Epeso 4
4
III. ESUS TANTIAQUIDO YEC NADEC TABADTA, QUEQUIN CHUIBANAID
(4.1—6.20)
Abentsëc yacbimbuec tabadta, quequin chiaid
1Nuquin Icbo Esuquidistu chuibennesho bedshun quënën tsadunaid icquin naden mibitedi chuinu. Nuquin Papan tantiamiaido yec bëdambuec tabadquid nec, quequin chiacpadquid mibi neque. Bëdambuec tabadta. 2Umbi tantiacpadombuenuidi naimbi, quenquio yec utsibobëd tantiananec nashunnanta. Ubi bunacpaden utsibon nainquio iquec, quiash chieshëmënenquio yec tantiananec bëdambuec tabadta. 3Nuquin Papan Mayan Bëdan utsibëd bëdambuec tabadte tantiamiacpadquiec Esuquidistu tantiaquid utsibobëd abentsëc yacbimbuec bëdambuec tabadta. 4Esuquidistu tantiaquidtedi abentsëc yacbimbuecquid nec. Abentsëcquiobi aton Mayan iquec. Adquiecbidi Nuquin Papan tantiamiaido icquin ambi matses abi yacno tabadmete nuqui cainaid abentsëcquiobi iquec. 5Abentsëcquiobi Nuquin Icbo iquec. Abentsëcquiobi nuqui tantiaidquio Esuquidistu iquec. Abentsëcquiobi nuqui acten mentote iquec. 6Nuquin Papa abentsëcquiobi iquec. Aidi abitedi uaquidquio yec abitedishun Icbombo nec. Aidbidi Esus tantiaquido bëdambuen namequid nec. Aidi Esus tantiaquidobëd iquec.#4.4-6 Nëid chiaidbimbuecquid istiadquio icquin M.I.Ch. 6.4-5bëta Madc. 2.10 isbanta.
7Esuquidistun ambi tantiacpadombuen abi tantiaquido icsho nuquitedi abentse abentsen: Aden namiaid icta, caid iquendac. 8Adquid chuiquin Nuquin Papan naden dada uamiampid iquec:
Abuc dectatoquin abi chieshënquido ambi dëniacquin bedaido buanquin indoposh.
Adoshombic ambi buanaid matses: Nadoquid icta, quequin ambi tantiacpadquid abentse abentsen icmeposh,
quequin chuipampic.#4.8 Chotaquën onqueten Cuëd. 68.18 isbanta.
9¿Atotsi tantiamenuen: Indoposh, quequin chuipampic? Ënden abucquio tabadbuedi nidaidën icnuec budosh, quequin tantiamenuen chiaid nec. 10Adec abucuësh budash nidaidën tabadpanëdash. Adbuedi padpidec abuc niduash abitedishun Icbombo iquec. 11Adoac aidënquiobi abi tantiaquido utsi utsien nadquidtedi icmebanec. Nëidic Esuquidistu chuibennequido. Utsibic: Nuquin Papan oncamiaido. Utsibic Chiaid Bëda Esusën naid chuibennequido. Utsibic Esus tantiec iccuededquido chuibanta, caido. Utsibic abëd iccuededquido tantiamequin chuibanquido. 12Aden Ubi tantiaquidtedi ma chieshtoenquio yec bëdambuec tabadec nashunnanquid icmenu, quequin Esuquidistun ambi tantiacpadombuen adquido icmebanac. 13Adoaid icquin nashunac abentsëc yacbimbuec Esus tantiaquido yanendac. Adquid iquec Nuquin Papan Mado tantiaquiec Esuquidistupadquid yanec nuquitedi bëdambuec tabadquid yanendac.
14Adec tabadquido yec bacuëmpin utsi utsien tantiacpaden tantiaquidpenquio nuqui nendac. Cunquequidën ëquë ëquëen tsidunacbimbuen muaquidon utsi utsien chuibansho tantiash badedquio: Abimbo caic, quec mua uadec. Aido icsambuen tantiaquido icquin chuisho tantienquio iquendac. 15Nuquien tantiananec abimbo chuinanquido yec Esus tantiaquid nendac. Adquid yec caniacbimbuec Nuquin Icbo Esuquidistupadquid yanendac. Aidi abi tantiaquidon Icbombo nec. 16Cun Icbombo Esuquidistu nec, quequin aidën chiacpadombuen nabanquidquio yec abi tantiaquidtedi aidbëd abentsëc yacbimbuec tabadquido nec. Esuquidistun tantiamiac canidoacbimbuen abentsëcshun abentsëcshunquien bëdambuen nabanec tantiananec tabadec abi tantiaquidtedi aidbëd abentsëc yacbimbuecquid yanendac.
Esuquidistun chuca uac bëdambuec tabadte chiaid
17Nëbi Nuquin Icbo Esuquidistun namiaid icquin aidën tantiamiacpadombuen mibitedi chuinu: Nuquin Papa tantiesabo yec icsambuec tabadacpadec tabadenda. Aidon ambi icsambuen tantiacpadombuenuidi tantiaquin nabanec. 18Adquido yec pashuacbimbuecquido nec. Adquid icquin: Nuquin Papabëd tabadte iquec, utsibo quesho tantiesa yec aid tantiate bunenquio iquec tabadec. 19Icsambuen naquidquio icquin: Aden naic icsambocquid nechitebi, quequin tantienquio aidon iquec. Adquid icquin abi bunaiduidi naquin mëmunesa icquin icsateuidi nabanec tabadec. 20Adec aido tabadacpadec ma tabadnu, quequimpenquio Esuquidistu tantiaquido mibitedi icmiac. 21Esuquidistun naid chuibansho mimbi tantiapanëdac. Aid tantiaquid nebi, quesho tantiashun Esuquidistu chuibanquidon abimbo tantiamequin chuibampanëdash. Aidën chiacpadec ma bëdambuec tabadnu, quequin mibi Esus chuipanëdash. 22Aden chuibanac Esus tantiabenash ënden mibi tabadnëdacpadec tabadenda. Icsambuen naquid iquequi: Bëdambocquid nebi, quec mibibi mua uadnëdacpadec tabadenda. 23Adec mibitedi Nuquin Papan tantiamiaid yec bëdambuec tabadta. 24Aden chuca uaquin bëdambuec tabadte tantiamiaido yec Nuquin Papan abibimbuecnuc uaido yec aid bunacpadec bëdambuec tabadquid icta.
Bëdambuec tabadte chiaid
25Bëdambuec tabadquid icnuec utsibobëd mua uannanenquio yec abimbo chuinanquido icta. Nuquitedi Esus tantiaquido yec dada abentsëc yacbimbuec tabadquido neque.#4.25 Abimbo chuita, quequin chiaid iste bunquin Sac. 8.16 isbanta. 26Nëishshun icsambuen nainda. Nëishash abi uëshëmbi badedquio bëdanta.#4.26 Chotaquën onqueten Cuëd. 4.4 isbanta. 27Mayan Icsa Satanasën iuanushe, quiash nëishash badedquio bëdanta. 28Ampequid icbuedëmbi ampenda. Adquid icbuedi chonoadquin mitsana bedshun utsina nibëdsho issun mosuc menequid icta.
29Esus tantiaquido yec icsambuen chiec onquenda. Utsibo bëdambo icmenu, quequin tantiec bëdambuen chiec onqueta: Ma Nuquin Papan aidtsen bëdambo icmepanu, quiash. 30Nuquin Papan Aton Mayan Bëda mibi meniaid icsambuen naquin uënësquio icmenda. Cuna nec, queshun dada uatanquin siacbimbuen Nuquin Papan Aton Mayan Bëda mibitedi meniac. Nuquin Papan ambi tantiaid uëshëmbi ubi icsambuen naisambo icmequin abi yacno tabadmendac, quequin ma tantianu, queshun Aton Mayan Bëda meniaid mibëd iqueque. Bëdambuen chuita. 31Chieshëmënec tabadenda. Uënësquio yec tabadenda. Utsi chieshënquin icsambuen chuishunenda. Cumapenec nëishbuedi bëdanta. Utsi cuestiadquio yec chieshbuedi bëdanta. Utsi chushcabuedi ënta. Utsi icsambuen chuishunquin ënta. Icsambuen tantiaquin nabanaidtedi ënta. 32Adecbidi bëdambuec tabadquin utsibo uënësquio icquin tantiaquin nashunnanta. Esuquidistunuidtsëqui nac mimbi icsambuen naid tantienquio yec Nuquin Papa bëshunacpadquiec utsin mibi icsambuen naid tantienquio yec bëshunuata.
Currently Selected:
Epeso 4: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.