Loma 9
9
Njambi na vanu vendi
1Njilinakwendeka vushunga muli Kilistu, co kunjesi nakwendeka makuli embwe. Citaku-taku cange lalo cilinakwambulula amo nange ali Munzinzime Wakujela, 2omo njendeka ngwange njili na vusiwa vwakama manene, nakuvinja kuje kukwesi kuhwa mu mbunge yange, 3omwo vanu vange, vavushoko vange mu situ na mu maninga. 4#Kut 9:4 Vanapu vanu va Njambi, navapwisa vana vendi nakuvasholwela vumpau vwendi, walingile vikumiiyo#9:4 VIKUMIIYO: Kunungulula kumo ngwavo, cikumiiyo. navo nakuvana Lishiko, vakalemesa mwa vushunga, vanatambula vikulaeso vya Njambi, 5vanapu vatekulwila va vakukulwila va vaHevelu va lutsimo, na Kilistu, akupwa munu, nakundama ku cisemwa cavo. Njambi uje muka-kushwana vyuma voshe, vamushangazale myaka yoshe!#9:5 NJAMBI UJE MUKA-KUSHWANA VYUMA VYOSHE, VAMUSHANGAZALE MYAKA YOSHE: Nambe, uje, ikeye Njambi muka-kushwana vyuma vyoshe, vamushangazale myaka yoshe! Ewa.
6Kunjendeka ngwange cikulaeso ca Njambi cinonwa embwe, omwo kesi vanu voshe va Isalele vanapu vanu va Njambi embwe. 7#Kus 21:12 Nambe kesi voshe vatekulwila va Avilahama vanapu vana va Njambi embwe. Oloni Njambi wendekele kuli Avilahama ngwendi, “Kuvanga muli Isake lika mukemwo ukakala na vatekulwila vaje njakukulaesele.” 8Eci cinalumbunuka ngeci vana vaje vanasemuka ku cisemwa ca vunu#9:8 VANA VAJE VANASEMUKA KU CISEMWA CA VUNU: Oloni eci cilumbununa vatekulwila vaje vaakele navo Avilahama kuli Ishimela munendi yakitilile kuli Hangale (kenga Ngalatiya 4:22-23). kesi vana va Njambi, oloni vanu vaje vanasemuka omwo cikulaeso ca Njambi vakevo vavatumbula vatekulwila va vushunga. 9#Kus 18:10 Omwo cikulaeso ca Njambi vacilingile mu majwi awa ngwavo, “A simbu ino vene mungolosika#9:9 A SIMBU INO VENE MUNGOLOSIKA: Nambe, a simbu yaivwa. njikeluka lalo, co Sala akakita mwana wa munalume.”
10Co kesi eci lika embwe. Oloni omwo vana va Lembeka vavali vakele na ishavo umolika, ikeye kukulwila yetu Isake. 11Omo kanda vasemuke nambe omo kanda valinge vyavivwa nambe vyavivi, ngeci cizango ca Njambi cakwangula citwaleleleo, kesi omwo vilinga embwe, oloni omwo kusana kwendi 12#Kus 25:23 Njambi walekele Lembeka ngwendi, “Mukulunu akapangela shongo yendi.” 13#Mal 1:2-3 Ngwe muvyendeka visoneka ngwavyo, “Yakomba munjazemene, oloni Isau njamuzindile.”
14Vikajo twendeka? Kuma Njambi kesi muka-vushunga ndi? Embwe, kesi ngoco. 15#Kut 33:19 Omwo wendekele kuli Mosesa ngwendi, “Njikatetela woshe uje injishaka kutetela, co njikazivila mema ku mbunge woshe uje injishaka kuzivila mema ku mbunge.” 16Ngecivene, vyuma vyoshe vyakundama, kesi ku vije vyashaka munu nambe vije vyalinga embwe, oloni a mema ku mbunge ya Njambi lika. 17#Kut 9:16 Omwo visoneka vyendeka kuli mwene wa Ingito ngwavyo, “Njakupwisile mwene ngeci njikupangese mukusholola nzili yange nakutsimanesa lutsimo lwange mu kaye mwoshe.” 18Ngecivene, Njambi wakala na mema ku mbunge kuli woshe uje yashaka, co akaluwisa mbunge ya woshe uje yashaka.
Vukalu vwa Njambi na mema ku mbunge
19Oloni umo weni endeka kuli yange ngwendi, “Nga cinapu ngacije, co Njambi asa kuwana vati mulonga wa munu na munu? Iyajo asa kukanangana cizango ca Njambi?” 20#Isa 29:16; 45:9 Oloni yove iyajo, musamba wange, ulikumbulule na Njambi? Ndeo ya vuma kuyasa kwihula munu uje waishongele ngwayo, “Omwo vikajo wanjimungila ngacije?” 21Uje muka-kushonga vindeo ali na moko yakupangesa vuje vuma mwoshe mwashakela, asa kushonga vindeo vivali a cipama cimolika ca vuma, ndeo imo yakupangesa vyuma vya seo, co ndeo ikwavo yakupangesa vyuma vyangoco. 22Co eci cinapu ca vushunga a vije vyanalingi Njambi. Njambi washakele kumwesa vukalu vwendi nakusholola nzili yendi. Oloni wasimpile nakuyanda ali vaje wakengele na vukalu, vaje wapandele kunyongesa. 23Co lalo washakele kusholola vumpau vwendi vwakama, vuje wetilile ali yetu vaje amwesa mema ku mbunge, yetu vaje navwaesa ngeci tutambule vumpau vwendi. 24Omwo tunapu vanu vaje vasanene, kesi lika akati ka vaYunda embwe, oloni lalo na akati ka vaje kesi vaYunda. 25#Hoz 2:23 Evi vikevyo vyalinakwendeka mu livulu lya Hoziya ngwendi,
“Vanu vaje kuvapwile vange
njikavatumbula ngwange, ‘Vanu vange.’
Muyati uje kunjazemene
njikavasana ngwange, ‘Vaka-cizemo cange.’
26 #
Hoz 1:10
Co ku mutambela kuje kuvavalekele ngwavo, ‘Kesi mu vanu vange,’
co kuje vene vakavatumbula vana va Njambi wakuyoya.”
27 #
Isa 10:22-23
Co Isaya atambeka ali vaIsalele ngwendi, “Nameme vanu va Isalele vanatumu ngwe lishen̄avu lya ku kenge ya mema a kalunga, oloni vavandondo lika vakovoka, 28omwo Shukulu Kalunga akasompa vwasi-vwasi vanu voshe va ano asi a simbu imolika nakumanesa.” 29#Isa 1:9 Ngwe muje mwendekele Isaya akulivanga ngwendi, “Nga Shukulu Kalunga Muka-nzili yoshe katusezeleleko vatekulwila, nga tunapu ngwe Sondoma na Ngomola.”
Muzimbu wauvwa nawo lalo unapu wa Isalele
30Ngecivene, twendeka ngwetu vaje kesi vaYunda, vaje kuvalipwisile vakevo vavenya vaka-vushunga ku mesho a Njambi, vavapwisile vaka-vushunga ku mesho endi akukulaela, 31oloni vanu va Njambi vaje vashakezekele lishiko ngeci livapwise vaka-vushunga ku mesho a Njambi, kuvaliwanene. 32Omwo vikajo? Omwo kuvajendamenene akukulaela oloni vajendamenene a vije vivalingile. Co vatanukile a “limanya lyakutanukisa” 33#Isa 28:16 ngwe muvyendeka visoneka ngwavyo,
“Kenga, njikaka limanya mu Siyone
lije likatanukisa vanu,
limanya lije likavawisa.
Oloni woshe uje akulaela kuli ikeye kakazivi shwamwa.”
Currently Selected:
Loma 9: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006