3 Juan 1
1
Xqꞌuebal xsahil xchꞌo̱l
1Nintzꞌi̱bac a̱cuiqꞌuin, at hermano Gayo. La̱in aj cꞌamol be cha̱cuu saꞌ la̱ pa̱ba̱l. Relic chi ya̱l nak nacatinra. 2At inherma̱n, yo̱quin chi tijoc cha̱cuix re nak us tat-e̱lk riqꞌuin chixjunil li cꞌaꞌru ta̱ba̱nu. Ut nintijoc ajcuiꞌ cha̱cuix re nak cauhakat. Ninnau nak ti̱c la̱ chꞌo̱l chiru li Dios. 3Cꞌajoꞌ nak nasahoꞌ saꞌ inchꞌo̱l nak nequeꞌcꞌulun li herma̱n cuiqꞌuin ut nacuabi resil nak ti̱c a̱chꞌo̱l. Ut ninnau nak yo̱cat chixba̱nunquil lix ya̱lal. 4Aꞌan aꞌin li kꞌaxal nasahoꞌ cuiꞌ inchꞌo̱l nak nacuabi resil nak eb li kaherma̱n cuanqueb saꞌ xya̱lal. Eb aꞌan chanchaneb li cualal incꞌajol xban nak queꞌpa̱ban chicuu.
Laj Gayo cha̱bil quixba̱nu riqꞌuin xtenkꞌanquileb li herma̱n
5At inherma̱n, kꞌaxal lokꞌ li nacaba̱nu nak nacatenkꞌaheb li herma̱n, usta incꞌaꞌ nacanauheb ru. 6Eb aꞌan queꞌxchꞌolob xya̱lal arin chiruheb li herma̱n chanru nak nacaraheb. Chatenkꞌaheb chi cha̱bil joꞌ naraj li Dios nak teꞌxic chixyebal ra̱tin li Dios saꞌ jalan naꞌajej. 7Eb aꞌan xeꞌoc chi xic xban nak teꞌraj xba̱nunquil xcꞌanjel li Jesucristo. Ut incꞌaꞌ queꞌxcꞌul xkꞌajca̱munquileb chiruheb li ma̱jiꞌ nequeꞌxpa̱b li Dios. 8Joꞌcan nak tento takatenkꞌaheb li cui̱nk aꞌin xban nak kech aj cꞌanjeleb chixchꞌolobanquil lix ya̱lal.
Lix yibal ru xnaꞌleb laj Diótrefes
9Cuan cꞌaꞌru xintzꞌi̱ba saꞌ li hu li xintakla riqꞌuineb laj pa̱banel aran. Abanan li herma̱n Diótrefes, aꞌan naxnimobresi rib ut incꞌaꞌ naxcꞌul xchꞌo̱l li cꞌaꞌru xintzꞌi̱ba. Naraj takla̱nc saꞌ e̱ya̱nk ut incꞌaꞌ naxqꞌue incuanquil. 10Nak tinxic aran toxinkꞌus ut che̱ru che̱junilex tinye li cꞌaꞌru yo̱ chixba̱nunquil. Yo̱ chixyebal cꞌaꞌak re ru chi a̱tinul chikix. Ut moco nacꞌojla ta xchꞌo̱l riqꞌuin aꞌan. Toj cuan cuiꞌchic cꞌaꞌak re ru incꞌaꞌ us naxba̱nu. Incꞌaꞌ naxcꞌuleb li herma̱n saꞌ li rochoch ut naxic chixtacchiꞌinquileb li herma̱n li nequeꞌraj raj xcꞌulbal li ulaꞌ, ut narisiheb saꞌ xya̱nkeb laj pa̱banel cui nequeꞌxcꞌul li rulaꞌeb.
Cha̱bil resil chirix laj Demetrio
11At inherma̱n, ma̱tzol a̱cuib riqꞌuin li incꞌaꞌ us. Aꞌ ban li us ta̱ba̱nu. Li ani naba̱nun re li us, aꞌan ralal xcꞌajol li Dios. Ut li ani naxba̱nu li incꞌaꞌ us, toj ma̱jiꞌ naxpa̱b li Dios. 12Chixjunileb nequeꞌxye nak cha̱bil li herma̱n Demetrio. Ut relic chi ya̱l nak lix yuꞌam nacꞌutuc re lix cha̱bilal. Joꞌcan ajcuiꞌ nakaye la̱o. Ut la̱at nacanau nak li nakaye la̱o aꞌan ya̱l.
Xrakbal li hu riqꞌuin sahil chꞌo̱lej
13Cuan raj nabal chic tinye a̱cue, abanan incꞌaꞌ nacuaj xtzꞌi̱banquil saꞌ li hu aꞌin. 14Yo̱quin chixcꞌoxlanquil nak chi se̱b takil kib re nak ta̱ru̱k taka̱tina kib. 15Chicua̱nk taxak li tuktu̱quil usilal a̱cuiqꞌuin. Eb li herma̱n arin nequeꞌxtakla xsahil a̱chꞌo̱l. Ut chaqꞌue ajcuiꞌ xsahil xchꞌo̱leb li kech aj pa̱banelil chi xjunju̱nkaleb.
Currently Selected:
3 Juan 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.