Epeso 6
6
Aton pabëta aton bacuëbo tantiamequin chuibanaid
1Aton bacuëbo icquin Nuquin Icbo Esuquidistu cuishoncamequin papabëtan titan chiacpadombuen chieshenquio icquin nabanta. Aden naquin mimbi bëdambuen naindac. 2Aden nasho bëdambuen nashunendambi, quequin Nuquin Papan chiaid ambi Moises dada uamiampid nad iquec: Papabëta tita bëdambuen tantiata. 3Nëid nidaidën cuishonquec iuec tabadnuen adobanta, quequin chuipampic.#6.2-3 Buan. 20.12 isbanta. Adembidi chotaquën onqueten M.I.Ch. 5.16 isbanta.
4Tantia. Aton papabëd aton tita icsho mibitedi chuinu. Cun bacuëbo chieshec nëishnushe, queshun Nuquin Icbo Esuquidistu bunacpaden Ambi Chiaid ma nanu, quequin bëdambuen chuiquin tantiamebanta.
Iuabobëta abi iuaquid tantiamequin chuibanaid
5Tantia, iuabo. Mibitedi chuinu. Nidaidënshun mibi iuaquid yec min icbo neque. Aidën chiacpadombuen nabanta. Chieshënenquio icquin bëdambuen isquin nashunta. Esuquidistu nidaidën icsho nashunacbimbuen mibi iuaquidën chiacpadombuen nabanta. 6Min icbon isnuc aidën chiacpadombuen mimbi bëdambuen nabanacpadombuembidi min icbon isenquiocnoc adembidi nabanuata. Esuquidistu: Cun Icbo nec, quequin chieshenquio icquin Nuquin Papa bunacpadombuen naimbi, quequin nidaidënshun min icbon chiacpadombuen nabanta. 7Aidën chiacpadombuen chieshenquio yec chonoadquimbi: Matsesuidtsëqui nashunembi, quenquio icquin Nuquin Icbo Esuquidistu mimbi nashunendac. 8Iuabobëtambi iuacmaidon bëdambuen nabanquido icsho Nuquin Icbon ambi tantiacpadombuen abitedi menendac, quequin tantiaquin bëdambuen nabanta.
9Mibitedi iuaquido icquin min iuabo chushcainquiocquin bëdambuen isquin namebanta. Min iuabobëtan mimbi: Cun Icbo caid: Abuc iqueque. Aid tantiata. Aidi matses abitedi tantiaquidquio neque.#6.9 M.I.Ch. 10.17 isbanta.
Mayan Icsa Satanas cuenmete dasiuidte chiaid
10Cun utsibo, nëbi: Nuquin Icbo nadatiambocquin nabanquid nec, quiash aidënquio uidënquio icmequin bëdambuen tantiamiaid icta. 11Sondado tsasimbocquid dasiuidacbimbuen Nuquin Papan bëdambuen tantiamiaido chieshtoenquio yec uidënquio icsho mibitedi Mayan Icsa Satanasën mua uaquin icsametiapimbo iquendac.#6.11 Isa. 11.5bëta 59.17 isbanta. 12Matses isadacpadquidpenquiobëd cuesnanacbimbuecquido nuquitedi nec. Mayan Icsa Satanasën iuabo isadesabëd cuesnanacbimbuen nuquitedi naic. Aidtedi abuc tabadec. Aidotedi nidaidënshun nadatiambocquin nabanquidquio yec: Abitedishun chuiquid tapa nebi, quequin icsambuen namequin iuanu, quequid aido nendac. 13Adquid icnuc Mayan Icsa Satanas cuenmetequidtedi sondado tsasimbocquid dasiuinacbimbuen Nuquin Papan Ambi Chiaid tantiamiaido yec bëdambuen tantiec tabadtenneta. Mibitedi adec tabadnuc icsamiantequid uëshë chonoc icsambuen namenuec chosho bëcunniacbimbuec tabadta. Adec tabadquido yec mibitedi chieshtoenquio yec uidënquio iquendac.
14Aid cacunmec chieshtoenquiocquid icnuec Nuquin Papan Chiaidquio nacnëshëdacbimbuen abimbo tantiec tabadtedneta. Adecbidi ambi cudasënquin dayun uaid yec tsasimbocquid shictoncacbimbuec chieshtoenquio yec bëdambuec tabaduata.#6.14 Isa. 11.5bëta Isa. 59.17 isbanta. 15Nuquin Papan: Bëdambuen tabadmete Chiaid Bëda chuibantan, canushe, queshun Aidën chiaid isted istedta.#6.15 Isa. 52.7 isbanta. 16Nuquin Papan abi tantiaquid icsho dayun uaindac. Adosho issun Mayan Icsa Satanasën: Icsamenu, quequin pia dëtaboaidën senu, cac shocosh tsasimbocquidën dëcatemëdquiash nidacbimbuec chieshtoenquio yec abi mibi nidendac. 17Shocosh mauete tsasimbocquid mauiacsho masetiapimbo yacbimbuen Esus tantiaquid icsho Nuquin Papan cuidenquio icquin abi yacno tabadmendac, quequin tantiaquid icsho Mayan Icsa Satanasën mibitedi chieshtometiapimbo iquendac. Shocosh siante cuënumbo yacbimbuecquid Nuquin Papan Chiaid nec. Nuquin Papan Mayan Bëdan tantiamiac Nuquin Papan Chiaidquio chuinuc Mayan Icsa Satanas cuenendac.#6.17 Ebed. 4.12 isbanta. 18Aton Mayanën tantiamiacpadombuen ënenquio icquin Nuquin Papa chianneta. Adec tabadquin uidënquio icquid yacbimbuen chieshtoenquio icquin Nuquin Papa tantiaquidotedi tantiaquin chianneta.
19Ubitsen tantiaquin Nuquin Papa chianneta. Dacuëdmenquio icquin mimbi tantiamiacpadombuen chuibanquidquio icme, quequin chuita. Adoac ambi oncamiacpadombuen ambi matses tantiamenquio icpampidi nëbi Nuquin Papan tantiamec, quequin tantiabicquido Esus chuibanendambi. 20Esuquidistun: Ubi chuibenneta, caid icquin aid chuibennesho mëtaneshun quënën tsadunaid nebi. Adoaid ubi icsho: Mimbi tantiacpaden dacuëdenquio icquin Esusën naid Chiaid Bëda chuibanquid Pabado icme, quequin Nuquin Papa chianneta.
IV. MIBI TANTIEMBI, QUEQUIN ËNQUIN CHIAID
(6.21-24)
21-22Nuquin utsi nuqui tantiaidquio ubëd icquid Tiquico mibi yacno nidmembi. Aidi Esuquidistu tantiaquid icquin ubi nashunquid nec. Nuquin Icbo tantiaquidquio aidi nec. Aidëmbi mibi yacno nidshun: Nadquio iccosh, quequin umbi naidtedi chiendac. Aden chuisho tantiash mibitedi bëdambo iquendac.
23Nuquin Papabëtan Nuquin Icbo Esuquidistun ma mibitedi bëdambuec tabadmequin Esus tantiaquido utsibobëd tantiananquidquio icmequin abi tantiaquidquio icmepanuna. 24Ënenquio icquin Nuquin Icbo Esuquidistu tantiaquid abitedi Nuquin Papan bëdambuen isquin ma chieshtoenquiocquid icmepanuna, quequin tantiembi.
Aidted chuiquin dada uaombi.
Currently Selected:
Epeso 6: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.