Filipenses 3
3
Jesucristuman yärakur salvakunansipaq nishqan
1Wawqi panikuna, Tayta Diospa makincho kawaykarqa kushikuyay. Noqa manami ajayäsu saylata yapay yapay qelqamurpis. Sayno qelqamushqä qamkunapaq alimi kaykan.
2Lutan yachasikuqkunapita cuidakuyay. Say alqukunaqa nikäyan: <<Tayta Dios salvayäshunaykipaqqa leyninkunata cumplir cuerpuykikunataraq señalakuyay>>.
3Cuerpunsita mana señalakurpis Espíritu Santu yanapämashqami Tayta Diosta sirviqkunaqa shonqunsicho señalashna kaykansi.#3.3 Cuerpunta señalar chiwlakunanpa puntan qaranta kusurir jorquqnömi shonqunkunata señalar jusalikuyta kachariyan.#Jer. 4.4; Rom. 2.28-29; Gál. 6.15; Col. 2.11-13. Manami leykunata cumplirraqsu salvakunsi, sinöqa Jesucristuman yärakurmi.
4Leykunata cumplir salvakunansi kaptinqa noqapis leykunata cumplirmi salvaküman karqan. Noqanöqa manami pipis leykunata cumplishsu. 5Leykuna nishqannölami yurishqäpita puwaq junaqyuq kaykaptï señalayämarqan.#Lev. 12.3. Saynöpis Benjamín trïbupita kaq Israel runami kä.#Rom. 11.1. Manami mayqan hebreo mayïpis noqanöqa leykunata cumplishsu. Fariseo karmi Tayta Diospa leyninkunata imaypis cumplirqä.#Hech. 23.6; 26.5. 6Tayta Diospa shonqunpaqno ruraykashqäta yarparmi Jesucristuman yärakuqkunatapis qatikachaq kä.#Hech. 8.3; 9.1-2; 22.4; 26.9-11. Say leykuna nishqanta lapantami cumplishkä.
7Sayno cumplirmi yarparqä alita ruraykashqäta. Kananmi isanqa noqansi rayku Jesucristo wanushqanta musyar tantiyakü say cumplishqäkuna manakaqlapaq kashqanta. 8Señornï Jesucristuta reqishqämanqa manami imapis tinkunsu. Saymi nawpata rurashqäkunaman yärakunäpa trukan Jesucristumanna yärakü. Nawpata rurashqäkunaqa manami imapaqpis välimansu. 9Manami leyninkunata cumplishqäpitasu munashqanta ruraqtano Tayta Dios chaskimash, saypa trukanqa Jesucristuman yärakushqäpitami.
10Jesucristuta masmi reqiyta munä. Payta Tayta Dios munayninwan kawarisimushqanno noqatapis say munayninwan yanapämänantami munä. Saymi Jesucristo nakashqanno nakarpis y payta wanusiyashqanno wanusiyämaptinpis pay cäsukushqanno noqapis cäsukushaq. 11Saymi shuyaraykä Jesucristuta Tayta Dios kawarisimushqanno noqatapis wanukuptï kawarisimänanta.
Tayta Dios munashqanno kawanansipaq nishqan
12Manami jusaynaq ni santuna kashqätasu nikä. Saypa trukanqa Jesucristo munashqanno kawanäpaqmi waran waran yarpachakü. Sayno kawanäpaqmi Jesucristo salvamash.
13Wawqi panikuna, manaraqmi Tayta Dios munashqannösu lapanta ruraykä. Isanqa unay kawashqäta yarparänäpa trukanqa waran waranmi yarpachakü Tayta Dios munashqanno kawanäpaq. 14Premiuta chaskinanpaq yalinakur cörriqnömi noqapis Tayta Diospa nawpanman chänäpaq pay munashqanno kawaykä. Sayman chänäpaqmi Jesucristo kayninpa Tayta Dios qayamash.
15Jesucristuman shumaq yärakuqkuna, nishqäkunata tantiyakuyay. Tantiyayta mana kamäpakuyaptiki Tayta Diosmi tantiyasiyäshunki. 16Imano kaptinpis Jesucristo munashqannöla kawashun [y juk yarpayla kashun.]
17Wawqi panikuna, imano kawashqätapis rikakayämay.#1Cor. 4.16; 11.1. Noqakuna kawayashqäno kawaqkunatapis rikakuyay. 18Wakin runakunaqa mana ali kawarmi Jesucristo cruzcho wanushqanta manakaqman churayan. Sayno kayashqanta aska kutinami qamkunata nishkä. Kananpis weqïpawanraqmi wilaykä. 19Say runakunaqa Jesucristo munashqanno kawayänanpa trukan shonqun yarpashqannölami kawakuyan. Lutankunata rurayashqanpita penqakuyänanpa trukanqa sumäsiyanraqmi. Kay pasacho kawayänalanpaqmi yarpachakuyan. Paykunaqa infiernuman qaykushqami kayanqa.
20Noqansipa markansimi isanqa gloria kaykan. Saymi salvamaqninsi Señor Jesucristo gloriapita kutimunanta shuyakuykansi. 21Lapanpaq munayyuq karmi kay ushakaq cuerpunsita mushuq cuerpuman tikrasinqa. Say mushuq cuerpunsimi kikinpa cuerpunno mana ushakaq kanqa.#1Juan 3.2.
Currently Selected:
Filipenses 3: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.