San Juan 7
7
Li Jesús quihobeꞌ xbaneb li ri̱tzꞌin
1Chirix chic aꞌan, li Jesús yo̱ chixbeninquileb li naꞌajej li cuanqueb Galilea. Incꞌaꞌ quiraj xic Judea xban nak eb li nequeꞌtaklan saꞌ xya̱nkeb laj judío teꞌraj xcamsinquil. 2Yo̱ chi cuulac xkꞌehil li ninkꞌe nak eb laj judío nequeꞌxyi̱b lix cocꞌ muheba̱l. 3Eb li ri̱tzꞌin li Jesús queꞌxye re: —Elen saꞌ li naꞌajej aꞌin. Ayu Judea re nak eb li nequeꞌta̱ken a̱cue teꞌrileb li milagro li nacaba̱nu. 4Ma̱ ani junak tixba̱nu lix cꞌanjel chi mukmu cui naraj nak ta̱naꞌli̱k ru. Cui ta̱ba̱nu li milagro aꞌin, cꞌutbesi la̱ cꞌanjel chiruheb chixjunileb, chanqueb. 5Yal ta eb li ri̱tzꞌin nequeꞌpa̱ban re nak aꞌan taklanbil chak xban li Dios. 6Quixye li Jesús reheb: —Toj ma̱jiꞌ nacuulac xkꞌehil nak tinxic. La̱ex naru texxic yalak jokꞌe. 7Eb li cuanqueb saꞌ ruchichꞌochꞌ xicꞌ niquineꞌril xban nak la̱in ninye reheb nak incꞌaꞌ us li yo̱queb chixba̱nunquil. Abanan la̱ex incꞌaꞌ xicꞌ nequex-ileꞌ xbaneb. 8Ayukex la̱ex saꞌ li ninkꞌe. La̱in incꞌaꞌ tinxic xban nak toj ma̱jiꞌ nacuulac xkꞌehil nak tinxic, chan li Jesús. 9Nak quixye reheb aꞌin, li Jesús toj quicana aran Galilea.
Li Jesús co̱ Jerusalén chixnumsinquil li ninkꞌe
10Nak ac xco̱eb li ri̱tzꞌin saꞌ li ninkꞌe aran Jerusalén, li Jesús co̱ ajcuiꞌ. Abanan moco quixye ta rib. Chanchan saꞌ mukmu co̱. 11Eb li nequeꞌtaklan saꞌ xya̱nkeb laj judío yo̱queb chixsicꞌbal li Jesús saꞌ li ninkꞌe. —¿Bar anchal cuan li cui̱nk aꞌan? chanqueb. 12Nabaleb li cuanqueb aran yo̱queb chixcuechꞌinquil rib chirix li Jesús. Cuan yo̱queb chi yehoc re: —Cha̱bil cui̱nk aꞌan, chanqueb. Ut cuan cuiꞌchic yo̱queb chi yehoc: —Incꞌaꞌ. Li cui̱nk aꞌan naxbalakꞌiheb li tenamit, chanqueb. 13Abanan ma̱ ani quia̱tinac chi cau xban nak queꞌxucuac chiruheb li nequeꞌtaklan saꞌ xya̱nkeb laj judío. 14Nak ac yo̱ li ninkꞌe li Jesús co̱ saꞌ li templo ut qui-oc chixchꞌolobanquil lix ya̱lal chiruheb li cuanqueb aran. 15Queꞌsach xchꞌo̱leb li nequeꞌtaklan saꞌ xya̱nkeb laj judío chirabinquil li cꞌaꞌru quixye li Jesús. Queꞌxye: —¿Chanru nak naxnau li cui̱nk aꞌin chixjunil li cꞌaꞌak re ru aꞌin? Aꞌan moco tzolbil ta, chanqueb. 16Quixye li Jesús reheb: —Li tijleb li yo̱quin chixcꞌutbal ma̱cuaꞌ cue. Aꞌ li Dios li quitaklan chak cue, aꞌan li quicꞌutuc chicuu li yo̱quin chixyebal, chan. 17—Li ani ta̱ajok xba̱nunquil li cꞌaꞌru naraj li Dios, aꞌan tixnau ma re li Dios li tijleb li yo̱quin chixcꞌutbal malaj ut yal incꞌaꞌux injunes. 18Cui junak naxchꞌolob xya̱lal li naxcꞌoxla xjunes, li jun aꞌan naraj nak ta̱qꞌuehekꞌ xlokꞌal xbaneb li nequeꞌabin re. Abanan li ani naraj nak ta̱qꞌuehekꞌ xlokꞌal li quitaklan chak re, li jun aꞌan ti̱c xchꞌo̱l ut ma̱cꞌaꞌ balakꞌic riqꞌuin. 19¿Ma incꞌaꞌ ta biꞌ quixqꞌue e̱re li chakꞌrab laj Moisés? ¿Cꞌaꞌut nak ma̱ jun saꞌ e̱ya̱nk naxba̱nu chi tzꞌakal li cꞌaꞌru naxye li chakꞌrab? Ut, ¿cꞌaꞌut nak te̱raj incamsinquil? chan li Jesús. 20Eb aꞌan queꞌchakꞌoc ut queꞌxye re: —Cuan na li ma̱us aj musikꞌej a̱cuiqꞌuin. ¿Ani ta̱ajok a̱camsinquil? chanqueb re. 21Quixye li Jesús reheb: —La̱in xinba̱nu jun li milagro saꞌ li hiloba̱l cutan ut sachso e̱chꞌo̱l xexcana xban. 22Laj Moisés quixye e̱re nak tento te̱ba̱nu li circuncisión reheb le̱ ralal. (Ma̱cuaꞌ laj Moisés li quitiquiban re. Aꞌ le̱ xeꞌto̱nil yucuaꞌ, aꞌaneb li queꞌtiquiban re xba̱nunquil li circuncisión.) Usta hiloba̱l cutan, la̱ex nequeba̱nu li circuncisión. 23Cui la̱ex nequeba̱nu li circuncisión usta hiloba̱l cutan re nak incꞌaꞌ te̱kꞌet li chakꞌrab li quiqꞌueheꞌ re laj Moisés, ¿cꞌaꞌut nak xexjoskꞌoꞌ cuiqꞌuin nak xinqꞌuirtesi jun li cui̱nk saꞌ li hiloba̱l cutan? 24Mexrakoc a̱tin joꞌ nequeraj la̱ex yal e̱junes. Chexrakok ban a̱tin saꞌ xya̱lal, chan li Jesús. 25Cuanqueb aj Jerusalén queꞌxye: —¿Ma ma̱cuaꞌ ta biꞌ aꞌin li cui̱nk li teꞌraj xcamsinquil eb li nequeꞌtaklan saꞌ kaya̱nk la̱o aj judío? 26Qꞌuehomak retal. Cuan arin ut yo̱ chi a̱tinac chiruheb chixjunileb li tenamit ut ma̱cꞌaꞌ nequeꞌxye re. Ma̱re xeꞌxnau nak aꞌan li Cristo. 27¿Chanru nak aꞌanak li Cristo? ¿Ma incꞌaꞌ ta biꞌ nakanau bar xtenamit li cui̱nk aꞌin? Nak ta̱cha̱lk li Cristo, ma̱ ani ta̱naꞌok re chi tzꞌakal bar ta̱cha̱lk chak, chanqueb. 28Nak li Jesús yo̱ chixchꞌolobanquil lix ya̱lal saꞌ li templo, quixye chi cau xya̱b xcux: —Ya̱l nak nequenau cuu. Ut nequenau bar intenamit. Abanan incꞌaꞌ nequenau chi tzꞌakal bar xinchal chak. La̱in incꞌaꞌ xintakla chak cuib yal injunes. Li Dios, li ti̱c xchꞌo̱l, aꞌan li xtaklan chak cue. La̱ex incꞌaꞌ nequenau ru aꞌan. 29Caꞌaj cuiꞌ la̱in ninnaꞌoc ru xban nak riqꞌuin aꞌan xinchal chak. Li Dios, aꞌan li quitaklan chak cue, chan li Jesús. 30Ut queꞌraj raj xchapbal re nak teꞌxqꞌue saꞌ tzꞌalam. Abanan incꞌaꞌ ajcuiꞌ queꞌxchap xban nak toj ma̱jiꞌ nacuulac xkꞌehil nak ta̱chapekꞌ. 31Nabaleb li tenamit queꞌxpa̱b li Cristo ut queꞌxye: —La̱o nakanau nak ta̱cꞌulu̱nk li Cristo, nabaleb li milagro tixba̱nu. Li cui̱nk aꞌin nabal li milagro yo̱ chixba̱nunquil. Cui ta ma̱cuaꞌ li Cristo, ¿chan ta cuiꞌ ru nak tixba̱nu li milagro li yo̱ chixba̱nunquil? chanqueb.
Eb li nequeꞌcꞌacꞌalen saꞌ li templo queꞌtakla̱c chixchapbal li Jesús
32Eb laj fariseo queꞌrabi li yo̱queb chixyebal chirix li Jesús. Joꞌcan nak eb aꞌan, rochbeneb li xbe̱nil aj tij, queꞌxtakla li nequeꞌcꞌacꞌalen saꞌ li templo chixchapbal li Jesús re teꞌxqꞌue saꞌ tzꞌalam. 33Li Jesús quixye reheb: —Toj ma̱jiꞌ tine̱chap. Toj tincua̱nk chic caꞌchꞌinak saꞌ e̱ya̱nk, tojoꞌnak tinsukꞌi̱k cuiꞌchic riqꞌuin li quitaklan chak cue. 34Tine̱sicꞌ ut incꞌaꞌ tine̱tau xban nak bar cua̱nkin la̱in, la̱ex incꞌaꞌ texru̱k chi xic, chan. 35Ut eb laj judío queꞌoc chi a̱tinac chi ribileb rib ut queꞌxye: —¿Bar anchal ta̱xic li cui̱nk aꞌin nak incꞌaꞌ ta̱ru̱k takatau? Ma̱re ta̱xic riqꞌuineb laj judío li cuanqueb saꞌ xtenamiteb laj griego. Malaj ta̱oc chixtzolbaleb laj griego. 36Aꞌan xye, “Tine̱sicꞌ ut incꞌaꞌ tine̱tau. Incꞌaꞌ naru texxic bar cua̱nkin cuiꞌ,” chan. ¿Cꞌaꞌru xya̱lal aꞌan? chanqueb.
Li Jesús quixye nak li ani ta̱chakik re tixqꞌue rucꞌa
37Li rosoꞌjic li ninkꞌe, aꞌan li cutan li kꞌaxal lokꞌ chiruheb. Saꞌ li ho̱nal aꞌan, li Jesús quixakli chiruheb ut quixye chi cau xya̱b xcux: —Li ani ta̱chakik re, cha̱lk cuiqꞌuin. La̱in tinqꞌue rucꞌa. 38Xban nak joꞌcaꞌin tzꞌi̱banbil retalil saꞌ li Santil Hu: Chixjunileb li ani teꞌpa̱ba̱nk cue la̱in, li Santil Musikꞌej li naqꞌuehoc junelic yuꞌam ta̱cua̱nk riqꞌuineb. Chanchan jun li yuꞌam haꞌ li incꞌaꞌ na-osoꞌ.— 39Nak quixye aꞌin, li Jesús yo̱ chi a̱tinac chirix li Santil Musikꞌej li ta̱cua̱nk riqꞌuineb li teꞌpa̱ba̱nk re. Saꞌ li cutan aꞌan, li Santil Musikꞌej toj ma̱jiꞌ nacꞌulun xban nak li Jesús toj ma̱jiꞌ naxic saꞌ choxa chixcꞌulbal lix lokꞌal. 40Nak queꞌrabi li cꞌaꞌru quixye li Jesús, cuan queꞌyehoc: —Relic chi ya̱l li cui̱nk aꞌin profeta.— 41Ut cuanqueb ajcuiꞌ queꞌxye: —Li cui̱nk aꞌin, aꞌan li Cristo.— Abanan cuanqueb cuiꞌchic li queꞌchakꞌoc ut queꞌxye: —¿Ma Galilea ta biꞌ ta̱cha̱lk li Cristo li yechiꞌinbil ke? 42Tzꞌi̱banbil retalil saꞌ li Santil Hu nak li Cristo li Mesías ta̱cha̱lk saꞌ xya̱nkeb li ralal xcꞌajol li rey David. Ta̱cha̱lk aran Belén li quicuan cuiꞌ li rey David najter, chanqueb. 43Joꞌcan nak li tenamit queꞌxjachi ribeb xban nak jalan jala̱nk yo̱queb chixcꞌoxlanquil chirix li Jesús. 44Cuanqueb li queꞌajoc xchapbal li Jesús abanan incꞌaꞌ ajcuiꞌ queꞌxba̱nu.
Li cuanqueb xcuanquil incꞌaꞌ queꞌxpa̱b li Jesús
45Nak queꞌsukꞌi li queꞌtakla̱c chixchapbal li Jesús, eb laj fariseo ut eb li xbe̱nil aj tij queꞌxpatzꞌ reheb: —¿Cꞌaꞌut nak incꞌaꞌ xecꞌam chak li cui̱nk aꞌan? chanqueb. 46Eb li nequeꞌcꞌacꞌalen saꞌ li templo queꞌchakꞌoc ut queꞌxye: —¡Ma̱ jun cua kabiom junak cui̱nk chi a̱tinac joꞌ naa̱tinac li cui̱nk aꞌan! ¡Chꞌinaꞌus li cꞌaꞌru naxye! chanqueb. 47Ut eb laj fariseo queꞌxye reheb: —¿Ma xeqꞌue ajcuiꞌ e̱rib la̱ex chixbalakꞌi li cui̱nk aꞌan? 48¿Ma cuan ta biꞌ junak xcomoneb li nequeꞌtaklan saꞌ kaya̱nk li xpa̱b li cꞌaꞌru naxye aꞌan? Ut, ¿ma cuan ta biꞌ junak kacomon la̱o aj fariseo xpa̱ban re? 49Eb li qꞌuila tenamit aꞌin incꞌaꞌ nequeꞌxnau cꞌaꞌru naxye saꞌ li chakꞌrab li quiqꞌueheꞌ re laj Moisés. ¿Cꞌaꞌru teꞌoc cuiꞌ eb aꞌan? chanqueb laj fariseo. 50Cuan aran laj Nicodemo li quicuulac riqꞌuin li Jesús chi kꞌek. Aꞌan jun reheb laj fariseo. Quixye reheb: 51—Naxye saꞌ li kachakꞌrab nak incꞌaꞌ naru rakoc a̱tin saꞌ xbe̱n junak cui̱nk chi toj ma̱jiꞌ naxye ma cuan xma̱c malaj ut incꞌaꞌ. Tento takanau chi tzꞌakal cꞌaꞌru lix ma̱c, chan laj Nicodemo. 52Queꞌchakꞌoc ut queꞌxye re: —¿Ma la̱at ajcuiꞌ aj Galilea la̱at? Tzol a̱cuib chi us saꞌ li Santil Hu re ta̱qꞌue retal nak ma̱ jun profeta chalenak chak Galilea, chanqueb. 53Ut chirix chic aꞌan, chixjunileb queꞌco̱eb saꞌ rochocheb.
Currently Selected:
San Juan 7: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.