Revelesin 5
5
Skrol wetem sevenfala tambu mak
1Mi#Esikiel 2:9-10; Aesaea 29:11. lukim moa wanfala skrol#5:1 “wanfala skrol” Skrol hemi wanfala longfala pepa wea olketa save rolem an olketa raet long hem olsem wankaen buk. Skrol ya hemi piksa fo olketa samting wea bae hemi hapen bihaen. God nao hemi save long olketa samting ya bat hemi haed long evriwan moa. wea man hu hemi sidaon long tron hemi holem long raet han blong hem. Disfala skrol ya olketa bin raetem olketa toktok long tufala saet blong hem. Skrol ya, olketa satem finis wetem sevenfala tambu mak. 2Nao mi lukim moa wanfala enjel hu hemi garem bikfala paoa an hemi singaot bikfala olsem, “?Hu nao hemi fit fo brekem olketa tambu mak ya an fo openem skrol ya?” 3Bat no eni man long heven o long wol o long ples blong olketa man dae,#5:3 “long ples blong olketa pipol hu i dae finis” Long langguis long Grik hemi sei, “long andanit long wol ya”. hemi save openem skrol ya fo luk insaet long hem. 4Taem ya nomoa, mi krae fogud nao, bikos olketa no faendem eni man hu hemi fit fo openem skrol ya fo luk insaet long hem. 5Bat#Jenesis 49:9; Aesaea 11:1, 10. wanfala long olketa bikman ya hemi tok olsem long mi, “Yu no krae. !Lukim! Laeon blong traeb blong Jiuda,#5:5 “Laeon blong Jiuda” Hemi wanfala nem blong King Deved, an Kraes nao hemi bikfala king olsem Deved bifoa. Lukim Jenesis 49:9-10. disfala nambawan man wea hemi bon kam long traeb blong Jiuda an hemi nambawan lida hu hemi save falom olo blong hem Deved, hem nao hemi winim faet ya finis. So hem nao hemi save brekemaot sevenfala tambu mak ya an openem disfala skrol.”
6Nao#Aesaea 53:7; Sekaraea 4:10. mi lukim moa wanfala Smolfala Sipsip#5:6 “Smolfala Sipsip” Diswan hemi minim Jisas Kraes, an Jon hemi save yusim disfala piksa olowe. Kraes hemi Smolfala Sipsip blong God fo sakrifaesim, from hemi tekem ples blong olketa sakrifaes long Oltestamen. Lukim Fas Korin 5:7. wea hemi stanap long frant long tron ya wea fofala animol ya an olketa bikman i stap raonem hem. An Smolfala Sipsip ya hemi luk olsem olketa bin kilim hem dae. Hemi garem sevenfala hon#5:6 “sevenfala hon” Hon hemi olsem piksa wea hemi minim hemi garem bikfala paoa. long hem an sevenfala ae tu. Olketa ya nao seven gudfala spirit blong God,#5:6 “seven gudfala spirit blong God” Spirit blong God hemi Spirit blong Kraes tu. Lukim Revelesin 1:4. wea hemi sendem olketa fo goaot evriwea long wol. 7Smolfala Sipsip ya hemi go nomoa an tekemaot skrol ya from raet han blong man hu hemi sidaon long tron ya. 8An#Sams 141:2. taem hemi tekem skrol ya, fofala animol ya wetem tuenti-foa bikman ya, olketa nildaon long frant long Smolfala Sipsip ya fo mekhae long hem. Evriwan olketa garem gita, an olketa holem tu olketa gol baol. Olketa baol ya olketa fulap long insens wea hemi olsem olketa prea blong olketa pipol blong God. 9An#Sams 33:3; 98:1; Aesaea 42:10. olketa gohed fo singim wanfala niufala singsing wea hem sei olsem,
“Yu nao man wea yu fit fo tekem skrol ya
an brekem olketa tambu mak long hem.
Bikos olketa bin kilim yu dae,
an disfala blad blong dae blong yu
hemi peimaot olketa pipol#5:9 “peimaot olketa pipol” Lukim “Slev” long diksonari. fo God.
Olketa pipol ya i stap kam long evri traeb
an long evri langguis
an long evri laen long wol
an long evri kantri.
10Yu#Eksodas 19:6; Revelesin 1:6. bin mekem olketa fo kamap wan pipol wea yu King ovarem,
an yu bin mekem olketa fo kamap prist
fo mekhae long God blong yumi.
An bae olketa nao gohed fo rul ovarem olketa pipol long wol.”
11Nao#Daniel 7:10. taem mi luk go moa, mi herem singsing blong plande milion enjel an blong plande moa wea hemi had fo kaontem olketa. Olketa stanap raonem tron wetem fofala animol an olketa bikman ya. 12An olketa gohed fo singsing bikfala olsem,
“Hem nao Smolfala Sipsip
wea olketa pipol bin kilim hem dae.
Hemi fitim fo yumi preisim hem,
from bikfala paoa blong hem
an olketa risis blong hem
an waes tingting blong hem
an strong blong hem.
So hemi fitim fo yumi mekhae long hem
an liftimap nem blong hem
an preisim hem.”
13Nao mi herem toktok blong evri laef samting wea God hemi bin mekem. Olketa samting wea i stap insaet long heven an long wol an long solwata an long ples blong man dae, evriwan long olketa gohed fo singsing olsem,
“Disfala man hu hemi sidaon long tron
wetem disfala Smolfala Sipsip tu,
yumi preisim tufala evritaem an olowe.
Yumi mekhae long tufala
an liftimap nem blong tufala,
an preisim tufala fo bikfala paoa blong tufala.”
14Den fofala animol ya olketa ansa olsem, “Amen.” An olketa bikman ya olketa nildaon an wosipim tufala.
Currently Selected:
Revelesin 5: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.