2 TIKRONIKA 33
33
Ta Manase na Amoni, tihosi ta Yuda.
1Manase a a ri wa malembe ya khume na mambirhi loko a sungula ku fuma, kutani a fuma malembe ya 55 eYerusalema.
2A endla leswo biha emahlweni ka Yehovha, a landza manyala ya matiko lawa Yehovha a ma hlongoleke emahlweni ka vana va Israele. 3A pfuxa tindhawu leti tlakukeke leti vumbuluxiweke hi Hezekiya, tata wa yena; kutani a akela va Baali tialitari, a endla ni swifaniso swa Axera; a va a khinsamela vandla hinkwaro ra matilo, a swi tirhela. 4A aka tialitari endlwini ya Yehovha, leyi Yehovha a nga vula, a ku: “Vito ra mina ri ta va emutini wa Yerusalema, hilaha ku nga heriki.” 5A akela vandla hinkwaro ra matilo tialitari eswivaveni leswimbirhi swa Yindlu ya Yehovha. 6A nghenisa vana va yena va xinuna endzilweni, enkoveni wa vana va Hinomu; a tinyiketa tinhlolo, ni vuloyi, ni mhondzo; a tiyisa lava vitanaka vafi, ni vangoma; a ya emahlweni hi ku endla ku tlurisa leswo biha emahlweni ka Yehovha ku n'wi pfuka. 7A yimisa ni xifaniso lexi vatliweke, xi ri lexi a xi endleke, endlwini ya Xikwembu, leyi Xikwembu xi nga vula eka Davhida ni ka Solomoni n'wanakwe xi te: “Endlwini leyi, ni le mutini wa Yerusalema lowu ndzi wu hlawuleke exikarhi ka tinxaka hinkwato ta Israele, ndzi ta veka vito ra mina hilaha ku nga heriki. 8Ndzi nga ka ndzi nga ha endli leswaku sondzo ra Israele ri tshinela kule ni tiko leri ndzi ri vekeleke vatata wa n'wina, loko kunene va chivirika ku endla hinkwaswo leswi ndzi va leriseke swona, va hlayisa nawu hinkwawo, ni marito, ni ku lerisa, swi ri leswi lerisiweke ha Muxe.” 9Manase a rhendzelekisa va Yuda ni vaaki va Yerusalema, ku endla leswo biha, hi ku tlurisa matiko lawa Yehovha a ma heriseke emahlweni ka vana va Israele. 10Kambe Yehovha a tshama a vulavula na Manase ni tiko ra yena; ntsena a va yingisanga nchumu.
11Kutani Yehovha a tisa eka vona ku va pfuka, tindhuna ta hosi ya Asiriya, tona ti khoma Manase exikarhi ka mitwa, ti n'wi boha hi tiketana ta koporo, ti n'wi yisa eBabilona. 12Kuteloko a ri ekhombyeni, a khongela emahlweni ka Yehovha, Xikwembu xa yena, a titsongahata ngopfu emahlweni ka Xikwembu xa vatata wa yena. 13Kakuloko a xi khongela, Xikwembu xi yingisa ku khongela ka yena, kutani xi n'wi tlherisela Yerusalema, eku fumeni ka yena, kutani Manase a tiva leswaku Yehovha hi xona Xikwembu. 14Endzhaku ka sweswo a aka rirhangu ra le handle, evupeladyambu bya muti wa Davhida, tlhelo ra Gihoni, enkoveni, ni ku fika enyangweni ya tinhlampfi, a rhendzela ntsunga ha rona, a ri tlakusa ngopfu; a veka ni tindhuna ta mavandla emitini hinkwayo ya makhokholo ya Yuda.
15Kutani a susa endlwini ya Yehovha, swikwembu swa matiko, ni xifaniso, ni tialitari hinkwato leti a ti akeke entshaveni ya Yindlu ya Yehovha, na Yerusalema, a swi cukumeta handle ka muti. 16A pfuxa alitari ya Yehovha, a humesa kona magandzelo ya ku khensa ni ya ku dzuna; a byela va Yuda ku tirhela Yehovha, Xikwembu xa Israele. 17Kambe tiko a ri tshikanga ku gandzela eswitsungeni; ntsena a va gandzela kona Yehovha, Xikwembu xa vona.
18Timhaka leti seleke ta Manase, ni xikhongelo xa yena eka Xikwembu xa yena, ni marito ya vavoni lava vulavuleke na yena hi vito ra Yehovha, Xikwembu xa Israele, swi tsariwile ebukwini ya Tikronika ta tihosi ta Israele. 19Ni xikhongelo, xa yena ni ku hlamuriwa ka xona ni swidyoho swa yena, ni ku homboloka ka yena, ni ndhawu leyi a akeke eka yona tindlu ta switsunga, ni laha a yimiseke kona swifaniso swa Axera, ni swifaniso leswi vatliweke loko a nga si titsongahata, swi tsariwile etimhakeni ta vavoni.
20Manase a etlela ni vatata wa yena, va n'wi lahla endlwini ya yena Kutani Amoni, n'wana wa yena, a fuma ematshan'weni ya yena.
21Amoni a a ri wa malembe ya 22 loko a sungula ku fuma, a fuma malembe mambirhi eYerusalema. 22A endla leswo biha emahlweni ka Yehovha, hilaha Manase, tata wa yena, a endleke hakona; Amoni a gandzela swifaniso hinkwaswo leswi endliweke hi tata wa yena, a swi tirhela. 23A nga titsongahatanga emahlweni ka Yehovha hilaha Manase tata wa yena a titsongahateke hakona; hikuva yena Amoni a dyoha hi ku tlurisa. 24Kutani malandza ya yena ma endla makungu ya ku n'wi pfukela, ma n'wi dlaya endlwini ya yena. 25Kutani va tiko ra Yuda va dlaya hinkwavo lava pfukeleke hosi Amoni kutani vanhu va tiko va veka Yosiya n'wana wa yena, ku va hosi ematshan'weni ya yena.
Currently Selected:
2 TIKRONIKA 33: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.