Rum. 15
15
Chíkich wakeramuk enentáimtustin
1Yusja̱i̱ katsua̱ru ájinia nu iik enentáimtumatsuk kakarmachu ainia nu yáiṉtiniaitji. 2Chíkich shuar wakeramu enentáimtustiniaitji. Tura Yusja̱i̱ nú naṉkaamas shiir wekasatniun yáiṉminiaitkiui túratniuitji. 3Krístusha ni wakeramun túrachmiayi. Antsu Yus Chicham tana núnisaṉ chikichnan enentáimtusmiayi. Nu asamtai Yusan umirin asa wáitiak timia nu áarmaiti “Ámin katsekramainiak Winiaja katsekrukarmiayi.” YKan. 69:7,9,20 4Núnisaṉ ashí yaunchu Yus Papinium aarma iin jintintrámatniun áararmiayi. Nuja̱i̱ atsaṉtamkurin shiir wainkiattajnia nuka katsuntrar nákastatji. 5Yus atsaṉtamar katsuntratniun jintintramji. Tuma asa Jesukrístu túramia áintsaṉ atumniasha chikichik enentáiji̱a̱i̱ enentáimtunaisar pujustinian yainmakarti. 6Nuja̱i̱ ashí métekrak Yus shiir awajsattarme. Nisha ii Uuntri̱ Jesukrístuncha Aparí̱nti.
Israerchanum uwempratin chicham etserkamu
7Tuma asamtai chíkich shuarja̱i̱sha shiir awajnáisatarum. Kristu núnisaṉ Yusan shiir awajsat tusa iincha shiir awajtámsamiaji. 8Ju̱na tajai. Kristu tsupirnakman yaiṉkiartaj tusa támiayi. Tura Yus ti yaunchu nuna we̱a̱trí̱n “túrataj” timia nu uminkiat tusa támiayi. Nuja̱i̱ Yus timia nuna umikmia nu nekaamniaiti. 9Tura nu arantcha Israer shuarchasha Yus waitnentrartin ásarmatai nin shiir awajsarat tusa támiayi. Tura Yus Papisha tawai
“Ámin kantamprakun ashí shuarnum shiir awajsattajme.” 2 Sam. 22:50; YKan. 18:49
10Tura nu arantcha tawai
“Ashí nuṉkanmaya̱ shuartiram ashí Israer shuar Yusna ainia nuja̱i̱ warastarum.” Muis. 32:43
11Tura ataksha tawai
“Ashí aents ii Úuntri̱n shiir awajsarti.
Tura ashí shuarsha Nin ‘Ti úuntaiti’ tiartí” tawai. YKan. 117:1
12Isayassha áarmiayi
“Tawitia aparí̱ Isái weanmaya̱ akupin akintkiáttawai.
Nisha ashí nuṉkan akupeakui
ashí shuar Niiniak shiir enentáimtusartatui.” Isa. 11:1,10
13Jintia íimprutai̱ Yuska Yus enentáimtakrumin ashí warastinniasha tura ashí aṉkant shiir pujustinniasha suramsati. Túramtai Yusa Shiir Wakaní̱ kakarmari̱ji̱a̱i̱ nuna naṉkaamas jintia íimprustinian amasti.
14Yatsuru, atumsha anenainiaitrume. Tura ashí Yusna nekaarum nuamtak chicharnaikiatin nékarme. 15Tuma ai̱ṉ kajinmatki̱i̱rum tusan ataksha ti paant áakun ju̱na enentáimtikiajrume. Yus winia waitnentrak ni Chichame̱n etserkat tusa akuptakui áatjarme. 16Kame Jesukrístu Israer shuarchanum Yusa shiir chichame̱n etserkat tusa akuptúkuiti. Nuna túrakun Israer shuarchan Yusa Wakaní̱ji̱a̱i̱ shiir awajsamu ásarmatai Yusai̱ juíniajai. Tura Yussha shiir enentáiji̱a̱i̱ itiainiawai.
17Jesukrístu yaintiu asamtai Yusna takarsamaj nuna wararsamniaitjiai. 18Tura chíkich shuarja̱i̱ Kristu túramun pachischattajai. Aya wi chichasmaja̱i̱ tura túramuja̱i̱sha Israer shuarchan Kristu umimtikiamia nunak áujmatsattajai. 19Yusa Shiir Wakaní̱ kakarmari̱ji̱a̱i̱ aents tujintiamun túran ashí shuaran Jerusaréṉnum naṉkaman etserkin Iririkiu nuṉkanam ejekamjai. Kristu chichaman ashí nu nuṉkanam etserkaitjiai. 20Nuna túrakun chíkich shuar etserkachmanum Krístunun ántichu áiniamunam uwempratin chichaman etserkaitjiai. Nuja̱i̱ chíkich takasmanum takarsachuitjiai. 21Yus Papisha núnisaṉ tawai
“Chichaman peṉké antukcharuka nekaawartatui.
Nin áujmatman anturkacharusha unuimiárartatui.” Isa. 52:15
Papru Rúmanam wétaj timia
22Nuna pujuru asan íitjiarum táyatan íichmajrume. 23Tura yamaikia ju̱yá̱ takatrun umikian tura yáunchusha tuke íitjiarum tiniu asan 24Ispania nuṉkanam wéakun íistatjarme. Tura atumíin shiir irasan Ispanianam wéakui atumsha yáintkiarum shiir akuptúkchattarpash. 25Tura yamaikia kuitji̱a̱i̱ Jerusaréṉnumia̱ Yus shuaran yáiṉtaj tusan wéajai. 26Masetúnianmaya̱ shuarsha tura Akayanmaya̱ shuarsha kuítian irurar Jerusaréṉnumia̱ Yus shuaran atsumainia nuna akuptuktai tuíniawai. 27Ti wakeruiniak túrawarmiayi. Nu nekas túrashtinkiait. Israer shuarnumia̱ Yus Chichaman antukaru ásar yamaikia ni kuítriji̱a̱i̱ páchitsuk yáiṉchatniukait. 28Tuma asamtai jú̱ kuítian súsaran umiran nuikia Ispanianam wéakun íiktiatjarme. 29Tura nui̱ winiakun Kristu Shiir Chichame̱n nuja̱i̱ shiir yaiṉtajrum tusan ejetittiajrume.
30Yatsuru, ii Uuntri̱ Jesukrístunu asarum tura ni Wakaní̱ pujurtamkurmin anenia asarum Yus áujtursak tusan seajrume. Núnisrum wiji̱a̱i̱ métek Yusna takastin yáintkiattarme. 31Jutá nuṉkanmaya̱ Israer shuarnumia̱ uwemtikrat tusarum Yus áujtursatarum. Tura jú̱ kuítian júajna nunasha Jerusaréṉnumia̱ Yus shuar shiir achikiárat tusarum Yus áujtursatarum. 32Nuja̱i̱ Yus wakerakuiṉkia atumji̱a̱i̱ péṉker wampú enentáimsattsan warasan íittiajrume. 33Yus ti shiir pujustinian súana nu atumji̱a̱i̱ tsaniṉ pujurtamsati. Núnisaṉ atí.
Currently Selected:
Rum. 15: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.