Epeso 5
5
1Mibitedi Nuquin Papan: Cun bacuëbo nec, queshun ambi tantiaido yec aidbimbuec tantiananec tabadta. 2Nuqui tantiaquidquio Esuquidistu nec. Adquid icnuc utsibobëd tantiananec tabadta. Nuquitedi tantiaquidquio yec abided cuidadec uënëspanëdash. Adec abi uënësaid nuadte bëda shëdtequid pichicacbimbuen nasho isash Nuquin Papa: Bëdambo iquec, quepanëdash.
3Nuquin Papa tantiaquido mibitedi neque. Bëdambuec tabadta. Adecbidi chudaiduidi chiec onquesa icta. Adecbidi natemaid utsi abi bunaiduidi naquin mëmunesa nec, quequin chiec onquesa icta. Adecbidi utsina isash dadpen bedte bunquid nec, quequin chiec onquesa icta. 4Adecbidi icsambuenuidi chiec onquenda. Matsesën natemaid chiec utsibëd abembi onquenda. Adecbidi utsi icsambuenuidi chuiquin oncaisambo icta. Adecbidi bëdambuec onquequidi utsi uain chuiquin mamënshunesambo icta. Adec onquec tabadaid bëdambocquidpenquio nec. Adenquio yec: Nuquin Papa bëdambo iquec, quequin chiannec tabadta. 5Nadquido icsambo iquec. Nëidic ambi chudtemaidi chudquido. Utsibic ambi natemaid utsi naquin mëmunesabo. Utsibic ambi tantiaiduidi dadpen bunquin bedquido. Aden naquido: Ambibi nacnenash: Ubi uaquidien nec, quiacbimbuen Nuquin Papa tantiesabo nec. Aidotedi Nuquin Papan Esuquidistubëtan namiacno tabadtiapimbo iquendac.
Nuquin Papan chiacpadombuen naic tabadte chiaid
6Muaquin ambembi chiec onquiaid tantiesa icta. Adquid ambi chiacpadombuen naisa icsho Nuquin Papan cumapenen cuidendac. 7Aidobëtan icsambuen naic tabadenda.
8Ënden Esuquidistu tantiesa yec inchëshquio yacno tabadacbimbuec mibitedi tabadpadennec. Adquid ictennedi nëbi Nuquin Icbo Esuquidistubëd abentsëc yacbimbuen aid tantiabenash badiadnuc isucunacbimbuen aid tantiec bëdambuec tabadta. 9Aidën tantiamiacpadombuen bëdambuen nabanec utsibo bëdambuen isec bëdambuec tabadendac. Adembidi muainquio icquin abimbo chuiquid icta. 10¿Adambi bëdambuen napeba? quequin ënenquiocquin tantiadednequin Nuquin Papa bunacpadombuen nabanec tabadtedneta. 11Nuquin Papa tantiesabobëtan icsambuen nainda. Aden icsambuen nainquio yec tabadquin utsibo icsambuec tabadsho: Mimbi icsambuen naid ënta, quequin chuita. 12Icsambuen naquidën ompodshon naid chiec dacuëdtsiabi, queshun adquid chuitemaid neque. Chuibanenda. 13Padnuen uëshë chënquequin ismiacbimbuen tantiamiac: Ambi ompoquin naid icsambuen naidquiobi nec, quequin utsibon abimbo tantiabenendac. 14Bëdambuec tabadquin ismedenniac icsambuen nabuedëmbi bëdambuen tantiendac. Adquid chuiquin naden dada uanëdaid iquec:
Mibi usheque. Isucun.
Uënësaidotedi nidtome.
Adquid icsho Esuquidistun mibi bëdambuen tantiamendac,#5.14 Isa. 52.1 isbanta.
quequin chuipanëdash.
15Adquid icmiac bëdambuen naic tabadta. Tantiesan nacpadombuen nabanec tabadenda. Adec tabadenquio yec bëdambuen tantiaquido tabadacpadec tabadta. 16Icsambuen naquido dadpen iqueque. Aidpadquid iquenda. Bëdambuen nabandednequidquio icta. 17Mimbi icsambuen tantiacpaden nabanenda. Aden nainquiocquin: ¿Mitsipadec Nuquin Papa bunacpadec tabadte icpec? quequin tantiec tabadta. 18Tantiadennuen acte paë uaid aquenda. Aid aquec padpidec icsambocquid yanuaindac. Icsambuen nate bunenquio icquin Nuquin Papan Mayan Bëdan tantiamiacpadombuen bëdambuen nabanta.#5.18 B.T.Ch. 23.31 isbanta.
19Adec icsambuen nate bunenquio icquin Esuquidistu tantiaquid utsibobëtan Nuquin Papan Chiaid chuiquinc, chuiquid tapa Dabidën dada uampid cuëdënte utsi utsien chuiquinc, cuëdënte utsi chuiquinc cain chiec cuëdëndenneta. Adec cuëdënquin cuishonquequin Nuquin Icbon naid chuidenneta. 20Nuquin Icbo Esuquidistun namiaid icquin ambi tantiacpadombuen icmiaidtedi bëdambo iquec, quequin Nuquin Papa ënenquio icquin chianneta.
Esus tantiaquido yec nashunnante chiaid
21Esuquidistu tantiaquido yec utsibobëd tantiananec nashunnanta.
22Cun Icbo Esuquidistun chiacpadombuen naquid nebi, queshun aton chido icquin min bënën chiacpadombuen nabanta. 23Aton chidon chuiquid aton bënë nec. Adquiecbidi Esuquidistu abi tantiaquidtedishun chuiquidquio nec. Adembidi aido Nuquin Papa bëdambuen ismequidquio nec. Esuquidistu mapibimbuecquid icnuc abi tantiaquidtedi aton dadabimbuecquid nec. 24Esuquidistun chiacpadombuen nabanquido abi tantiaquido nec. Adombuembidi aton bënën chiacpaden nabanquid aton chido neuaic.
25Aton bënë icquin min chido tantiaquiota. Esuquidistu abi tantiaquido tantiaquiec abided cuidadec uënësacbimbuen tantiaquiota. 26Adec abided cuidadec uënëssun: Ubi tantiaquido bëdamboshëcquid icmenu, queshun ambi Chiaid tantiamequin abi tantiaquido acten mentoadmendac. 27Esuquidistun abi yacno tabadmenuen abi tantiaquido abibimbuecnuc bëchish nibëdquid ushumbo yacbimbuecnuc icmiac bëdamboshëcquid iquendac. Adshun icsambuen nainquio yec bëdambuec tabadquid iquendac. 28Adombuembidi aton bënë icquin mibibi datantiadacpadombuen min chido tantiac bëdambo iquec. Aden aton chido tantiaquid yec dada abibi tantiadquid nec. 29Abibi aton dada chieshëmëdesa matses nec. Abibi tantiadquin bunquioquin peshun aquec. Adec abibi dayun uadquid nec. Adembidi Esuquidistun abi tantiaquido tantiaquioquin nashunquin dayunuaic. 30Nuquitedi abi tantiaquido yec Esuquidistubëd abentsëc yacbimbuecquid icnuc aidën dadabimbuecquid nuqui nec. 31Adquid icnuc naden chuiquin Nuquin Papan dada uamiampid iquec: Dadan aton papabëta aton tita nianquin aton chido bedash aidbëd daëdash matses abentsëc yacbimbuecquid iquendac, quequin chuipampic.#5.31 Ene. 2.24 isbanta. 32Aden abi bunacpadombuen ambi matses tantiamenquio icpampidi mimbi tantiacmaid Nuquin Papan mibi Esus tantiamendac. Adoac Esuquidistu abi tantiaquidobëd tabadendac, quequin chiec nebi. 33Tantia. Mibitedi chuinu. Mibibi datantiadacpadombuen min chido bëdambuen tantiaquiota dadan. Adembidi aton chido icquin min bënë bëdambuen isquin aidën chiacpadombuen nata.
Currently Selected:
Epeso 5: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.