Loma 10
10
1Vakwetu, njishaka manene na mbunge yange yoshe ngeci vanu vange vovoke! Njilinakuvalombelela manene kuli Njambi! 2Omwo nji mukaleo wavo ngeci vakevo vanalyana manene kuli Njambi, oloni kulyana kwavo kesi kwa mana a vushunga. 3Omwo kuvazivukile ngila ije yakapwisa Njambi vanu ngeci vapwe vaka-vushunga ku mesho endi, oloni vakevo vaneseka kupangesa ngila yavo vavenya, ngecivene, kuvasele kulyana vakevo vavenya ku ngila ya Njambi ije yakapwisa vanu ngeci vapwe vaka-vushunga. 4Omwo Kilistu namanesa Lishiko, ngeci munu woshe uje akulaela vamupwise muka-vushunga ku mesho a Njambi.
Kwamena kunapu kwa voshe
5 #
VaLe 18:5
Mosesa wasonekele evi akupwisa munu muka-vushunga ku mesho a Njambi akwononoka Lishiko ngwendi, “Woshe uje ononoka Lishiko akayoya.” 6Oloni visoneka vyendeka akupwa muka-vushunga ku mesho a Njambi akukulaela ngwavyo, “Kesi ulihule yove vavenya ngwove, iyajo akalonda mwilu?” (Eci cinapu ngeci, ulinakushulula Kilistu asi). 7#Kwi 30:12-14 “Nambe kesi ulihule ngwove, iyajo akashelumuka mwisi ya kaye?” (Eci cinapu ngeci, ulinakutundisa Kilistu ku kutsa). 8Oloni evi vilinakwendeka ngeci, “Lijwi lya Njambi lili kuyehi nove, lili ku kanwa kove na mu mbunge yove” likelyo lijwi lyakukulaela lije tulinakwambulula. 9Nga ulitavela ngwove Yesu ikeye Mwene nakukulaela ngeci Njambi wamusangwile ku vatsi, ukovoka. 10Omwo akukulaela kwetu mukemwo vanatupwisa vaka-vushunga ku mesho a Njambi, akulitavela kwetu mukemwo tukovoka. 11#Isa 28:16 Visoneka vyendeka ngwavyo, “Woshe uje akulaela kuli ikeye kakazivi shwamwa.” 12Omwo eci cinendeka a vanu voshe, omwo kukwesi kwangula akati ka vaYunda na vaje kesi vaYunda, Njambi napu umo Shukulu Kalunga wa voshe, ikeye akavezikisa voshe vaje vatambeka kuli ikeye. 13#Njwe 2:32 Omwo ngwe visoneka vyendeka ngwavyo, “Woshe atambeka a lizina lya Mwene akovoka.”
14Oloni vatambeka vatijo kuli ikeye ngeci avakwase nga kuvakulaelele? Vatijo vakakulaela nga kuvazivile lijwi? Co vatijo vaziva lijwi nga kuvalyambulwile? 15#Isa 52:7 Co vatijo vambulula lijwi nga tunganda kuvavatumine? Ngwe muvyendeka visoneka ngwavyo, “Kunapu kuvwaelela kwakukomokesa omo tunganda vaija nakunena vin̄anda vyavivwa!” 16#Isa 53:1 Oloni kesi voshe vanatambula Vin̄anda Vyavivwa embwe. Isaya vavenya alinakwendeka ngwendi, “Shukulu Kalunga, iyajo wakulaelele muzimbu wetu?” 17Ngecivene, kukulaela kutunda akuziva, co kuziva kutunda akwambulula Kilistu.
18 #
Mya 19:4
Oloni njihula ngwange, mwa vushunga kuma kuvazivile lijwi ndi? Valizivile, omwo visoneka vyendeka ngwavyo,
“Omo mutambi wa lijwi lyavo washandokelele mu kaye mwoshe,
majwi avo etele na ku shongo ya asi oshe.”
19 #
Kwi 32:21
Co njihula lalo ngwange, kuma vanu va Isalele kuvazivisisile ndi? Mosesa ikeya vavenya wakulivanga kukumbulula ngwendi,
“Njikashangumuna muyati wakujeneka seo
ngeci vanu vange vakale na lifuwa,
njikashangumuna muyati wakujeneka mana
ngeci valuvalese vanu vange.”
20 #
Isa 65:1
Co Isaya nakusimpa wendekele ngwendi,
“Vanjiwanene vaje kuvanjishakezekele,
njasholokele kuli vaje kuvanjihwile.”
21 #
Isa 65:2
Oloni alinakwendeka ali Isalele ngwendi, “Simbu yoshe njashakele kutambula vanu vaka-kujeneka kwononoka vakevo lalo vaka-kutengulukila.”
Currently Selected:
Loma 10: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006