1 TIMOCI 4
4
O Ira na Dauvakatavuvuli Vakailasu
1Sa tukuna vakamatata na Yalo Tabu ni ra na vuki tani eso ena gauna emuri mai na vakabauta; era na goleva ga na yalo dauveivakacalai eso kei na veivakavuvuli ni tevoro. 2E vu oqo mai na nodra dauveivakaisini na tamata lasulasu, o ira ka sa mate tu na nodra lewa-e-loma, me vaka e vakamai ena kaukamea katakata. 3Era sa vakatavuvulitaka ni tabu na vakawati kei na kena laukana na kakana eso. Ia sa bulia ga na Kalou na kakana kece oqori me ra vakayagataka o ira sa vakabauta ka kila na ka dina, ka me vakayacori oqo ni oti e dua na masu ni vakavinavinaka. 4Ni sa vinaka na veika kecega sa bulia na Kalou; sa sega na ka me beci, ia sa dodonu ga me vakayagataki vata kei na masu ni vakavinavinaka, 5ni sa vakatabui ena vosa ni Kalou kei na masu.
Na Dauveiqaravi Vinaka i Jisu Karisito
6Kevaka o solia na veivakaro oqo vei ira na veiwekani o na qai dauveiqaravi vinaka i Jisu Karisito, ka tubu cake ena vosa ni vakabauta kei na i vakavuvuli vinaka o sa dau muria. 7Kakua ni goleva na i tukuni makawa eso sa sega ni vakalou, ka sa sega ni yaga me veitalanoataki tiko. Vakarautaki iko vinaka ga ena bula vakalou. 8E tiko na kena yaga na vakaukauwa yago, ia na vakaukauwataki ni yalo sa yaga ena ka kecega, baleta ni sa yalataka na rawati ni bula ena gauna oqo kei na gauna ena muri mai. 9Sa dina na vosa oqo ka sa dodonu me vakadinati. 10Oqo na vuna keitou sa cakacaka ga kina vakaukauwa ena vosota, baleta ni keitou sa vakataudeitaka na neitou vakanuinui vua na Kalou bula, o koya na i vakabula ni tamata kecega, ka vakauasivi o ira era sa vakabauta.
11Na veika oqo mo vakarota ka vakatavuvulitaka. 12Me kakua ni dua me beci iko baleta walega ni o sa cauravou tiko, ia mo yaco mo i vakarau vei ira era sa vakabauta ena nomu vosa, ena nomu i tovo, ena loloma, ena vakabauta kei na yalosavasava. 13Mo gumatua ena wilika na i Vola Tabu vei ira na lewe vuqa, ena vunau kei na veivakavulici me yacova na noqu lako yani. 14Kakua ni weletaka na i solisoli sa tu vei iko, na veika sa soli vei iko ena parofisai kei na veitabaki ni ligadra na qase. 15Dau vakayacora na veika oqo ka solia taucoko kina na nomu dina, ka me ra raica kece kina na nomu tubu cake. 16Qarauni iko vinaka kei na nomu i vakavuvuli. Mo vakayacora tikoga na veika oqo, baleta ni kevaka o sa cakava vakavinaka vakaoqo, o na bula kina kei ira talega era sa rogoci iko.
Currently Selected:
1 TIMOCI 4: FNV
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.