Colosenses 1
1
Carta qalaykunan
1-2Colosas markacho salvash kaqkuna:
Noqa Pablo, Jesucristupa apostolnin kanäpaq Tayta Dios churamash kaptinmi wawqinsi Timoteuwan ishkäkuna kay cartata cartakaykäyämü. Qamkuna Tayta Diospana karmi pay munashqanno kawaykäyanki. Papäninsi Tayta Dios [y Señor Jesucristo] kuyapäyäshushpayki ali kawayänaykipaq yanapaykuyäläshunki.
Tayta Diosta Pablo manakushqan
3Qamkunapaq manakur Señorninsi Jesucristupa Papänin Tayta Diostami imaypis agradëcikuyä. 4Jesucristuman shumaq yärakuyashqaykita y yärakuq mayinsikunawan kuyanakuykäyashqaykitami musyayashkä. 5Tayta Dioswan gloriacho imayyaqpis kawayänaykipaq kashqanta musyarmi sayno kawaykäyanki. Jesucristupa wilakuyninta chaskikuyashqaykipita pasami gloriacho kawayänaykipaq kashqanta musyayashkanki.
6Jesucristupa ali wilakuynin qamkunaman chämushqannömi maysaymanpis chaykan. Say ali wilakuyta chaskikurmi Tayta Dios munashqannöna kawaykäyan. Qamkunapis Jesucristupa ali wilakuyninta chaskikuyashqaykipita pasami Tayta Dios kuyapäkuq kashqanta tantiyakur pay munashqannöna kawaykäyanki.
7Say wilakuyninta chaskikuyänaykipaqqa wilakuq mayï kuyay Epafrasmi#Col. 4.12; Film. 23. wilapäyäshushkanki. Paypis Jesucristupa sirviqnin karmi shumaq tantiyasiyäshushkanki. 8Epafrasmi wilayämash Espíritu Santu yanapäyäshuptiki kuyanakur shumaq kawaykäyashqaykita.
9Sayno kawayashqaykita musyayashqä junaqpita pasami imaypis Tayta Diosta manakuykäyä Espíritu Santu yachayta qoyäshuptiki Tayta Dios munashqanno kawayänaykipaq. 10Pay munashqanno kawar y imaypis alilata rurarmi waran waran payta reqiyankipaq.
11Saynöpis manakuykäyä munayninwan yanapäyäshuptiki ima nakaycho karpis mana ajayaypa payman yärakuyänaykipaq 12y imaypis kushish agradëcikuyänaykipaqmi. Paymi salvamashkansi lapan salvashqan kaqkunawan herenciansita chaskir gloriacho kawanansipaq.
13 Satanáspa munayninpita jorqarkamashpansimi#Efe. 6.12. kuyashqan Surin Jesucristo mandaykashqanmanna Tayta Dios churamashkansi. 14Jesucristumi [yawarninta jichar] rantimashpansi jusansikunata perdonamashkansi.#Efe. 1.7.
Jesucristo lapanpitapis mas munayyuq kashqan
15Tayta Diosta mana rikarpis Jesucristuchömi pay imano kashqantapis tantiyansi.
Payqa lapan kamashqankunapaq punta yuriqmi kaykan.#1.15 Lapan kamashqankunapaq punta yuriqmi kaykan ninanqa imapis manaraq kaptinmi Jesucristuqa mayna kaykarqan ninan y Jesucristo lapanpaqpis mandaqmi kaykan ninanmi (Sal. 89.27).
16Paywanmi Tayta Dios kamarqan lapan imaykatapis:
jana pasacho kaqkunata, kay pasacho kaqkunata,
rikakaqkunata, mana rikakaqkunata
y jana pasacho lapan poderyuqkunatapis.#Efe. 6.12.
Lapantapis kamarqan Jesucristuwanmi y paypa makincho kananpaqmi.
17Imapis manaraq kaptinmi Jesucristo mayna kaykarqanna.
Lapan kamashqankunatapis munayninchömi sararaykan.#Juan 1.1-3, 18; Heb. 1.2-3.
18Jesucristumi umansi kaykan.
Noqansinami iglesian kar cuerpun kaykansi.#Efe. 1.22-23; 4.15.
Lapan wanuqkunapita Jesucristo mas puntata kawarimurmi pïmaypitapis mas munayyuq kaykan.#Hech. 26.23; Apoc. 1.5.
19Sayno munayyuq kananpaqmi Jesucristucho Tayta Dios kaykan.
20Jesucristo kayninpami kay pasacho kaqkunawan y jana pasacho kaqkunawanpis Tayta Dios amistarqan.#Efe. 2.16.
21Nawpataqa noqansipis lutan yarpayyuq karmi Tayta Diospa contran karqansi. Jusansikunami paypita rakimarqansi. 22Sayno kawaykashqami Jesucristo cruzcho wanuyninpa Tayta Dios perdonamashkansi. Saymi paypa nawpancho jusaynaq y santuna kashun.
23Nawpanman chänansipaqqa Jesucristuman imaypis yärakushun. Ali wilakuynincho nimashqansita imaypis wiyakushun. Say wilakuytaqa maysaychöpis wilakuykäyanmi. Saynölami noqapis wilakuykä wilakuqnin kanäpaq Tayta Dios akramash kaptin.
Nakarpis Pablo wilakushqan
24Mana Israel runakunata wilapashqäpita nakasiyämaptinmi Jesucristo iglesianpaq nakashqankunata cumplï. Paypa iglesianqa cuerpunmi kaykan.#Efe. 1.23. Saymi lakikunäpa trukan kushikü. 25Iglesianta sirvinäpaq Tayta Dios churamash kaptinmi#Efe. 3.2. qamkunatapis lapan wilakuyninta musyaykäsï.
26Say wilakuyninta unay runakuna mana musyash kayaptinpis kananmi isanqa Tayta Dios musyasimashkansina. 27Saymi musyansi mana Israel runakunapaqpis say wilakuy seqaypa kushikuypaq kashqanta. Say wilakuymi nikan: Jesucristo qamkunachömi kaykan. Payman yärakurmi Tayta Diospa nawpanman chäyanki.
28Saymi Tayta Dios yachayta qoyämashqan tupu Jesucristupa wilakuyninta lapan runakunata wilapar shumaq tantiyasiyä. Sayno wilakuyä Jesucristuta pïmaypis chaskikur Tayta Diospa nawpanman jusaynaqna chäyänanpaqmi. 29Sayno kananpaqmi Jesucristo munayninwan yanapämaptin imano nakarpis wilakur puriykä.
Currently Selected:
Colosenses 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.