San Juan 6
6
Li Jesús quixqꞌueheb chi cuaꞌac li o̱b mil chi cui̱nk
1Mokon chic li Jesús co̱ cuiꞌchic jun pacꞌal li palau Galilea. Nequeꞌxye ajcuiꞌ Tiberias re li palau aꞌan. 2Nabaleb yo̱queb chi ta̱ke̱nc re xban nak queꞌrileb li milagro li yo̱ chixba̱nunquil nak naxqꞌuirtesiheb li yaj. 3Ut quitakeꞌ li Jesús chiru jun li tzu̱l ut aran quicꞌojla rochbeneb lix tzolom. 4Ac cuulac re xkꞌehil li ninkꞌe Pascua, li nequeꞌxba̱nu eb laj judío. 5Li Jesús quiril nak nabaleb li yo̱queb chi cuulac riqꞌuin. Quixye re laj Felipe: —¿Bar ta̱ru̱k takalokꞌ xcuaheb chixjunileb li tenamit aꞌin? chan. 6Quixye chi joꞌcan yal re rilbal cꞌaꞌ na ru tixye laj Felipe xban nak ac cuan saꞌ xchꞌo̱l li Jesús nak tixqꞌue xcuaheb. 7Quixye laj Felipe: —Ka̱cuaꞌ, cuib ciento denario chi caxlan cua incꞌaꞌ ta̱tzꞌaklok re teꞌtzꞌak caꞌchꞌinak chi xju̱nkaleb, chan. 8Jun chic reheb lix tzolom aj Andrés xcꞌabaꞌ ras laj Simón Pedro. Quixye: 9—Cuan jun li al arin cuan cuib li car riqꞌuin ut o̱b li caxlan cua yi̱banbil riqꞌuin cebada. Abanan aꞌin ma̱ jokꞌe ta̱tzꞌaklok reheb li qꞌuila tenamit, chan. 10Ut quixye li Jesús reheb: —Qꞌuehomakeb chi cꞌojla̱c li tenamit.— Nabal li pachꞌayaꞌ cuan aran. Chixjunileb queꞌcꞌojla saꞌ li pachꞌayaꞌ. O̱b mil na chi cui̱nk li cuanqueb aran. 11Tojoꞌnak li Jesús quixchap li caxlan cua. Quixbantioxi chiru li Dios. Quixjachi li caxlan cua ut quixqꞌue reheb lix tzolom re nak teꞌxjeqꞌui reheb li qꞌuila tenamit li cꞌojcꞌo̱queb aran. Joꞌcan ajcuiꞌ quixba̱nu riqꞌuin li car. Ut queꞌcuaꞌac chixjunileb toj retal queꞌcꞌojla xchꞌo̱leb. 12Nak ac xeꞌrakeꞌ chi cuaꞌac, li Jesús quixye reheb lix tzolom: —Xocomak li joꞌ qꞌuial x-elaꞌan re nak ma̱cꞌaꞌ ta̱tzꞌekma̱nk, chan. 13Queꞌxxoc cablaju chacach relaꞌ li caxlan cua yi̱banbil riqꞌuin cebada. Aꞌan li qui-elaꞌan nak queꞌrakeꞌ chi cuaꞌac chixjunileb li cuanqueb aran. 14Nak queꞌril li milagro li quixba̱nu li Jesús, eb li cuanqueb aran queꞌxye: —Relic chi ya̱l li cui̱nk aꞌin, aꞌan li profeta li quiyeheꞌ chak resil junxil nak ta̱cha̱lk saꞌ ruchichꞌochꞌ, chanqueb. 15Li Jesús quixnau nak teꞌraj xpuersinquil ru re nak ta̱oc chokꞌ rey. Joꞌcan nak qui-el saꞌ xya̱nkeb ut co̱ xjunes saꞌ li tzu̱l.
Li Jesús quibe̱c chiru li palau
16Oc re kꞌojyi̱n nak co̱eb lix tzolom li Jesús chire li palau. 17Li Jesús ma̱jiꞌ nacuulac riqꞌuineb. Queꞌoc saꞌ jun li jucub ut yo̱queb chi xic saꞌ li tenamit Capernaum li cuan jun pacꞌal li palau. 18Ac x-oc li kꞌojyi̱n nak quichal jun cacuil ikꞌ ut qui-oc chi ecꞌa̱nc ru li palau chi cau. 19Cuan na xcab legua ac xeꞌbe̱c chiru li haꞌ saꞌ li jucub nak queꞌril nak yo̱ chak chi cha̱lc li Jesús. Yo̱ chi be̱c chiru li haꞌ. Yo̱ chak chi nachꞌoc chixcꞌatk li jucub. Cꞌajoꞌ nak queꞌxucuac xban nak incꞌaꞌ queꞌxnau ru. 20Ut li Jesús quixye reheb: —La̱in. Mexxucuac, chan. 21Ut cꞌajoꞌ xsahil xchꞌo̱leb nak queꞌrocsi saꞌ li jucub. Ut saꞌ ajcuiꞌ li ho̱nal aꞌan queꞌcuulac saꞌ li naꞌajej li yo̱queb cuiꞌ chi xic. 22Cuulajak chic li qꞌuila tenamit li cuanqueb chire li palau li queꞌel cuiꞌ, queꞌxqꞌue retal nak jun ajcuiꞌ li jucub qui-el aran. Ut queꞌxnau nak li Jesús incꞌaꞌ qui-oc chi saꞌ li jucub aꞌan rochbeneb lix tzolom. Xjuneseb ban co̱eb. 23Ut cuanqueb cuiꞌchic jucub queꞌel chak Tiberias queꞌcuulac chixcꞌatk li naꞌajej li queꞌcuaꞌac cuiꞌ nak ac xbantioxi li Jesús chiru li Dios. 24Li qꞌuila tenamit queꞌxqꞌue retal nak ma̱ ani chic li Jesús saꞌ li naꞌajej aꞌan, chi moco cuanqueb lix tzolom. Queꞌoc saꞌ eb li jucub li queꞌchal Tiberias ut co̱eb Capernaum chixsicꞌbal. 25Nak queꞌxtau li Jesús jun pacꞌal li palau, queꞌxye re: —At tzolonel, ¿Jokꞌe xatchal arin?— 26Quichakꞌoc li Jesús ut quixye reheb: —Relic chi ya̱l ninye e̱re nak la̱ex yo̱quex chinta̱kenquil xban nak xexinqꞌue chi cuaꞌac toj retal xexnujac. Incꞌaꞌ yo̱quex chinta̱kenquil xban nak xeril li milagro li xinba̱nu. 27Mixic e̱chꞌo̱l caꞌaj cuiꞌ riqꞌuin xsicꞌbal li tzacae̱mk li na-osoꞌ. Cheqꞌuehak ban e̱chꞌo̱l chixsicꞌbal li tzacae̱mk li incꞌaꞌ nalaj na-osoꞌ. Aꞌan li junelic yuꞌam li ninqꞌue la̱in li Cꞌajolbej. Aꞌan aj e nak quixqꞌue incuanquil ut quinixtakla chak li Yucuaꞌbej, chan li Jesús. 28Ut queꞌxye re li Jesús: —¿Cꞌaꞌ raj ru takaba̱nu la̱o re nak ta̱sahokꞌ xchꞌo̱l li Dios kiqꞌuin? chanqueb. 29Li Jesús quixye reheb: —Li cꞌaꞌru naraj li Dios nak te̱ba̱nu, aꞌan aꞌin: nak tine̱pa̱b la̱in xban nak taklanbilin chak xban, chan. 30Ut queꞌxye cuiꞌchic re: —Tento ta̱cꞌut chiku junak li milagro re nak takapa̱b nak taklanbilat xban li Dios. ¿Cꞌaꞌru li retalil ta̱cꞌut chiku? 31Eb li kaxeꞌto̱nil yucuaꞌ queꞌqꞌueheꞌ chak li maná chixcuaꞌeb nak yo̱queb chak chi numecꞌ saꞌ li chaki chꞌochꞌ joꞌ tzꞌi̱banbil retalil saꞌ li Santil Hu: Choxahil cua quiqꞌueheꞌ chixcuaꞌeb.— 32Ut li Jesús quixye reheb: —Relic chi ya̱l ninye e̱re, moco aꞌ ta laj Moisés quiqꞌuehoc reheb li choxahil cua. Aꞌ ban lin Yucuaꞌ, aꞌan li quiqꞌuehoc reheb. Ut aꞌan naqꞌuehoc li tzꞌakal choxahil cua. 33Li tzꞌakal choxahil cua li naxqꞌue li Dios, aꞌan li jun li quichal chak saꞌ choxa ut naxqꞌue li junelic yuꞌam reheb li cuanqueb saꞌ ruchichꞌochꞌ, chan. 34Eb aꞌan queꞌxye re: —At Ka̱cuaꞌ, ta̱qꞌue ta ke rajlal li cua aꞌan.— 35Li Jesús quixye reheb: —La̱in li cua aꞌan. La̱in ninqꞌuehoc junelic yuꞌam. Li ani napa̱ban cue ta̱cꞌojoba̱k xchꞌo̱l. Incꞌaꞌ chic ta̱tzꞌoca̱k ut incꞌaꞌ chic ta̱chakik re. Chanchan nak ac xrakeꞌ chi tzaca̱nc. 36Aban ac xinye e̱re nak usta ac xeril cuu, toj incꞌaꞌ ajcuiꞌ niquine̱pa̱b. 37Chixjunileb li tixkꞌaxtesi cue li Yucuaꞌbej, tineꞌxpa̱b. Ut li ani napa̱ban cue, la̱in incꞌaꞌ tintzꞌekta̱na. 38La̱in xinchal chak saꞌ choxa re tinba̱nu li cꞌaꞌru naraj li Dios li quitaklan chak cue. Moco xinchal ta chixba̱nunquil li cꞌaꞌru nacuaj la̱in. 39Li cꞌaꞌru naraj lin Yucuaꞌ li quitaklan chak cue, aꞌan nak ma̱ jun reheb li cualal incꞌajol li xkꞌaxtesi cue ta̱sachk chicuu. Tincuaclesiheb ban chicua̱nkeb xyuꞌam saꞌ rosoꞌjiqueb li cutan. 40Li Yucuaꞌbej li quitaklan chak cue, aꞌan naraj nak chixjunileb li teꞌxqꞌue retal nak la̱in li Cꞌajolbej ut tineꞌxpa̱b ta̱cua̱nk xyuꞌameb chi junelic. Ut la̱in tincuaclesiheb ut tinqꞌue xyuꞌameb saꞌ rosoꞌjiqueb li cutan, chan li Jesús. 41Ut eb laj judío queꞌoc chixcuechꞌinquil rix li quixye li Jesús xban nak quixye, “La̱in li cua. La̱in xinchal chak saꞌ choxa.” 42Queꞌxye chi ribileb rib: —¿Ma ma̱cuaꞌ ta biꞌ aꞌin li Jesús li ralal laj José? La̱o nakanau ruheb lix naꞌ xyucuaꞌ. ¿Cꞌaꞌut nak naxye nak saꞌ choxa xchal chak? chanqueb. 43Quixye li Jesús reheb: —Canabomak xcuechꞌinquil e̱rib. 44Ma̱ ani naru ta̱pa̱ba̱nk cue cui incꞌaꞌ ta kꞌaxtesinbil cue xban li Yucuaꞌbej li quitaklan chak cue. Li nequeꞌpa̱ban cue, la̱in tincuaclesiheb cuiꞌchic chi yoꞌyo saꞌ rosoꞌjiqueb li cutan. 45Tzꞌi̱banbil retalil chi joꞌcaꞌin saꞌ li Santil Hu xbaneb li profeta: Li Dios tixcꞌut lix ya̱lal chiruheb chixjunileb. Joꞌcan nak chixjunileb li nequeꞌabin re ut nequeꞌxtau ru li cꞌaꞌru naxye li Dios, eb aꞌan tineꞌxpa̱b ajcuiꞌ la̱in. 46Aꞌin moco naraj ta naxye nak cuan li queꞌiloc chak ru li Acuabej Dios. Caꞌaj cuiꞌ la̱in ninnaꞌoc ru xban nak riqꞌuin quinchal chak. 47Relic chi ya̱l tinye e̱re nak li ani napa̱ban cue, li jun aꞌan cuan xyuꞌam chi junelic. 48La̱in li cua li naqꞌuehoc yuꞌam chi junelic. 49Le̱ xeꞌto̱nil yucuaꞌ queꞌxcuaꞌ chak li cua li quichal chak saꞌ choxa junxil nak yo̱queb chi numecꞌ saꞌ li chaki chꞌochꞌ. Usta queꞌxcuaꞌ li cua li quichal saꞌ choxa, abanan moco cuanqueb ta xyuꞌam chi junelic. 50Abanan, la̱in li xinchal chak saꞌ choxa, la̱in li tzꞌakal choxahil cua xban nak ninqꞌuehoc yuꞌam chi junelic. Li ani napa̱ban cue, aꞌan incꞌaꞌ ta̱ca̱mk. Cua̱nk ban xyuꞌam chi junelic. 51La̱in li yoꞌyo̱quil cua. Quinchal chak saꞌ choxa. Li ani napa̱ban cue la̱in incꞌaꞌ ta̱sachk. Cua̱nk ban xyuꞌam chi junelic. Li cua li tinqꞌue la̱in, aꞌan lin tibel nak tinkꞌaxtesi cuib chi ca̱mc re nak ta̱ru̱k teꞌcua̱nk xyuꞌameb chi junelic li cuanqueb saꞌ ruchichꞌochꞌ, chan li Jesús. 52Nak queꞌrabi li cꞌaꞌru quixye, eb laj judío queꞌoc chixcuechꞌinquil rix li quixye ut queꞌxye: —¿Chanru nak tixqꞌue lix tibel re takatzaca? chanqueb. 53Quixye li Jesús reheb: —Relic chi ya̱l ninye e̱re: Cui incꞌaꞌ te̱tzaca lin tibel la̱in li Cꞌajolbej ut cui incꞌaꞌ te̱rucꞌ lin quiqꞌuel, incꞌaꞌ ta̱cua̱nk le̱ yuꞌam chi junelic. 54Chixjunileb li nequeꞌxtzaca lin tibel ut nequeꞌrucꞌ lin quiqꞌuel, cua̱nk xyuꞌameb chi junelic, ut la̱in tincuaclesiheb cuiꞌchic chi yoꞌyo saꞌ rosoꞌjiqueb li cutan. 55Lin tibel, aꞌan li tzacae̱mk li naqꞌuehoc junelic yuꞌam. Ut lin quiqꞌuel, aꞌan li ucꞌa li naqꞌuehoc junelic yuꞌam. 56Li ani naxtzaca lin tibel ut narucꞌ lin quiqꞌuel, li jun aꞌan cuan chi sum a̱tin cuiqꞌuin ut la̱in cuanquin chi sum a̱tin riqꞌuin aꞌan. 57Li yoꞌyo̱quil Dios, aꞌan li quitaklan chak cue. Joꞌ nak yoꞌyo chi junelic aꞌan, joꞌcan nak yoꞌyo̱quin ajcuiꞌ la̱in chi junelic. Joꞌcan ajcuiꞌ li ani naxtzaca lin tibel, li jun aꞌan ta̱cua̱nk xyuꞌam chi junelic saꞌ incꞌabaꞌ la̱in. 58Joꞌcan nak la̱in li cua li quinchal chak saꞌ choxa. Moco joꞌ ta li cua li queꞌxcuaꞌ le̱ xeꞌto̱nil yucuaꞌ. Aꞌan incꞌaꞌ quixqꞌue xyuꞌameb chi junelic. Abanan chixjunileb li teꞌcuaꞌok re li cua aꞌin, eb aꞌan teꞌcua̱nk xyuꞌameb chi junelic, chan li Jesús. 59Chixjunil li cꞌaꞌak re ru aꞌin li Jesús quixye reheb nak yo̱ chixcꞌutbal lix ya̱lal chiruheb aran Capernaum saꞌ li cab li nequeꞌxchꞌutub cuiꞌ ribeb laj judío.
Nabaleb queꞌxcanab xta̱kenquil li Jesús
60Nak queꞌrabi li cꞌaꞌru quixye, nabaleb lix tzolom queꞌoc chi a̱tinac chi ribileb rib, ut queꞌxye: —Cꞌajoꞌ xchꞌaꞌajquil xtaubal ru li xye. ¿Ani ta cuiꞌ ta̱taꞌok ru? chanqueb. 61Li Jesús quixnau nak yo̱queb chixcuechꞌinquil rix li cꞌaꞌru quixye usta ma̱ ani quiyehoc re. Joꞌcan nak quixye reheb: —¿Ma incꞌaꞌ xcuulac che̱ru li cꞌaꞌru xinye e̱re? ¿Ma te̱canab inta̱kenquil xban? 62¿Ma ra xerecꞌa nak xinye e̱re chi joꞌcan? ¿Cꞌaꞌ raj ru te̱ba̱nu nak te̱ril nak la̱in li Cꞌajolbej yo̱kin cuiꞌchic chi xic saꞌ choxa li xincuan cuiꞌ chak junxil? 63Li naqꞌuehoc junelic yuꞌam, aꞌan li Santil Musikꞌej. Aꞌan ma̱cuaꞌ re li tibelej. La̱in xinchꞌolob xya̱lal che̱ru. Li xinye e̱re yebil cue xban li Santil Musikꞌej. Cui te̱pa̱b li cꞌaꞌru xinye, li Santil Musikꞌej tixqꞌue e̱re li junelic yuꞌam. 64Abanan toj cuanqueb ajcuiꞌ saꞌ e̱ya̱nk li incꞌaꞌ nequeꞌpa̱ban, chan li Jesús. Chalen saꞌ xticlajic li Jesús quixnau aniheb li incꞌaꞌ teꞌpa̱ba̱nk re. Ut quixnau ajcuiꞌ ani li ta̱kꞌaxtesi̱nk re saꞌ rukꞌeb li xicꞌ queꞌiloc re. 65Ut quixye ajcuiꞌ li Jesús reheb: —Joꞌcan nak xinye e̱re nak ma̱ ani ta̱ru̱k ta̱pa̱ba̱nk cue cui incꞌaꞌ ta kꞌaxtesinbil cue xban li Yucuaꞌbej, chan. 66Chalen saꞌ li cutan aꞌan nabaleb lix tzolom queꞌchꞌinan xchꞌo̱leb ut incꞌaꞌ chic queꞌxta̱ke li Jesús. 67Ut li Jesús quixye reheb lix tzolom cablaju: —¿Ma te̱raj ajcuiꞌ xic la̱ex? ¿Ma tine̱canab ajcuiꞌ la̱ex? chan reheb. 68Quichakꞌoc laj Simón Pedro ut quixye re: —At Ka̱cuaꞌ, ¿ani aj iqꞌuin toxic? La̱at nacaye ke chanru ta̱cua̱nk kayuꞌam chi junelic. 69La̱o nakapa̱b li cꞌaꞌru nacaye ut nakanau nak la̱at li Cristo, li Ralal li yoꞌyo̱quil Dios, chan. 70Quixye li Jesús: —¿Ma ma̱cuaꞌ ta biꞌ la̱in xinsicꞌoc e̱ru la̱ex li cablaju? La̱in xinsicꞌoc e̱ru ut jun saꞌ e̱ya̱nk xkꞌaxtesi rib re laj tza, chan. 71Yo̱ chi a̱tinac chirix laj Judas Iscariote, li ralal laj Simón. Usta aꞌan jun reheb li cablaju, mokon laj Judas Iscariote quixkꞌaxtesi li Jesús saꞌ rukꞌeb li xicꞌ nequeꞌiloc re.
Currently Selected:
San Juan 6: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.