2 Mizimbu 5
5
1 #
2 Sam 8:11; 1 Miz 18:11 Omo Mwene Solomoni wamanesele vipangi vyoshe vya Njuvo ya Shukulu Kalunga, co wakovelesele vyuma vyoshe vije vyakundikile ishe Ndaviti kuli Shukulu Kalunga, siliva, na ngolinde, na vyuma vyeka, co wavyakele mu mulili yakutulikila mu Njuvo ya Shukulu Kalunga.
Solomoni akovelesa Cikasa ca Cikumiiyo mu Njuvo ya Shukulu Kalunga
(1 Vim 8:1-9)
2 #
2 Sam 6:12-15; 1 Miz 15:25-28 Asinoni Mwene Solomoni wasanene vantwama voshe va miyati na vikota vya Isalele vaije kuli ikeye ku Yelusalema ngeci vakashake Cikasa ca Cikumiiyo ca Shukulu Kalunga ku Siyone, Nganda ya Ndaviti, ngeci vacinene ku Njuvo ya Shukulu Kalunga. 3Co voshe vezile ku Ciwano ca Mapapela. 4Omo vantwama voshe vanakunguluka, co vaLevi vakakwile Cikasa ca Cikumiiyo, 5vacitwalele ku Njuvo ya Shukulu Kalunga. Co vaka-kukombelela na vaLevi lalo vatwalele Mbalaka Mwakuliwanena na vivala vyayo vyoshe ku Njuvo ya Shukulu Kalunga. 6Mwene Solomoni na vanu va Isalele voshe vakungulukilile kulutwe lwa Cikasa ca Cikumiiyo, nakukombelela vimanga na vingombe, vaje vapwile vavangi manene kuvasele kuvalava. 7Asinoni vaka-kukombelela vambatele Cikasa ca Cikumiiyo nakucaka mu Njuvo ya Shukulu Kalunga, co vacitumbikile mu Mwela Wakujela Manene, mwisi ya vakelumbi va mambava. 8Co mambava avo akujanjavala afwikilile kumo Cikasa na mikambo ije ivacambatelele. 9Co mikambo yapwile yailaja manene ngeci vishongo vyayo vasele kuvimona akwimana kulutwe lwa Mwela Wakujela Manene, oloni mikambo kuvasele kuyimona vaka-anja. (Co ije mikambo na lelo lino kuyicili.) 10#Kwi 10:5 Kumwakele cuma ceka lalo muje mukati ka Cikasa ca Cikumiiyo kuvanga vije vitale vya mamanya vivali vyaakelemo Mosesa ku Munkinda wa Sinai, omo Shukulu Kalunga walikumiiye na vanu va Isalele omo vatundile mu Ingito.
Vumpau vwa Shukulu Kalunga
11Vaka-kukombelela voshe vaje vakeleko valijelesele, nambe vakundamene ku munga ika nambe ika. 12Co vaLevi voshe vaje vapwile vaka-kwimba, Asafe, na Hemane, na Njendutune, na vanu va ku vikota vyavo, vazalele vuzalo vwa linyu. Co vaLevi vemanene ku mutambela wa mu ngangela kuyehi na mutula vakwatele vingenjo, na tulyalya, amo na vaka-kukombelela vakupwa 120 vaje vakele nakwimba malupembo. 13#1 Miz 16:34; 2 Miz 7:3; Eze 3:11; Mya 100:5; 106:1; 107:1; 116:1; 136:1; Njele 33:11 Vaka-kwimba valikumbasanene mukwimba malupembo, na vingenjo na vyakwimbisa vyeka omo vakele nakushangazala Shukulu Kalunga. Vembile ngwavo,
“Shangazaleni Shukulu Kalunga,
omwo ikeye wapwa wamuvwa,
cizemo cendi cakala ku myaka yoshe.”
Omo vaka-kukombelela vatundile mu Njuvo ya Shukulu Kalunga, co lishelwa lyakovelele nakushulisa mu Njuvo ya Shukulu Kalunga ngeci vaka-kukombelela kuvasele kwilukilamo nakupanga vipangi vyavo, 14#Kut 40:34-35 omwo vumpau vwa Shukulu Kalunga vwashulisile Njuvo ya Shukulu Kalunga.
Currently Selected:
2 Mizimbu 5: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006