Esther Greek 6
6
O le Fa‘ane‘ene‘ega o Moretekai; ‘ua Tigā tele ai Hamanu
1O lenā lava po na lē iloa ai e le tupu sina moe. ‘Ona fai atu lea o le tupu e ‘aumai le tusi e fa‘amanatu a‘i tala i nofoa‘iga. ‘Ona faitaulia ai lea i luma o le tupu.#Ese 2.23; Tani 6.18 2‘Ona iloa lea ‘ua tusia le mea na ta‘u atu e Moretekai ‘iā Piketano ma Terese, o eunuka ia e to‘alua a le tupu, ē na leoleo i le faitoto‘a, o ē na fia fa‘ao‘o o la lima i le tupu o Asueru. 3‘Ona fai atu lea o le tupu, “Pe se a se mea lelei ma se mamalu ‘ua faia mo Moretekai ‘ona o lenei mea?”
‘Ona tali mai lea o ‘au‘auna a le tupu o ē na ‘au‘auna atu ‘iā te ia, “E leai se mea ‘ua faia mo ia.”#Fai 9.14-16
4‘Ona fai atu lea o le tupu, “O ai ‘ea ‘ua i le lotoā?”
Auā ‘ua alu ane Hamanu i le lotoā i fafo o le fale o le tupu e fai atu ai i le tupu ‘ia fa‘atautauina Moretekai i le la‘au ‘ua ia saunia mo ia.#Ese 5.14 5‘Ona tali mai lea o ‘au‘auna a le tupu ‘iā te ia, “Fa‘auta, o lo‘o tu mai Hamanu i le lotoā.”
‘Ona fai atu lea o le tupu, “‘Inā sau ia o ia.”
6‘Ua ulufale mai Hamanu, ‘ona fai atu lea o le tupu ‘iā te ia, “Se a se mea e faia i le tagata ‘ua loto i ai le tupu ‘ona ia fa‘ane‘ene‘eina o ia?”
‘Ona fa‘apea ifo lea o Hamanu i lona loto, “Po o ai se isi e finagalo le tupu ona fa‘ane‘ene‘eina o ia, na o a‘u lava?”
7‘Ona tali mai lea o Hamanu i le tupu, “O le tagata ‘ua finagalo i ai le tupu ‘ona fa‘ane‘ene‘eina o ia, 8‘ia ‘aumaia le ‘ofu o le tupu e ‘ofu ai le tupu, ma le solofanua e ti‘eti‘e ai le tupu, ma le paleali‘i o le tupu e tu‘uina i lona ao.#1 Tu 1.33 9‘Ia tu‘uina atu lenā ‘ofu ma lenā solofanua i se tasi ali‘i o ali‘i sili ‘ua i le tupu, ma ‘ia latou fa‘a‘ofu ai le tagata ‘ua finagalo i ai le tupu ‘ona ia fa‘ane‘ene‘eina o ia; ‘ia latou fa‘ati‘eti‘e fo‘i ‘iā te ia i le solofanua i le malae o le ‘a‘ai, ma ‘ia latou ‘alalaga i ona luma. ‘E fa‘apea ‘ona faia i le tagata ‘ua finagalo i ai le tupu ‘ona ia fa‘ane‘ene‘eina o ia.’”#Kene 41.43; Tani 5.29
10‘Ona fai atu lea o le tupu ‘iā Hamanu, “‘Inā vave ia, ‘ia e ‘ave le ‘ofu ma le solofanua, e pei ‘ona e fai mai na, ‘ia e fai fa‘apea ‘iā Moretekai o lo sa Iutā, o lē nofo i le faitoto‘a o le tupu, ‘aua le tu‘ua se mea e tasi i mea uma na e fai mai na.”#Luka 14.11
11‘Ona ‘ave lea e Hamanu o le ‘ofu ma le solofanua ma na fa‘a‘ofu ‘iā Moretekai, na ia fa‘ati‘eti‘e fo‘i ‘iā te ia i le solofanua i le malae o le ‘a‘ai ma ‘alaga i ona luma. “E fa‘apea ‘ona faia i le tagata ‘ua finagalo i ai le tupu ‘ona fa‘ane‘ene‘eina o ia.”
12‘Ona fo‘i atu lea o Moretekai i le faitoto‘a o le tupu; a ‘ua fa‘ata‘alise atu Hamanu i lona fale ma le fa‘anoanoa, ma ‘ua ufiufi lona ulu.#2 Samu 15.30 13‘Ona fa‘amatalaina atu lea e Hamanu ‘iā Seresa lana avā ma ana uō uma, o mea uma ‘ua o‘o ‘iā te ia. ‘Ona fai atu ai lea ‘iā te ia o ona tagata popoto ma Seresa lana avā, “‘Āfai o so fānau a sa Iutā o Moretekai, ‘ua e amata ai ‘ona pa‘ū i ona luma, ‘e te lē manumālō ‘iā te ia e matuā pa‘ū lava oe i ona luma.”
14‘Ona o‘o mai lea o eunuka a le tupu, a o tautalatala i latou ma Hamanu, ma latou nanati ‘iā te ia, ‘ia alu i le taumafataga ‘ua saunia e Eseta.#Ese 5.18
Currently Selected:
Esther Greek 6: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.