2 Mizimbu 6
6
Solomoni endeka kuli vanu va Isalele
(1 Vim 8:12-21)
1Asinoni Mwene Solomoni walombelele ngwendi,
“Shukulu Kalunga, yove waangwile kukala
mu mashelwa akuzivala.
2Ololo Shukulu njinakutungila Njuvo,
mu mwela uje wasa kukala myaka yoshe.”
3Ngecivene, vanu va Isalele voshe vemanene kuje vene. Co mwene watengulukile nakuvakenga, wavezikisile mbunga yoshe ya vanu va Isalele na vivezikiso vya Njambi. 4Wendekele ngwendi, “Shangazaleni Shukulu Kalunga Njambi ya Isalele! Ikeye nanyungu cikulaeso cije calingile kuli tate Ndaviti, omo wendekele ngwendi, 5‘Tunde a litangwa lije njatundisile vanu vange mu Ingito, kunjangwile nganda imo mu lifuti lyoshe lya Isalele ngeci vase kutungilamo Njuvo mwakunjilemesela, co kunjangwile munu umo ngeci atwamenene vanu vange va Isalele embwe. 6Oloni ololo njinaangula Yelusalema kupwa mwela uje vakanjilemesela, co lalo njinaangula yove Ndaviti kushwana vanu vange.’ ”
7Ngecivene, Solomoni wendekele lalo ngwendi, “Tate Ndaviti wakele na vutumbe vwakutunga Njuvo mwakulemesela Shukulu Kalunga Njambi ya Isalele, 8oloni Shukulu Kalunga wendekele kuli tate Ndaviti ngwendi, ‘Wayongwele mwamuvwa akushaka kunjitungila Njuvo, 9#2 Sam 7:1-13; 1 Miz 17:1-12 oloni yove kuukasa kunjitungila Njuvo. Kuvanga munove ikeye akanjitungilayo.’ ”
10“Co ololo Shukulu Kalunga nanyungu cikulaeso cendi. Njashwana tate Ndaviti kupwa mwene wa mu Isalele, co njinatungu Njuvo ya Shukulu Kalunga mwakumulemesela Shukulu Kalunga Njambi ya Isalele. 11Co lalo njinavwaesa mwela mu Njuvo ya Shukulu Kalunga wa Cikasa ca Cikumiiyo muje muli vitale vya mamanya vya cikumiiyo cije calikumiiye Shukulu Kalunga na vanu va Isalele.”
Lilombelo lya Solomoni
(1 Vim 8:22-53)
12Asinoni Solomoni wemanene kulutwe lwa mutula ku mesho a vanu voshe, co wolwele mavoko endi mwilu, co walombelele. 13(Solomoni watungile mutula wa vunengu wawakele mukati ka cipango. Wapwile mamita 2.2 mu vwihi, na mamita 1.3 mu vulaja. Co walondele aje a mutula, watsikamene kuje vanu voshe vasele kumumona, wolwele mavoko endi mwilu.) 14Walombelele ngwendi, “Shukulu Kalunga Njambi ya Isalele, kukwesi Njambi wakulifwa nove mwilu nambe asi wai! Yove wanyunga cikumiiyo cove ku vanu vove nakumwesa cizemo cove cije kucesi kutenguluka kuli vangamba vove omo vononoka kuli yove na vimbunge vyavo vyoshe. 15Unanyungu cikulaeso cove cije wakulaesele tate Ndaviti, co ku litangwa lya lelo majwi oshe anapumo. 16#1 Vim 2:4 Ngecivene, ololo, Shukulu Kalunga Njambi ya Isalele, njilinakukulomba ngeci unyunge cikulaeso cije wakulaesele tate omo wamulekele ngeci simbu yoshe ukaka mutekulwila wendi umo kupwa mwene wakushwana Isalele, nga vononoka mwamuvwa Mashiko ove ngwe mwalingile ikeye. 17Ngecivene, ololo, Shukulu Kalunga Njambi ya Isalele, tava vyuma vyoshe vipwe vyakushungama ngwe muwakulaesele ngamba yove Ndaviti.
18 #
2 Miz 2:6
“Oloni yove Njambi kumani wasa kukala asi akati ka vanalume na vanakazi ndi? Inonwa mwilu ya melu mwoshe kuwasa kufwamo, co vatijo Njuvo eyi njinakutungila ufwamo ndi? 19Nameme ngoco, Shukulu Kalunga Njambi yange, tolilila lilombelo lyange ngamba yove, nakulomba kwange. 20#Kwi 12:11 Nyunga eyi Njuvo mutanya na vutsiki. Yove wakulaesele ngeci, ou ukewo mwela uunaangula wakukulemesela, ngecivene, njizive omo njikenga ku Njuvo eyi nakulombela. 21Tolilila kukulomba kwange ngamba yove na ku malombelo a vanu vove va Isalele omo vakenga ku mwela ou nakulombela. Omo mwilu muwakala tuzive nakutusambesa.
22“Nga munu avulumuna mukwavo, co vamunena ku mutula wove mu Njuvo ino vene mukulisinga ngeci ikeye kesi na mulonga, 23Shukulu Kalunga, tolilila omo mwilu ngeci usompe vangamba vove. Hisa uje ali na mulonga ngwe mucinamupande, co ecela uje kesi na mulonga ngwe lalo mucinamupande.
24“Omo vanu vove va Isalele vavafungulula kuli vitozi vavo omwo vanalingi vuvi ku mesho ove, co omo vatenguluka vaija kuli yove ku Njuvo eyi nakulombela na kulikeesa kuli yove, 25co vatolilile omo mwilu muuli. Sambesa vivi vya vanu vove nakuvelwisila lalo ku lifuti lije liwaanene kuli vakevo na kuli vakukulwila vavo.
26“Omo uvindika nyonzi omwo vanu vove vanalingi vuvi ku mesho ove, oloni omo vatenguluka nakukenga ku Njuvo eyi nakulombela nakulilumbilisa kuli yove, 27yove Shukulu Kalunga, vatolilile omo mwilu muwakala, sambesa vivi vya vangamba vove vanu va Isalele, valongese kulinga vyavivwa. Cooni, Shukulu Kalunga, nyokesa nyonzi mu lifuti lyove, eli waanene kuli vanu vove kupwa vufuko vwa myaka yoshe.
28“Omo mu lifuti muli njala ya lyangengela nambe mushongo wakulitambwisa na vimbuto viziluka omo lilanga nambe vinjame vya vimbimba, nambe omo vanu vove vavalwisa ku vitozi vavo, nambe mushongo nambe kuvinja akati kavo, 29tolilila ku malombelo avo. Nga vanu vove va Isalele vaziva vusiwa ku mbunge, co nga volwela mavoko avo ku Njuvo ino nakulombela, 30ziva malombelo avo. Vatolilile omo mwilu muwakala, co vasambese nakuvakwasa. Yove lika wazivuka viyongola vya vimbunge vya vanu. Linga ku munu na munu ngwe mucinamupande, 31ngecivene, vanu vove vakwononoke simbu yoshe ivakakala mu lifuti lije liwaanene kuli vakukulwila vetu.
32“Omo vangenzi, vakevo kesi vaIsalele, vatunda ku lifuti lya kulyala vaziva nzili yove na vukama vwove, co vaija nakulombela ku Njuvo yove eyi, 33tolilila ku lilombelo lyavo. Vazive omo mwilu muwakala, co valingile vije vivakulomba, ngeci miyati yoshe ya muno mu kaye vakuzivuke nakukwononoka, ngwe muvakalingi vanu vove va Isalele. Ngeci vakazivuke ngwavo kuma eyi Njuvo injinatungu inapu mwela wakukulemesela.
34“Omo ushika vanu vove kuya ku nzita nakulwisa vitozi vavo, co valombela kuli yove, kwoshe kuje kuvali, nakukenga ku nganda ino unaangula na Njuvo eyi injinakutungila, 35tolilila malombelo avo. Vazive omo mwilu muwakala, co vahyanese.
36“Omo vanu vove valinga vuvi ku mesho ove, omwo kukwesi munu wakujeneka kulinga vuvi, cooni mu vukalu vwove wecelela vitozi vavo ngeci vavafungulule nakuvatwala ku lifuti lyeka ngwe vinzinda, nameme nga lifuti lije lili kulyala manene, 37tolilila ku malombelo a vanu vove. Nga mu lifuti lije vatenguluka nakulombela kuli yove, co valitavela ku vuvi vwavo na ku kupenga-penga kwavo kuvanalingi, co ziva malombelo avo, yove Shukulu Kalunga. 38Nga mu lifuti muje vatenguluka mwa vushunga na kulongwa, co valombela kuli yove oku vanakenge ku lifuti lino waanene kuli vakukulwila vetu, na nganda ino unaangula, na Njuvo eyi njakutungila, 39co tolilila malombelo avo. Omo mwilu muwakala vatolilile, co vazivileko mema ku mbunge nakusambesa vivi vyoshe vya vanu vove.
40“Ololo Shukulu Kalunga Njambi yange, kenga ali yetu, co tolilila malombelo atulombela mu mwela uno. 41Ngecivene, ololo katuka, Shukulu Kalunga Njambi, amo na Cikasa ca Cikumiiyo, cikeco cimweso ca nzili yove, kovela mu Njuvo yove ukalemo myaka yoshe. Vezikisa vaka-kukombelela vove mu vyoshe vivalinga, co vanu vove voshe vajolele mu ngozi yove. 42#Mya 132:8-10 Shukulu Kalunga Njambi, kesi uvyane mwene ou iwunaangula. Anuka cizemo cove ciwakele naco kuli ngamba yove Ndaviti.”
Currently Selected:
2 Mizimbu 6: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006