Loma 12
12
Kuyoya mukupangela Njambi
1Ngecivene, vakwetu, omwo mema ku mbunge a Njambi akama manene kuli yetu, njimilambelela ngwange, lilambuleni yeni vavenya kuli Njambi ngwe n̄ombelo yakuyoya, likundikeni ku vipangi vyendi nakumuvwaelelesa. Oku kukekwo kulemesa kwa vushunga kuje munapande kulinga. 2Kesi mulipwise ngwe vanu va muno mu kaye, oloni eceleni Njambi atengulule viyongola vya mu vimbunge vyeni. Asinoni mukazivuka cizango ca Njambi, vije vyavivwa nevi vimuvwaelelesa nevi vyakushungama.
3Omwo vwana njinatambula vwa mema ku mbunge a Njambi njilinakwendeka kuli yeni voshe ngwange, kesi muliyongole yeni vavenya kupwa muvakama manene kutuvakana omu mumunapu. Oloni, munapande kulikeesa mu viyongola vyeni, liiluleni yeni vavenya ngwe kukukulaela kweni kuje kwanamyana Njambi. 4#1 Koli 12:12 Omwo tuli na vilyo vyavingi mu muvila umolika, co cimo na cimo cili na vipangi vyaco. 5Mu ngila eyi vene, nambe tunapu tuvavangi, tunapu muvila umolika muli Kilistu, co yetu voshe vanatunungila kuli umo na mukwavo ngwe kulyangunuka kwa vilyo vya muvila umolika. 6#1 Koli 12:4-11 Ngecivene, tunapande kupangesa vwana vwetu vwakulyangunuka ngwe ku mema ku mbunge a Njambi aje anatumwesa. Nga vwana vwetu vunapu vwakwambulula lijwi lya Njambi, co tunapande kwambulula kupwisa ngwe nakukulaela kwetu tulinakwo, 7nga vwakupangela, co tunapande kupanga vene, nga vwakulongesa, tulongeseni vene, 8nga vwakutakamesa vakwetu, co tunapande kulinga ngacije vene. Woshe uje muka-kwana vakwavo napande kucilinga na lyovwa-ovwa, co woshe uje muka-kushwana napande kupanga manene na nzili, woshe uje amwesa ngozi kuli vakwavo napande kucilinga na mbwase.
9Cizemo cinapande kutungukwa. Zindeni vyuma vyoshe vije vinapu vyavivi, kakateyeni kuli vije vyavivwa. 10Lizemeni umo na mukwavo ngwe vandolome na vandokazi, co litakameseni nakulisingimika umo na mukwavo. 11Pangeni manene na nzili kesi mupwe volwa. Pangeleni Mwene nakulyakako na mbunge yoshe. 12Cinyangavili ceni cimivwaelelese, pweni vaka-lukakateya mu tuyando tweni, co lombeleni simbu yoshe. 13Lipangeleni vije mulinavyo na vakweni vaka-Yesu vaje vanajeneka, co tambuleni vangenzi mu vinjuvo vyeni.
14 #
Mat 5:44; Luk 6:28 Vezikiseni vaje valinakumiyandesa, eyo, vavezikiseni, co kesi muvasinge embwe. 15Vwaeleleni na vaje valinakuvwaelela, lileni na vaje valinakulila. 16#Vis 3:7 Yoyeni mulizivasano umo na mukwavo. Kesi mulyalese, oloni likeeseni mu vipangi.#12:16 LIKEESENI MU VIPANGI: Nambe, lingeni vusamba na vanu vakulikeesa. Kesi muliyongole yeni vavenya ngwe munapu vaka-kunyanyama.
17Nga umo nakuviisila, kesi umwilwisile vuvi vwendi lalo embwe. Lingeni vyavivwa ku mesho a vanu voshe. 18Lingeni vyuma vyoshe ngwe mumunasela nakuyoya mu kwoloka kuli munu na munu. 19#Kwi 32:35 Vasamba vange, kesi mulinge shambandinga, oloni eceleni vukalu vwa Njambi vucilinge. Omwo visoneka vyendeka ngwavyo, “Yange njilinga shambandinga, njikavelwisila fweto yavo, mwanendeka Shukulu Kalunga.” 20#Vis 25:21-22 Oloni, ngwe muvyendeka visoneka ngwavyo, “Nga muka-n̄ole yove ali na njala, mwane vyakulya, nga ali na lihwila, mwane mema anwe, omwo akulinga eci ulinakumulingisa ngeci azive shwamwa.” 21Kesi mutave vuvi vumihyane, oloni hyaneni vuvi na vuvwa.
Currently Selected:
Loma 12: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006