1 Timoteu 5
5
Haga 5
Aikotã Waku Aiwanetup Hap Hiwu Koꞌi Etiat
1Karãpe wẽtup ok eꞌyian tiꞌaparap Tupana pe pote yt ehoiroꞌi hoiroꞌi teiꞌo miꞌi miit ete. Yt naku i watimohit aseꞌiꞌin koꞌi hary koꞌi e. Maꞌato waku perupꞌi puo watinapin aimimotypot koꞌi waku -Papai Mamai yt naku i miꞌi tã watunug aito waku watoꞌe perupꞌi puo iꞌatukyꞌe hap wywo iporo pote. 2Miꞌi hawyi karãpe eꞌyian haryporia kawiat tiꞌaparap Tupana pe pote waku etiꞌatunapin perupꞌi puo. -Mamai ereꞌe popuo imotypot haype. Maꞌato iraniaꞌin makuptiaria tiꞌaparap Tupana pe pote waku etiꞌatunapin perupꞌi puo Uheinyt ereꞌe popuo yt iꞌatukyꞌesat popuo i.
3Waku hiwuria sese watipowyro heꞌaito kuꞌuro rakaria yt imepyt i te turanuat ikuꞌuro heꞌaito rakat yt hemiariru i te rakat. 4Waku hiwuria mepytꞌin me hemiariruꞌin me ereꞌe -Eweimoꞌẽ ro eityꞌin me eheharyꞌin me. Ewehaꞌup nug o eimotag hap Tupana mikyꞌesat ewy ereꞌe o hiwu mepytꞌin me hiwu emiariruꞌin me. 5Maꞌato tukupteꞌen hiwu sese koꞌi yt uwe i mipowyro koꞌi Tupana mohey haria taꞌatuhẽtup kahato Tupana kape ihatꞌok puo wãtym mo -Uruieineꞌen hap miꞌu sokpe etum o uruepe iꞌatuꞌe. 6Maꞌato hiwu tomikyꞌesat saꞌag nug hat ikuꞌuro rakat ewywuat toineꞌen Tupana wanetup hawe. Ipiit ihãite rakat wen maꞌato yt iweꞌeg i rakat pote. 7Timoteu etiꞌatunapin o hiwuria mepytꞌin hiwuria emiariruꞌin aikotã uimienoi ewy. Mesuwat ewy taꞌatunug mote yt uwe i teꞌeruwekyryꞌi kuap Iesui mohey haria ete. 8Maꞌato toineꞌen wẽtup ok eipyꞌaset pe -Yt atipowyro teran i uiꞌywot uity uimepytꞌin e hat miꞌi hat wyti ipun neꞌi raꞌyn Iesui mohey hap sese. Miꞌi hawyi topyhuꞌat poꞌog yt naku i Tupana ehay pun haria kai. 9Timoteu waku watipowyro hiwu iporo rakat 60 anu ieineꞌen hat heꞌaito wẽtup ok wywuat yn ieineꞌen hat miꞌi rakirẽ wuat heꞌaito kuꞌuro rakat. Miꞌiria etiꞌatuset pehik iꞌewywuaria wywo Iesui mohey haria miium Tupana piat kaipywiat iꞌatuieineꞌen hamo. 10-Wakuap yn nug hat meiẽ hiwu iꞌatuꞌe iraniaꞌin hap upi watikuap wakuat hiwu. -Saꞌawyꞌi tomepytꞌin erohik kahato hat iꞌatuꞌe. Meiẽ -Ereke ro uiꞌyat pe e hat wuatꞌi piat hat meiẽ iꞌatuꞌe hap upi watikuap wakuat hiwu. -Tupana emiit hoꞌopot haria powyro kahato hat meiũ iꞌatuꞌe ihakyꞌeꞌi rakaria eropat hat meiũ wuatꞌi eꞌat piat waku yn hap nug hat meiũ iꞌatuꞌe hap upi watikuap uwe wakuat hiwu. Miꞌi wahetpehik kuap Tupana mohey haria miium kaipywiat ieineꞌen hamo. 11Maꞌato yt etipehik teiꞌo hiwu ipakup te rakaria mekewat Tupana mohey haria miium kaipywiat gupteꞌen haria set kape katupono miꞌi meiũran ipakup te rakaria ti ikyꞌesat rẽ i iꞌatueꞌaito hap i raꞌyn. Taꞌatuwaure raꞌyn Aikaꞌiwat Iesui wẽtup taꞌatueꞌaito i raꞌyn kyꞌesat hap kyewi. Yt iweꞌeg i rakaria wo tukupteꞌen. 12-Uito ti aru yt karamuo i raꞌyn uheꞌaito an iꞌatuꞌe pykai. Iesui kape yn naꞌyn ti aru uipotpap taꞌatuꞌe pykai hiwu ipakup takaria meiũran taꞌatukyꞌesat i raꞌyn ihainia hawyi meremo taꞌatuwaure saꞌawyꞌi wuat taꞌatuehay. 13Miꞌi hawyi iraniaꞌin tuwemohapap kahato aiperup hap ete satꞌi satꞌi getap koꞌi upi neꞌi. Miꞌi hap kaipyi tuwemohapap woꞌokuasa kuasa i hap ete. Aiwuꞌuka hap neꞌi enoi enoi hap ete. Woꞌomaꞌatꞌi maꞌatꞌi hap ete yn ihay. Wemoti hap sehay saꞌag yt watikuap teran i rakat taꞌatuhuꞌat. 14Miꞌi tupono atikyꞌesat -Waku eꞌaito i ro watoꞌe ipakup te rakaria hiwu pe. Eꞌaito pakup i raꞌyn hawyi waku emepytꞌin hawyi mono etiꞌatueropat eꞌyat pe waku ereꞌe. Waku pe tukupteꞌen hiwuria Iesui mohey haria pote ti aru yt iꞌatuehay saꞌag kuap i ahewanikaptia imohey ahepiat hap ete. 15Iꞌewyte tukupteꞌen iraniaꞌin hiwuria saꞌawyꞌi te Iesui mohey haria miꞌiria wen maꞌato koitywy ahiagnia akag Satanai ehay upiat myhuꞌat haria miꞌiria. 16Ehenoi iraniaꞌin haryporiaꞌin me ihainiaꞌin me Iesui mohey haria pe -Toĩ wẽtup ok eꞌyat pe hiwu miꞌi pote waku eweipowyro eweipoi mekewat eꞌyat piat hiwu ereꞌe o. Yt eweweipoꞌoro teiꞌo eꞌyatypiat hiwu Iesui mohey haria miium wuat ipoi hamo katupono ti typyꞌi kahato hiwuria yt uwe i mipowyro koꞌi. Waku watiꞌatupowyro kahato hiwuria yt uwe i mipowyro koꞌi ereꞌe o Timoteu Iesui mohey haria pe.
Waku Tupana Motpap Haria Powyro Haria Wo Watoineꞌen
17Timoteu waku watiꞌatupowyro kahato Iesui mohey haria akag koꞌi saꞌup mo. Miꞌiria ti iꞌatupotpap kahato poꞌog iraniaꞌin kai aimuꞌe kahato Tupana ehay mohey hap ete pote waku watum poꞌog saꞌup miꞌiria pe. Typy ok miit potpap hap saꞌup ewy waku watum. 18Katupono saꞌawyꞌi Tupana toꞌe miwan me -Waĩ yt eweikytyt teiꞌo eihũ Wewato ahup ipotpap awati ehaꞌok hap etiat turan. Waku tenuk topotpap popuo e Tupana saꞌawyꞌi. Iꞌewyte ewetum o eheropat haria pe iꞌatuwepotpap hap ewy saꞌup atikyꞌesat e Tupana. Miꞌi hap ewy waku saꞌup watum ipotpap Tupana ehay etiat aimuꞌe haria pe. 19Timoteu waku wahenoi Iesui mohey haria pe -Yt eweiꞌatuehay mohey teiꞌo meremo aimuꞌe haria kuasa hap ete aiꞌakag kuasa hap koꞌi ete. Maꞌato waku hepama apo watoꞌe ikuap sese haria pe akasa sese haria pe typy ok myẽꞌym ok pe hap ewy. 20Maꞌato aiꞌakag tiꞌaparap pywo pote waku watinapin wahewaĩ wuatꞌi ehamo. Miꞌi hap watunug pote iraniaꞌin teꞌerokenꞌẽ iꞌewywuat saꞌag nug hap pupi. 21Timoteu etunug no haty wo yne yne enapin hap uhepiat hap ewy. Etiꞌatunapin uiꞌewy yne itotiaria toꞌewyꞌewy. Eꞌyian pupi o yt erekenꞌẽ teiꞌo eꞌywania pupi iꞌatunapin hamo. Ewy ok sese pupi iꞌewyte yt erekenꞌẽ teiꞌo inapin hamo maꞌato waku torannia etiꞌatunapin perupꞌi puo. Woronapin Tupana ehamo Iesui ehamo iꞌewyte atipy piaria wakuaria ehamo woronapin uhaꞌyru. 22Yt naku i aiꞌakag watnuaria watiꞌatuꞌairo meremo Timoteu aimuꞌe sese hanuaria are.
Karãpe iraniaꞌin ahãꞌãg saꞌag nug hamo waku -Waĩ yt atunug neran i watoꞌe. Iꞌewyte waku ereineꞌen pya saꞌag nug hap kai are. 23Timoteu yt naku i kahato ereineꞌen iꞌahuu kahato imeꞌen ete rakatno. Waku mohag Uwa hy etuꞌu emeꞌen mog hamo. Yt naku i yꞌy yn etuꞌu are.
24Tukupteꞌen yt nakuat i nug haria yne piat heremo rakaria. Miꞌi haria pe -Yt nakuaria i sese watoꞌe. Tupana miꞌapiheg wuaria watoꞌe. Iꞌewyte iraniaꞌin minug saꞌag yt heremo i rakaria tukupteꞌen. Miꞌiria ti yt watikuap i sio waku sio yt watoꞌe kuap i maꞌato putꞌok e raꞌyn iꞌatuminug saꞌag moherep hap eꞌat pe Tupana tomoherep yne aru yt heremo i rakat aiminug saꞌag. 25Iꞌewyte tukupteꞌen waku nug haria yne piat heremo rakaria. Iꞌewyte tukupteꞌen migꞌi wuat wakuap nug haria maꞌato meiũran heremo yne iꞌatuminug wakuap koꞌi Tupana tomoherep miꞌi hap koꞌi are.
Currently Selected:
1 Timoteu 5: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.