1 Timoteu 4
4
Haga 4
Meiũran Putꞌok E Sehay Saꞌag Ai Maꞌat Hamo
1Pyno koitywy Tupana Paꞌãu toꞌe kahato ahepe -Meiũran ikahuro hamo ti aru wẽtup ok wẽtup ok waureꞌe imohey tepiat hap ete. Miꞌi hawyi ti aru maꞌãu saꞌag miat taꞌatumaꞌat hap upi i raꞌyn teꞌeropyhuꞌat. Iꞌewyte ahiag koꞌi ehay enoi hap upi i raꞌyn teꞌeropyhuꞌat e Tupana ahepe. 2Mekewat eꞌat pe ahiag koꞌi eso eso hap upi pywo iꞌatuꞌe ahiag eso hap ete. Miꞌi tã e haria heso heso rakaria aimaꞌatꞌi maꞌatꞌi hanuaria. Yt taꞌatuhenoi teran hin i sehay pywuat taꞌatukuap sehay pywuat pykai. Saꞌawyꞌi iꞌatuwanetup hawe sehay toineꞌen -Ehenoi ro pywo rat e hap toineꞌen maꞌato koitywy yt kat i raꞌyn iꞌatukai iꞌatuwewaĩ hap katupono ti taꞌatuhep taꞌyn mekewat iꞌe hap taꞌatuwenapin hap teꞌeruwanetup hawiat. Koitywy yt kat i iꞌatuwemoti hap taꞌatuꞌeso atuꞌeso hamo. 3-Yt naku i eharyꞌi eꞌaito iꞌatuꞌe saꞌag. Yt naku i miꞌu watuꞌu yne iꞌatuꞌe saꞌag. Yt taꞌatukuap i aikotã Tupana tunug yne miꞌu mesuwat yi tote aimiꞌu wo. Toikyꞌesat waku aiꞌe popuo iꞌu hap. Iminug koꞌi tomohey haria poi hap tutunug tehay pywuat mohey haria mowepiit hamo tutunug kat koꞌi kat koꞌi som. 4Yne Tupana minug miꞌu koꞌi wakuat no tukupteꞌen. -Eminug yt naku i yt watoꞌe kuap i Tupana pe. Wakuat yn tutunug miꞌi tupono -Waku kahato emiium Tupana. Urumowepiit kahato En waku watoꞌe iꞌu hap eꞌyian mete watuwehum. 5Katupono saꞌawyꞌi Tupana toꞌe -Waku yne emiꞌu wo e. Miꞌi tupono mesup ti aito waku aiꞌe Tupana pe rakirẽ watenuk. Miꞌi tupono yne waku watuꞌu Tupana miium aimiꞌu wuat.
6Pyno mesuwat enapin hamo etiꞌatumuꞌe ro Iesui mohey haria Timoteu. Etiꞌatumuꞌe hãpyk kahato pote ti aru erepyhuꞌat Aipotypot Iesui eropat kahato hatno. Iꞌewyte etikuap kahato raꞌyn uhepiat imohey hap iꞌewyte sehay pywuat sese etiat etikuap taꞌyn. Miꞌi tupono atikyꞌesat poꞌog poꞌog eremuꞌe hap miꞌi etiatno. 7Ipoityꞌi kahato ti sehay yt Tupana mienoi kaipywiat i yt Tupana e hap ewywuat hin i. Miꞌi tupono waku waure wo miꞌi hap koꞌi kai. Yt kan hamo i watopotmuꞌe miꞌi hap koꞌi ete. Taꞌi poꞌog waku watoꞌomoesaika kahato Tupana e hamo Ipaꞌãu wo miitꞌin e hap koꞌi kai. 8Waku aiwesaika saika hap aipiit moheg hamo are maꞌato poꞌog waku wuatꞌi kai watuwesaika saika Tupana Paꞌãu e hap nug hamo. Katupono imikyꞌesat ewy watunug mote ipakup takatno watoineꞌen mesuwe. Iꞌewyte aikuꞌuro hap eꞌat pe wuatꞌi eꞌat pe aikai Tupana. 9Pyno Timoteu ahenoi teran epe sehay pywuat sese aimimohey aipyꞌa piat hap -Tupana ti wuatꞌi eꞌat piat ieineꞌen hat toineꞌen. Iꞌewyte wuatꞌi miitꞌin ehakyeraꞌat teran hat Tupana. 10Wuatꞌi tomohey haria Ehakyeraꞌat hat Miꞌi are ti epe paĩ. Miꞌi ti aimiekatup sese. Miꞌi kape yn watuwepotpap watuwesoꞌopot waku. 11Mio tã e hamo etiꞌatumuꞌe aat kaꞌap yne o miitꞌin. 12En ni kurum iwasu te. -Uruewatꞌyp neꞌi wyti en iꞌatuꞌe epe itote maꞌato o ereineꞌen iꞌatupyꞌasetpe waku kahato rakatno iꞌatuehamo ihay hãpyk kahato rakatno hãpyk kahato woꞌokyꞌe hatno ereineꞌen. Iesui mohey sese hatno ereineꞌen. Yt wẽtup i o saꞌag etunug iꞌatuwoꞌokyryꞌi hamo. Miꞌi tã ereineꞌen mote yt uwe i itotiaria emohit kuap nagnia emimuꞌeria iꞌatuewatꞌyp neꞌi en mytkai.
13Meiũran ti aru areto ewowi Timoteu maꞌato putꞌok are itote hap kape waku yt ewẽpohep teiꞌo mekewat Tupana miwan miat mowẽpap waꞌatunug haria piat hap ete. Miꞌi hawyi kat e hap kat e hap o etimoherep iꞌatuepe mekewat Tupana miwan miat mowẽpap hap. Iꞌewyte waku Tupana ehay mohey hamo kahato ereineꞌen. 14Saꞌawyꞌi Tupana tum epe tesaika hap topotpap nug hamuat tutum epe saꞌawyꞌi. Miꞌi tupono yt waure wo teiꞌo mekewat miium kai maꞌato waku etimoherep kahato hesaika hap miitꞌin me. Saꞌawyꞌi Tupana ehay moherep haria teꞌeroꞌe epe -Tupana miꞌairo en iꞌatuꞌe. Iꞌewyte Iesui mohey haria akag koꞌi teꞌeruweponug eꞌakag ete -Tupana potpap nug hat en taꞌatuꞌe haype. Miꞌi tupono waku etimoherep kahato hesaika hap imiium epiat miitꞌin me. 15Timoteu waku mesup uiꞌe hap sepap kahato hatno ereineꞌen. Miꞌi pote ti aru wuatꞌi sehaꞌat haria -Pywo Timoteu tuwemotag kahato Tupana emiit no iꞌatuꞌe. 16Eweꞌeg wo o Timoteu koran tiꞌitu eremaꞌat neꞌi. Iꞌewyte eweꞌeg wo o emienoi Tupana ehay mienoi aparap hap pupi. Miꞌi tã etunug aat kaꞌap pote ti aru ehakyeraꞌat Tupana emimuꞌeria wywo are.
Currently Selected:
1 Timoteu 4: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.