2 Timoteu 1
1
Haga Wẽtup 1
1Timoteu mesup uimiwan atipoꞌoro kuekatu uiꞌe hap. Uito eꞌywot Pauru mekewat Aipotypot miꞌairo tehay moherep wuatꞌi miitꞌin miatnuat hat. Karãpe etomohey Iesui hawyi pywo Aiporekuat sese ere o wuatꞌi pe. Miꞌi pote ti aru ereineꞌen wuatꞌi eꞌat pe Tupana wywo ere o katupono mio tã e hap ti saꞌawyꞌi te Tupana tomoherep uhepe. 2Taꞌi uhaꞌyru sese ewy ereineꞌen Timoteu. Worokyꞌe kahato en. Aiꞌywot sese ti Tupana iꞌewyte Aikaꞌiwat sese ti Iesui. Aat kaꞌap mio tã are Tupana pe -Waku etipowyro ro Timoteu egyiꞌat hap kaipyi. Waku erahaꞌat Timoteu kape ikyꞌe hap wywo are. Iwanetup hap wẽtup yn etum iwepiit hamuat are Tupana pe meiũpepyi eupi. 3Iꞌewyte -Waku kahato En uruꞌywot are. Taꞌi Tupana eheropat kahato hat uito Pauru. Emikyꞌesat ewy yn atunug neran. Aikotã saꞌawyꞌi aiꞌywania tunug emikyꞌesat ewy iꞌewyte uito atunug mesup are Tupana pe. Karãpe uiwatetup ewowi turan Timoteu -Waku kahato En Tupana are yn wãtym muo ihatꞌok ewy ewy are Tupana pe. 4Timoteu yt atiwaure kuap i aikotã eꞌyatypiat areineꞌen turanuat aikotã erewak uikyꞌe epiat haype hap. Uipap kahato ewowiat uiꞌakasa hamo hawyi atikuap uimowepiit kahato en hap. 5Uimowanetup kahato en Iesui mohey sese hap kape mekewat pywuat sese hap yt eso hin i Iesui mohey hap ete. Saꞌawyꞌi ti ehary Iroiti iꞌewyte ety Eunise tukupteꞌen imohey sese haria. Miꞌi hawyi koitywy en i raꞌyn iꞌatu ewywuat imohey sese hare en ereineꞌen.
Tupana Timoteu Moesaika Hatno Toineꞌen
6Miꞌi tupono woronapin Timoteu. Saꞌawyꞌi woroꞌatoiat en itote Iesui mohey haria akag wo. Miꞌi hap eꞌat pe areponug eꞌakag ete hawyi Tupana tum tesaika hap topotpap nug epiat hamo. Pyno waku ewatetup o miꞌi hap kape. 7Tupana tum naꞌyn ahepe Topaꞌãu aimoesaika kahato hap yt uwe pupiat i aikenꞌẽ hamo. Koitywy Topaꞌãu wo aipytꞌat nug kahato raꞌyn woꞌokyꞌe hamo. Miꞌi kaipyi koitywy watuwenapin kuap taꞌyn saꞌag nug hap akit hamuat. 8Yt eremoti teiꞌo Aikaꞌiwat ehay moherep hamo. Iꞌewyte uito areineꞌen woꞌopyhik hawe Iesui mohey hap upi pykai yt eremoti teiꞌo -Uito Pauru mepyt e hamo. Maꞌato waku ere -Uito iꞌewyte ahoꞌopot hawe areineꞌen wy mesuwat sehay wakuat moherep hap upi waku ere o Tupana pe. Uimoesaika hap oktan aru atunug ere o Tupana pe Timoteu. 9Tupana ahehakyeraꞌat hawyi ainug temiitꞌin wo. Yt aiwanetup kahu hap upi i yt ahewaku hap upi i maꞌato tomikyꞌesat no tegyiꞌat hap oktan ahehakyeraꞌat wuatꞌi eꞌat piat aikotã Tupana toꞌe nimo saꞌawyꞌi tutunug yne wuatꞌi hap yian mete -Atiꞌatuehakyeraꞌat ti aru Uhaꞌyru mohey haria e Iesui etiat hap ewy. 10Pyno koitywy watikuap kahato hegyiꞌat ahepiat hap katupono Aikaꞌiwat Iesui uut hawyi tuwemoherep taꞌyn ahepe aikotã aikuꞌuro hap kaipywiat aimoherep hamo. Tehay wakuat toimoherep taꞌyn ahepe aheineꞌen wuatꞌi eꞌat piat hamuat hap.
11Taꞌi Tupana uiꞌairo topotpoꞌoro sese wo wuatꞌi puat tehay moherep hamo miitꞌin atumuꞌe uhepiat hamo. 12Miꞌi hap upi ti ahoꞌopot aikotã aikotã hap koꞌi. Miitꞌin iꞌatumikyryꞌi kahato uhete maꞌato yt aremoti hin i Tupana ehay ete katupono atikuap kahato uiwy uimimohey Iesui. Miꞌi hap toikuap iꞌewyte uito atikuap are. Yne uimiium tepiat toiꞌatunug iheg me itote tuut hamuat kape. 13Timoteu epap kahato o uimienoi epiat pywuat sese sehay upi. Ewatetup miꞌi e hap koꞌi upi katupono aikotã aikotã ereineꞌen hamuat ahenoi epe. Miꞌi hap tote ereineꞌen wuatꞌi eꞌat pe. Etomohey Aikaꞌiwat Iesui. Etikyꞌe kahato Miꞌi. Miꞌi hawyi wẽtup piit ewy yn watoineꞌen Iesui wywo. 14Tupana Paꞌãu esaika hap topyhuꞌat kahato ahepe. Kat e hap kat e hap wakuap koꞌi tutum epe emohey haype. Miꞌi koꞌi o etat kahato etomoheg kahato ewanetup hawe uhaꞌyru.
15Uhyt Wikeru iꞌewyte uhyt Emosene yi Asia piaria uiꞌatoiat raꞌyn iꞌewyte itotiaria iraniaꞌin yt iꞌatuwese i raꞌyn uhete. 16Maꞌato mehin Onesiwuru ti yt uiꞌatoiat hin i paĩ. Uipowyro kahato miꞌi. -Tupana are etum o wakuap yn aiwy Onesiwuru pe imepytꞌin me are torannia iꞌyatypiaria wywo karania wo etum o wakuap Tupana are. Taꞌi uimowepiit hat kahato miꞌi. Yt tokenꞌẽ hin i uipyhik hap pupi. Tuut tuereto uipyhik hap kape. Yt tuwemoti hin i -Uito Pauru ekatuwy toꞌe hamo. 17Putꞌok e Huma pe hawyi yt toikuap i aiũpe uipyhik hap tawa Huma piat hap maꞌato miꞌi pykai uikat kahato. Meremo putꞌok toꞌe itotiat hawyi miꞌi hawyi uipuẽti. 18Tupana ahẽtup aiwy Onesiwuru upi. Etum egyiꞌat kahato hap Onesiwuru pe are. Etiꞌatumoehãite iꞌyatypiaria wywo are yn. Pyno Iesui tuut turan atikyꞌesat Onesiwuru pe haꞌup ikahu rakat are Tupana pe. Pywo etikuap kahato raꞌyn Timoteu aikotã saꞌawyꞌi areineꞌen tawa Ewesu piat turanuat uipowyro kahato hat Onesiwuru topyhuꞌat itote. Miꞌi hawyi ipoityro hap ahẽtup kahato Tupana kaipyi uito Pauru.
Currently Selected:
2 Timoteu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.