Filipenses 4
4
Kushish kawanansipaq nishqan
1Kuyay wawqi panikuna, qamkunapaq imaypis yarpararmi watukaq shamuyta munaykä. Qamkunami premiuta chaskishqä corönäno kaykäyanki. Yachasishqäno kawayaptikimi japanla kushikü. Señor Jesucristo munashqanno imaypis kawayay.
2Evodiata y Síntiquitami ruwakü Señor Jesucristuta chaskikushna kaykarqa juk shonqula kawayänanpaq. 3Wilakuq mayï, qamtapis ruwämi paykunata amistasinaykipaq. Jesucristupa wilakuyninta Clementiwan y wakin wilakuq mayïkunawanpis wilakuptï say warmikuna alimi yanapäyämash. Libru de la Vïdachömi paykunapa jutinkunapis qelqaraykäyan.
4Jesucristupa makincho kawaykarqa imaypis kushikuyay. Yapaymi nï: ¡Kushikuyay!#1Tes. 5.16. 5Ali runa kayashqaykita pïmaypis musyayäsun. Señor Jesucristo kutimunqanami.
6Imapaqpis ama lakikuyaysu. Saypa trukanqa Tayta Diosta agradëcikur lapanchöpis yanapäyäshunaykipaq manakuyay.#Col. 4.2-4; 1Tes. 5.17-18. 7Sayno manakuyaptikimi Tayta Dios ali kawayta qoyäshunki. Paymi shonquykikunatapis yarpaynikikunatapis cuidanqa Jesucristuman yärakur mana lakikuyänaykipaq. Saymi imanir kushish kawayashqaykita pipis tantiyanqasu.
8Wawqi panikuna, rasun kaqkunapaq, ali ruraykunapaq y ali kawaypaq imaypis yarpachakuyay. Imapis ali kaptin o alabanansipaq kaptinqa saykunapaqpis yarpachakuyay. 9Yachasiyashqänöla, tantiyasiyashqänöla, wiyayämashqaykinöla y imano kawashqätapis rikayämashqaykinöla imaypis kawayay. Saymi imaypis ali kawayänaykipaq Tayta Dios yanapäyäshunki.
Pablo agradëcikushqan
10Wawqi panikuna, apasikayämushqaykita chaskir Tayta Diostami agradëcikü. Manaraq chaskirpis musyashkämi mana qonqaykayämashqaykita. Apasikamuyta munarpis karucho karmi kamäpakayämushkankisu. 11Manami pishïpakursu sayno nï. Imäpis kashlanwan kushish kawakuytami yachakushkä. 12Noqa musyämi rïcu kay y muchuq kay imano kashqantapis. Imano kawarpis contentakuytami yachakushkä. Saymi kushish kawaykä pacha junta karpis, mikanarpis, rïcu karpis o pobri karpis. 13Imano karpis Jesucristo yanapämaptinmi ali kawaykä. 14Sayno kaptinpis nistaykashqä höra apasikayämushqaykita chaskir fiyupami kushikushkä.
15Filipos wawqi panikuna, musyayashqaykinöpis Jesucristupa ali wilakuyninta wilakunäpaq Macedonia provinciapita aywakuptï wakin iglesiakuna mana yanapäyämaptinpis qamkunalami yanapäyämashkanki. 16Tesalónica#Hech. 17.1. markacho kaykaptïpis yapay yapaymi nistashqäkunapaq apasikayämushkanki.#2Cor. 11.9. 17Manami yapay apasikayämunaykita munarsu sayno nï, saypa trukanqa yanapäkuq kayashqaykipita mas bendicionta chaskiyänaykita munarmi.
18Epafrodituwan apasikayämushqayki lapan nistashqäkunapaq aypaptinmi imatapis pishipaküsu. Say apasikayämushqaykimi Tayta Diospaq mushkuq sacrificiuno kaykan.#Éxo. 29.18. 19Jesucristo noqansi rayku wanush kaptinmi gloriacho riquëzankunapita Tayta Dios qamkunatapis lapan munayashqaykita kamaripäyäshunki. 20¡Papäninsi Tayta Dios imaypis alabash kaykuläsun! Amén.
Carta ushanan
21Qamkuna kaqcho lapan wawqi panikunata salüdü qoykuyälanki. Noqawan kaykaq wawqi panikunapis salüduntami apasikayämun. 22Saynölami kay markacho yärakuq mayinsikunapis salüdunta apasikayämun. Mas mandaq Césarpa wayincho aruq wawqi panikunapis salüdunta apasikayämunmi.
23Señor Jesucristo lapaykita kuyapaykuyäläshunki. [Amén.]
Currently Selected:
Filipenses 4: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.