1 Timoteu 6
6
Haga 6
1Timoteu mio tã ereꞌe ro Iesui mohey haria pe semiitꞌin me woꞌoꞌeropat haria pe -Uiwyriaꞌin waku watiꞌatumotypot kahato aipoꞌoro haria aikaꞌiwaria ere. Miꞌi tã watunug motꞌi pote ti aru ahehay wo aipotpap ete meiũran yt teꞌeruwekyryꞌi hin i aheTupana ete ihay aiwẽ piat hap ete paĩ ere o. 2Aipoꞌoro hat Aikaꞌiwat Iesui mohey hat pote waku watimotypot poꞌog aipotpap kahato hap upi katupono aheykeꞌet ewy topyhuꞌat Iesui mohey hap ete aimimohey ewywuat hat pote. Miꞌi pote ereꞌe i -Wẽtup yn aipotpap Aikaꞌiwat aito pote yt naku i watihaymoweukaꞌi aikaꞌiwat mesuwarotiat Iesui mohey hat pote. Waku watiꞌatukyꞌe aikotã aheykeꞌet ewy paĩ ere woꞌoꞌeropat haria Iesui mohey haria pe. Miꞌi e hap etiꞌatumuꞌe kahato o emimuꞌeria pe Timoteu.
Tukupteꞌen Iraniaꞌin Yt Pywo Pe I Iꞌatumimuꞌe Koꞌi Etiat
3Tukupteꞌen ti itote iraniaꞌin woꞌomuꞌe haria wẽtup sehay wuat haria yt Aikaꞌiwat Aipotypot Iesui etiat hin haria i yt uimienoi Iesui etiat yt ewywuat haria i. Taꞌi yt pywo pe hin i iꞌatumienoi. 4Miꞌiria ti -Uruto poꞌog uruikuap iraniaꞌin kai e haria yt taꞌatukuap i kahato pykai tuꞌuka yn sehay wo pykai. Kat e hap kat e hap sehay hit ete tuꞌuka teran toꞌope. Miꞌi hap kaipyi toꞌoehayꞌywyi yn toꞌope. Taꞌatupatꞌok patꞌok Iesui mohey haria tuꞌuka sehay wuat haype. Toꞌomohit mohit kahato toꞌope taꞌatuehay wo. -Yt naku i miꞌi miit iꞌatuꞌe yn toꞌope. Waku miꞌi haria yt eweiwesat i tuꞌuka teran eiwywo turan maꞌato yt ewetunug neiꞌo miꞌi haria ehewanikap mo maꞌato eweikyꞌe miꞌiria tuꞌuka teran pykai are. 5Iꞌatuwanetup hap yt toto kuap i. Sehay wakuat yt kat i iꞌatuwanetup hawe. Miꞌi pote tuꞌuka yn hap toineꞌen iꞌatuehay kaipyi iꞌatuwanetup hawyi. -Iesui atimohey hawyi hekat rakatno areineꞌen iꞌatuꞌe teꞌeruwepe yt miꞌi tã hin i pykai i. 6Uwe uwe iwepiit Tupana mikyꞌesat nug hap ete sio yt kat i tekat pykai miꞌi hat toineꞌen hekat kahato rakatno Tupana wanetup hawe. 7Pyno apo are kat koꞌi aiꞌywãꞌĩ turan waterut ahekareꞌen aipo hit pe. Pywo pe ti yt kat i waterut aipo pe. Iꞌewyte aikuꞌuro turan kat som apo watioto kuap. Yt kat kuap i wy. 8Toĩ aimiꞌu ahesokpe aikosap hamuat i wyti pote ti waku raꞌyn ahete waku watoꞌe aiwoꞌope. 9Maꞌato hekat kahato teran rakaria ti aru hewo hamuat ahiag ewamiri pe tominug saꞌag wywo ahiag esuki pe. Tominug saꞌag kaipyi iꞌatuewo kahato aria kape yt iweꞌeg i hap kaipyi taꞌatumikyꞌesat saꞌag upi. Miꞌi kape miitꞌin iꞌatuewo kahato aria kape hekat kahato teran rakaria. 10Timoteu aimaꞌat sese hap neꞌi ti uhekat iwato sese hap kyꞌe hap. Mio tã watuwanetup hap kaipyi ti tuut aikotã watunug saꞌag ahekat watipuẽti hamuat. Tukupteꞌen iraniaꞌin Iesui mohey haria saꞌawyꞌi wuat haria maꞌato mio miꞌi haria tiꞌatoiat raꞌyn imohey hap taꞌatuepiat hap taꞌatukat hap ete yn teꞌeruwemohey. Yt iꞌatuwepiit hin i raꞌyn miꞌiria. Koitywy iꞌatuꞌarot hap yn naꞌyn iꞌatuete. Yt teꞌeruwehum kuap i taꞌatuekat kahato pykai.
Iheg Me Watoineꞌen Ahoꞌopot Hap Pykai
11Maꞌato aito ti Tupana emiitꞌin sese aito miꞌi tupono waku yt watikyꞌesat i mekewat uhekat poꞌog hap -Atiꞌatukyꞌesat e hap. Poꞌog waku watikyꞌesat hãpyk kahato Tupana wywuat waku rakat. Tupana kyꞌe hap poꞌog waku imohey hap poꞌog waku aiwoꞌokyꞌe hap poꞌog waku. -Atimohey potꞌi Iesui aru ahoꞌopot kahato pykai aiꞌe hap yn waku aiwanetup hawe aiweperupꞌi hamuat hap kat hap yn aiwanetup hawe aito Tupana emiitꞌin hap ewy. 12Karãpe wateput yn hawyi meiũran watuwepokuap kahato miꞌi hap ete. Miꞌi hawyi putꞌok watoꞌe iraniaꞌin eꞌyian mete. Miꞌi hap ewy waku watoineꞌen Tupana mohey hap ete. Meiũran putꞌok watoꞌe Tupana ete wuatꞌi eꞌat piat aheineꞌen iwywuat hap tote. Miꞌi hamuat kape haꞌawytepyi te aikay kay karãpe -Woromohey En Iesui ere tope haty wo wuatꞌi Iesui mohey haria ehamo turan. 13Koitywy woropoꞌoro en Timoteu etunug yne ro epoꞌoro hap koꞌi Iesui mienoi koꞌi. 14Miꞌi hap upi ereineꞌen pote ti aru yt kat i saꞌag ekai topyhuꞌat Iesui e hap yn nug hamo ereineꞌen mote. Maꞌato iraniaꞌin woꞌomuꞌe miitꞌin kaipywiat hap etiwaure yne yt Iesui mienoi ewywuat i. Waku yne epoꞌoro hap koꞌi etunug yne Aikaꞌiwat aimiekatup putꞌok e hap kape. Miꞌi hap nug hamo woropoꞌoro Tupana ehamo iꞌewyte Aikaꞌiwat Aipotypot Iesui ehamo Wuatꞌi Miitꞌin Moieineꞌen hat ehamo. Saꞌawyꞌi Aikaꞌiwat Iesui yt tokenꞌẽ hin i morekuat Pũsiu Piratu pupi maꞌato tohenoi kahato pywuat sese sehay. Miꞌi hap ewy o ereineꞌen Timoteu. 15Meiũran ti aru Iesui Tupana tipoꞌoro i tepiat ikyꞌesat hap eꞌat pe toipoꞌoro i raꞌyn. Waku kahato Iesui miꞌi yn ni Wuatꞌi Miitꞌin Porekuat no. Miꞌi ti morekuaria Porekuat iꞌewyte wuatꞌi Kaꞌiwat. Waku kahato Iesui. 16Aito ti yne ikuꞌuro rakat nuaria aito maꞌato Iesui ti wuatꞌi eꞌat piat ieineꞌen sese hanuat raꞌyn teiam hẽtyhot kahato rakat pe. Yt uwe i tehaꞌat kuap howawi. Yt uwe i tokosap kuap heiam hẽtyhot rakat kape. Yt uwe i tehaꞌat kuap mesuwarotiat teha wo. Aheha yt putꞌok e i aiꞌakasa hamo. Pyno toꞌiro Iesui watimotypot katupono wuatꞌi kawiat hesaika rakat Miꞌi. Wuatꞌi eꞌat piat ieineꞌen hat miꞌi. Miꞌi tupono waku watimotypot Miꞌi.
17Pyno tukupteꞌen Iesui mohey haria aipyꞌasetpe hekat rakaria. Waku miꞌiria pe ereꞌe -Eweiꞌatoiat ro -Uito poꞌog wakuat iraniaꞌin kai eiwanetup hap ereꞌe o. Iꞌewyte yt ehekareꞌen neꞌi teiꞌo eweimohey maꞌato Tupana yn o eweimohey ere katupono ehekat yt eheineꞌen motꞌi hamuat hin i maꞌato Tupana hegyiꞌat kahato tutum kahato ahepe wuatꞌi aimowepiit kahato hamuat ere o. 18Wakuap nug haria wo o eweikupteꞌen ereꞌe. Waku eipotpap kahato wakuap nug hap koꞌi ete yn. Hegyiꞌat rakaria wo o eweikupteꞌen ere. Yt hekat i rakaria tukupteꞌen eimikuap pote eweimoꞌẽ miꞌiria pe ehekat ere o hekat rakaria pe Iesui mohey haria pe. 19Taꞌatunug taꞌatunapin epiat hap pote ti aru hekat rakaria wo sese tukupteꞌen atipy pe.
20Timoteu waku etopag yne mesuwat uiꞌe hap ewanetup hawe. Mesuwat uimiwan waku iheg me epyꞌa pe. Tukupteꞌen ti sehay wuat -Toꞌiro watuꞌuka e haria maꞌato yt etiꞌatuwesat reiꞌo miꞌiria. Tupana etiat iꞌatuehay saꞌag hap kape o yt ewaure kaꞌa teiꞌo. -Uruto poꞌog uruikuap uruwanetup hawe iꞌatuꞌe ahepe yt taꞌatuweꞌeg i haype. Pyno yt erewanetup motꞌi teiꞌo iꞌatuehay kape. 21Iꞌatuehay -Uito poꞌog iꞌatuꞌe hap iꞌatumaꞌat hamo topyhuꞌat. Tupana mohey hap taꞌatuꞌatoiat raꞌyn aikotã muap watiwaure hawyi ahoꞌowasat hap ewy. Pyno ahẽtup kahato Tupana pe -Tupana etiꞌatupoityro Timoteuꞌin torannia itotiaria gupteꞌen haria areꞌe ahẽtup.
Currently Selected:
1 Timoteu 6: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.