia ke dua na tamata e via boletaka e dua na ka — ni'u sa vosa vakaoqo me vaka na lialia — au na boletaka talega na ka vata ga o ya. 22Era sa Iperiu li? Au sa Iperiu talega. Era sa luve i Isireli li? Au sa luve i Isireli talega. Era sa kawa li nei Epara-ama? Au sa kawa talega nei Epara-ama. 23#Caka 16.23Era sai talatala beka li nei Karisito? Au vosa tiko me vaka e dua na lialia, ia au sa uasivi cake vei ira. Au cakacaka vakalevu cake, au biu vakalevu ki vale ni veivesu, au a kanakuita vaka vuqa sara, ka'u voleka ni mate ena vuqa sara na gauna. 24#Vrua 25.3Era a vakanakuitataki au vakalima na Jiu ka tau vaka ya tolusagavulukaciwa. 25#Caka 16.22; Caka 14.19Era vakanakuitataki au vakatolu na kai Roma ka bau vakaviriki vakadua ena vatu. Au vosota vakatolu na kasa ni waqa, ka dua na siga ka dua na bogi na noqu ciri voli ena loma ni wasawasa. 26#Caka 9.23; Caka 14.5E na vuqa na noqu i lakolako au vakaleqai ena kena waluvu na veiuciwai, au vakaleqai mai vei ira na daubutako, mai vei ira na Jiu kei ira na kai matanitu tani, vakaleqai ena so na koro, ena manumanu kila eso, leqa e wasawasa kei ira na i tokani vakailasu. 27Au cakacaka ka sota kaya na veika dredre; e vuqa na gauna au sega kina ni moce, ka vaka vuqa na noqu viakana, ka viagunu. E vaka vuqa na kena dau sega tu vei au na kakana; vuqa na noqu sota kaya na liliwa kei na luvawale. 28Me kua mada ni wiliki na veika o ya; e dua na ka sa bikai au ena veisiga sai koya na noqu lomaleqataka na veisoqosoqo lewenilotu kece sara. 29Ke dua sa malumalumu, au sa vakaivotavota talega ena nona malumalumu. Ia ni dua sa bale ki na ca, au sa sinai ena rarawa.
30Ke dodonu me'u boletaka e dua na ka, au na boletaka na veika e vakaraitaka na noqu malumalumu. 31Sa kila ni'u sa sega ni lasu na Kalou na tama ni noda Turaga ko Jisu me vakavinavinakataki na yacana ka sega ni mudu. 32#Caka 9.23-25Mai Tamasiko sa via vesuki au kina na kovana nei Arita na tui e yadrava tiko na koro o Tamasiko. 33Ia au a qai vakatukutukutaki sobu ena dua na sova mai na dua na qara ni bainikoro ka dro tani yani mai vua.
Currently Selected:
2 KORINICA 11: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.