2 TIKRONIKA 32
32
Ta ku hlasela ka Senakeribi.
1Endzhaku ka timhaka leti ni ku hanya loku lulameke loku, Senakeribi, hosi ya Asiriya, a ta, a nghena etikweni ra Yuda, a rhendzela miti ya makhokholo, a rhandza ku nghena eka yona. 2Hezekiya, kuteloko a vonile leswaku Senakeribi a tile, a lava ku hlasela Yerusalema, 3a endla makungu ni tindhuna ta yena, ni tinhenha ta yena ku siva swihlovo swa mati leswi ngi swi ri handle ka muti, kutani va n'wi pfuna. 4Ku hlengeletiwa vunyingi lebyikulu bya vanhu, kutani va siva swihlovo hinkwaswo ni swinambyana leswi khulukelaka exikarhi ka tiko, va ku: “Tihosi ta Asiriya loko ti ta ti nga kumela yini mati ya ku tala xana?” 5Kavaloko a tiya mbilu, a lunghisa rirhangu hinkwako laha ri mbundzukeke kona, a lehisa makhokholo, kutani a aka rirhangu rin'wana ehandle, a tiyisa Milo emutini wa Davhida, a endla ni matlhari ya ku tala, ni switlhangu. 6A veka tindhuna ta nyimpi exikarhi ka tiko, kutani a va hlengeleta eka yena erivaleni ra nyangwa ya muti, a vulavula hi marito lama hlanganeke ni timbilu ta vona a ku: 7“Tiyani timbilu, mi tiya! Mi nga chavi, mi nga herisiwi timbilu hi hosi ya Asiriya ni vunyingi lebyi nga na yena; hikuva lava nga na hina va tlula lava nga na yena. 8Voko ra nyama ri na yena, kambe Yehovha, Xikwembu xa hina, u na hina ku hi pfuna ni ku lwa nyimpi ya hina.” Kutani tiko ri tiyisiwa hi marito ya Hezekiya, hosi ya Yuda.
9Endzhaku ka sweswo, Senakeribi, hosi ya Asiriya, loko a ri karhi a rhendzela Lakixi, a ri ni nyimpi ya yena hinkwayo, a rhuma malandza ya yena Yerusalema, eka Hezekiya, hosi ya Yuda, ni ka hinkwavo va Yuda lava ngi va ri Yerusalema, va ku eka vona: 10“Senakeribi, hosi ya Asiriya, u vurisa sweswo, a ku: ‘Mi tshemba yini, leswi mi tshamaka mi tipfalele Yerusalema? 11Xana Hezekiya a nga mi kuceteli ku tinyiketa rifu hi ndlala ni torha, loko a ku: “Yehovha, Xikwembu xa hina, u ta hi kutsula evokweni ra hosi ya Asiriya”? 12A hi yena Hezekiya la heteke tindhawu leti tlakukeke ta yena ni tialitari ta yena, ni loyi a nga byela va Yuda ni va Yerusalema, a ku eka vona: “Mi ta khinsama emahlweni ka alitari yi ri yin'we, mi hisa kona mirhi ya risuna, xana”? 13A mi tivi leswi endliweke hi mina ni vatata wa mina eka vanhu hinkwavo va matiko xana? Xana swikwembu swa matiko lawa swi kumile matimba ku ponisa matiko ya swona evokweni ra mina-ke? 14Hi xihi xikarhi ka swikwembu hinkwaswo swa matiko lawa vatata wa mina va ma yiriseke lexi koteke ku ponisa tiko ra xona evokweni ra mina-ke? 15Sweswi Hezekiya a nga tshuki a mi xisa, a nga ha mi kuceteli hi mukhuva lowu kambe mi nga pfumeli ka yena; hikuva a ku na xikwembu xa tiko rihi ni rihi ni xa ku fuma kwihi ni kwihi, le xi koteke ku ponisa tiko ra xona evokweni ra mina, ni le mavokweni ya vatata wa mina: swi tsandza ni Xikwembu xa n'wina, xi nga ka xi nga mi ponisi evokweni ra mina!’ ”
16Malandza ya yena ma engeta ma sandza Yehovha Xikwembu, na Hezekiya, nandza wa yena. 17A tsala ni matsalwa ya ku sandza Yehovha Xikwembu xa Israele, a ku: “Hilaha swikwembu swa matiko ya misava swi nga ponisangiki matiko ya swona evokweni ra mina, na xona Xikwembu xa Hezekiya xi nga ka xi nga ponisi tiko ra xona evokweni ra mina.” 18Kavaloko va huwelela hi matimba hi ririmi ra Vayuda eka vanhu va Yerusalema, lava ngi va ri erirhangwini, ku va chavisa ni ku va rhurhumerisa va ta tiva ku nghena emutini. 19Va fanisa timhaka ta Xikwembu xa Yerusalema ni timhaka ta swikwembu swa matiko ya misava, leswi endliweke hi mavoko ya vanhu. 20Kambe hosi Hezekiya a khongela emhakeni leyi a ri na Esaya, n'wana Amotsi, muprofeta, va huwelela eka tilo.
21Kavaloko Yehovha a rhuma ntsumi leyi yi nga lovisa tinhenha hinkwato ni vafambisi, ni tindhuna emixaxeni ya hosi ya Asiriya; kutani Senakeribi a tlhelela etikweni ra yena a ri ni tingana; kutani, kuteloko a nghenile endlwini ya xikwembu xa yena, lava humeke exifungheni xa yena va n'wi dlaya kona hi tlhari. 22Yehovha a ponisa Hezekiya ni vaaki va Yerusalema, evokweni ra Senakeribi, hosi ya Asiriya ni le mavokweni ya hinkwavo, a va hlayisa ematlhelweni hinkwawo. 23Vanhu lavo tala a va tisa mihlengo eka Yehovha eYerusalema, ni swilo swa risima eka Hezekiya, hosi ya Yuda, a ko a tlakusiwa, endzhaku ka swona, emahlweni ka matiko hinkwawo.
24Emasikwini lawa Hezekiya a vabya ku yisa eku feni; kutani a khongela Yehovha, Yehovha a n'wi hlamula, ni ku n'wi kombisa mahlori. 25Kambe Hezekiya a nga tlheriselanga Xikwembu hilaha a katekisiweke hakona, hikuva mbilu ya yena yi tikurisa; ku kariha ka Yehovha ku va kona henhla ka yena ni le henhla ka Yuda na Yerusalema. 26Kambe kuteloko Hezekiya a titsongahatile hikwalaho ka ku tikurisa ka mbilu ya yena, swin'we ni vaaki va Yerusalema, vukari bya Yehovha a byi telanga vona emasikwini ya Hezekiya.
27Hezekiya a va ni rifuwo lerikulu ngopfu, ni ku twala lokukulu ngopfu; a tilavele xuma xa silivhere, ni xa nsuku, ni xa maribye ya risima, ni xa mirhi ya risuna, ni xa switlhangu, ni swa tinxaka hinkwato ta mitirho leyi navelekaka; 28a tiakela tindlu ta vuhlayiselo bya koro, ni bya vhinyo ni bya mafurha, ni matshanga ya swifuwo swa tinxakaxaka, a tilavela ni mitlhambi ya swona. 29A tiakela miti, kutani a va ni mitlhambi leyo tala ya swifuwo leswikulu ni leswitsongo; hikuva Xikwembu a xi n'wi nyikile rifuwo lerikulu ngopfu.
30Hi yena Hezekiya la nga siva mati ya Gihoni hi le henhla, a ma fambisa ehansi hi ndlela ya ku lulama evuxeni bya muti wa Davhida. Sweswo Hezekiya a kateka emitirhweni ya yena hinkwayo. 31Kakuloko tihosi ta Babilona ti rhuma tintsumi eka yena ku vutisa mahlori lama humeleleke etikweni ra Israele, Xikwembu xi n'wi tshika ku n'wi ringa xi ta tiva hinkwaswo leswi ngi swi ri embilwini ya yena.
Ku hela ka ku fuma ka Hezekiya.
32Timhaka leti seleke ta Hezekiya ni vukhongeri bya yena, swi tsariwile ebukwini ya xivono xa Esaya, n'wana Amotsi, muprofeta, ebukwini ya tihosi ta Yuda ni ta Israele. 33Hezekiya a etlela ni vatata wa yena, kutani va n'wi lahla endhawini leyi tlakukeke, exikarhi ka masirha ya vana va Davhida; hinkwavo va Yuda ni vaaki va Yerusalema, va n'wi dzunisa loko a file; kutani Manase, n'wana wa yena, a fuma ematshan'weni ya yena.
Currently Selected:
2 TIKRONIKA 32: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.