2 KORINICA 10
10
Sa Taqomaka na Nona Cakacaka o Paula
1Au sa vakamamasu yani oqo vei kemuni ena yalomalua kei na yalomalumalumu i Karisito. Oi au o Paula o koya o ni sa kaya, sa dau yalomalua ka yalomalumalumu ni tiko vata kei kemuni, ia sa dau doudou ena gauna sa tiko tani kina mai vei kemuni. 2Au sa vakamasuti kemuni mo ni qarauna me'u kakua ni doudou vakasivia ni'u yaco yani vei kemuni, ni'u sa vakadinata ni sa rawa me'u doudou vei ira era kaya ni keitou sa cakacaka voli ena gagadre vakavuravura. 3E dina ga keitou sa tiko ga e vuravura, ia keitou sa sega ni vala tiko ena dua na i valu vakavuravura. 4Na i yaragi keitou vakayagataka ena vala e sega ni yaragi vakavuravura, ia na i yaragi kaukauwa ga ni Kalou sa vakarusa na veibainivalu. 5Keitou sa vakarusa na veile lasu ka talaraka sobu na veibai cecere ni qaciqacia me voroka na kilai ni Kalou ka vagolea na veivakasama sa vesuki me talairawarawa vei Karisito. 6Ia ni sa ka taucoko na nomuni talairawarawa, keitou sa totogitaka na talaidredre kecega.
7O ni sa raica walega na ka e sau. Ke dua sa vakadinata sara ni sa nei Karisito, me kila talega o koya vaka i koya na ka oqo: oi keitou talega keitou sa nei Karisito. 8Ia au sega ni madua kevaka au sa dokadokai au vakalevu ena vuku ni neitou kaukauwa e solia vei keitou na Turaga, mo ni tarai cake kina ka sega ni vakarusai. 9Au sega ni vinakata me rairai ni vaka au vakarerei kemuni ena noqu i vola eso. 10Eso era na kaya, “Sa rui bibi ka kaukauwa na veivola i Paula, ia ni sa mai tiko sara vei keda sa malumalumu, ka sa sega ni laulau na nona vosa.” 11Na tamata e vaka o ya na nona vakasama me kila, ni ka keitou kaya ena i vola ni keitou yali e tautauvata ga kei na ka keitou kaya ni keitou tiko kei kemuni, sai koya talega na ka keitou na cakava ni keitou yaco yani vei kemuni.
Sa Sakitaki Koya o Paula ena Vuku ni Turaga
12E sega ni keitou gadreva me keitou wiliki vata se vakatautauvatataki keitou vata kei ira era dau via tukuni ira vakai ira. Na tamata era bulia ga na i vakatagedegede me ra vakarautaki ira kina, ka lewa ga vakai ira na i vakarau me ra lewai kina, era sa tamata lialia. 13Ia oi keitou, keitou sa sega ni dokadokai keitou me sivia na neitou i yalayala, ia keitou sa cava ga ena i yalayala sa solia vei keitou na Kalou, sa wiliki talega kina na cakacaka ena kemuni maliwa. 14Keitou sa sega ni sivia na neitou i yalayala ni keitou sa lako mai vei kemuni; ni sai keitou sa kauta taumada mai vei kemuni na i Tukutuku Vinaka kei Karisito. 15Ia keitou sa sega ni dokadokataka na cakacaka era sa cakava eso tale ena taudaku ni neitou i yalayala. Ia keitou sa nuitaka ga ni sa tubu cake na nomuni vakabauta, ka vakalevutaka na neitou cakacaka ena kemuni maliwa. 16Keitou na qai la'ki vunautaka kina na i Tukutuku Vinaka ki na veivanua tani tale eso, ka keitou sa na sega tale kina ni qai la'ki dokadokataka na cakacaka sa vakayacori oti tiko ena nona loma ni veiqaravi e dua tale.
17 #
Jere 9.24
Ia me vaka sa volai ena i Vola Tabu: “O koya sa vinakata me sakitaki koya, me sakitaki koya ga ena vuku ni Turaga.” 18Ni sa sega ni vinakati o koya sa tukuni koya vaka i koya, ia o koya ga sa tukuni koya na Turaga.
Currently Selected:
2 KORINICA 10: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.