Esther Greek 7
7
O le Amio Leaga a Hamanu ‘ua Fa‘ailoa; ‘ua Fa‘atautauina Hamanu
1‘Ua ō atu le tupu ma Hamanu e taumamafa fa‘atasi ma le masiofo o Eseta. 2‘Ona fai atu ai lea o le tupu ‘iā Eseta i lenā aso e lua, a o fai le taumafataga o le uaina, “Le masiofo e, Eseta, se a le mea ‘e te ole mai ai? e avatua lava ‘iā te oe; pe se a fo‘i le mea ‘e te fa‘atoga mai ai? e o‘o lava i le vaeluaina o le mālō e faia lava.”#Ese 5.3, 6; 9.12
3‘Ona tali mai lea e le masiofo o Eseta, ‘ua fa‘apea mai, “Le tupu e, ‘āfai ‘ua alofaina a‘u e oe, ‘āfai e lelei fo‘i i le tupu, se‘i e fa‘aola mai ‘iā te a‘u i lo‘u ole atu, ‘ia fa‘aola fo‘i lo‘u nu‘u i lo‘u fa‘atoga atu; 4auā ‘ua fa‘atauina i matou, o a‘u ma lo‘u nu‘u, ‘ina ‘ia fa‘aumatia, ma ‘ia fasiotia, ma ia fano. ‘Ae ‘āfai ana fa‘atauina atu i matou o tane ma fafine e fai ma pologa e ui ‘ina lē mafai i le ‘ua ita mai ‘ona faia o se mea e tusa ‘ona aogā ma mea a le tupu a fa‘amaumauina, a ‘ua ‘ou fa‘alologo.”#3.9, 13
5‘Ona fai atu lea o le tupu o Asueru, ‘ua fa‘apea atu i le masiofo o Eseta, “Po o ai lenā? po o fea o i ai lē ‘ua manatu i lona loto ia faia fa‘apenā?”
6‘Ona fai mai lea o Eseta, “O le tagata ‘ua ita mai ma fa‘asauā mai, o lenei tagata amio leaga o Hamanu.”
‘Ona mata‘u tele ai lea o Hamanu i luma o le tupu ma le masiofo. 7‘Ona tula‘i lea o le tupu nai le taumafataga o le uaina ‘ua ita, ‘ua alu i le fanua o le maota. ‘Ona tula‘i lea o Hamanu e ‘ai‘oi i le masiofo o Eseta, ‘ia fa‘aolaina o ia; auā ‘ua ia iloa ‘ua tonu i le tupu e fa‘ao‘o ‘iā te ia se leaga. 8‘Ua fo‘i atu le tupu mai le fanua o le maota i le fale na fai ai le taumafataga o le uaina, ‘ua pa‘ū fo‘i Hamanu i le moega o i ai Eseta; ‘ona fai ane lea o le tupu, “Pe a toso ‘ea fo‘i le masiofo i o‘u luma i le fale?”
‘Ua mavae atu le ‘upu i le fofoga o le tupu, ‘ona latou ufitia lea mata o Hamanu. 9‘Ua fai ane fo‘i i luma o le tupu e Harepono, o le tasi eunuka ia, “Fa‘auta fo‘i i le la‘au na saunia e Hamanu mo Moretekai o lē na ta‘u le mea e sao ai le tupu, o lo‘o tu i le fale o Hamanu, e limagafulu kupita lona maualuga.”
‘Ona fai atu lea e le tupu, “‘Ia ‘outou fa‘atautau ‘iā te ia i ai.”#Ese 1.10; 2.22; 5.14
10‘Ona latou fa‘atautau ai lea ‘iā Hamanu i le la‘au na ia saunia mo Moretekai. ‘Ona mā‘ona ai lea o le ita o le tupu.#Sala 7.16; Fa‘ata 11.5-6; 26.7; Tani 6.24; Mata 7.2
Currently Selected:
Esther Greek 7: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.