Rum. 14
14
Ame yátsum kakantraip
1Shuar Yusan ishichik enentáimtana nu itiaatarum tura kakantrairap. 2Iis, chíkichka ashí yuámniaiti tuíniawai. Tura chikitcha Yúsnan awajirar namaṉ yúashtiniaiti tuíniawai. 3Tura ashí yúa nuka namaṉken yúatsna nuna wishikrashtiniaiti. Núnisaṉ ashí yucha nu ashí yuun kakantrashtiniaiti. Warí núnaka Yus ni shuari̱n awajsachukait. 4¿Ámeka timiataash péṉkeraitiam chíkich shuar kakantinia? Antsu ni úuntri̱n ni péṉker túramuncha tura yajauch túramuncha íischatniukait. Enentáimprata. Yus kakaram asa nin péṉker awajsámniaiti.
5Chikitcha enentáimpratai. Chíkich shuar tsawantan achikiar “Jú̱ tsawantai̱ Yus naṉkaamas shiir awajsatniuiti” tuíniawai. Chikitcha ashí tsawantan métek enentáimtuiniawai. Ayu, tura ni enentáimtamun nekas paant nekaatniuiti. 6Chikichik tsawantan enentáimtakka Yusan shiir awajsatniun túrawai. Tura ashí métekrak enentáimtakka Yusan shiir awajsataj tusa túrawai. Yurumkaja̱i̱sha ashí yúana nu Yusan yumiṉkias shiir awajsataj tusa túrawai. Núnisaṉ ashí yúatsna nusha Yusan yumiṉkias shiir awajsataj tusa túrawai.
7Iikkia ii enentái̱ji̱a̱i̱ṉ iwiaaktsuji. Tura jáakrisha ii enentái̱ji̱a̱i̱ṉ jaatsji. 8Kame iwiaaku pujakrisha ii Uuntri̱ Kristu shiir awajsatai tusar pujurji. Tura jáakrisha tuke Níniuitji. Nu asamtai iwiaaku pujakrisha tura jakarsha tuke Krístunuitji. 9Kame jakancha iwiaakuncha ashí ni Uuntri̱ ajastaj tusa Kristu jaka nantakmiayi.
10Tura ¿urukamtai ame yátsum “yajauchiti” tame. Urukamtai nakitiam? Warí ashí iikia ii túramu paant awajnásat tusar Kristui̱ naka wajastatji.2 Kur. 5:10 11Nu asamtai Yus Papinium tawai
“Wi nekas iwiaaku pujá asan ashí Winí̱ tikishmátrurartatui.
Tura ashí ‘Yus asa tuke péṉker túriniaiti’ turutiartatui” tawai.Isa. 45:23; Jir. 2:10-11
12Tuma asamtai iisha chikichik chikichik ashí ii túramu Yus paant ujakártatji.
Ame yátsum tunaanum aju̱a̱raip
13Nu asamtai “yajauch túriniaiti” tu áujmatnaisashtiniaitji. Antsu ii yachi̱ tunaanum aju̱a̱rchatin ti enentáimturtiniaitji. 14Jesukrístu jintintiámu asan ju̱na nékajai, Yus najanamuka péṉkerchaka atsawai. Ashí túramniaitjiai. Túrasha shuar chichaak “Nu túrushtainti” táyat nuna túrakka niji̱a̱i̱ tunaiti. 15Tuma asamtai shuar chichartamuk “Nu yúakminkia Yusja̱i̱ péṉkerchaiti” tai̱, ame yúakminkia nu shuar itiurchat enentáimsashtatuak. Tura nisha tunaanum iniaar meṉkakamniaiti. Nu shuar aneakum túratsme. Enentáimprata. Aya ame yúamna núja̱i̱ṉ ame yátsum Kristu jarukmia nu emeṉkákaip. 16Tura “yuámniaitjiai” táyatam wi yúakui yajauch áujmatrusara̱i̱ṉ tusam iniaisata. 17Kame Yus umirkatin yurumátniuja̱i̱sha umartinji̱a̱i̱sha enentáimtuschatniuiti. Antsu Yusa Wakaní̱ji̱a̱i̱ shiir wekasar Yusja̱i̱ tura shuarja̱i̱ nawamnaikiar tí peṉker wekasatniuitji. 18Ashí shuar Krístun núnis umireakui Yussha tura chíkich shuarsha péṉker enentáimtuiniawai.
19Nu asamtai tuke shiir pujusminia nu túrakur Yusja̱i̱ kakaram ajastin yáiniaiktai. 20Yus iisam ashí yuámniaitji. Antsu ame yúamna nuja̱i̱ chíkich shuar tunaanum aju̱a̱rtin tunaiti. Tuma asamtai ame yuam nuja̱i̱ Yus nu shuara enentái̱n takarsamu emesraip. 21Nu túrashtin nuikia namaṉ yúashtincha karía umarchatniusha péṉkeraiti. Warí, túrushtaiji̱a̱i̱ ame yátsum itiurchat enentáimtikram tunaanum aju̱a̱rchatapash. Tura nu shuar Yusan nekas enentáimtuschamnia ajastatui. Nuka atsutí. 22Ame Yus nekas enentáimtakum ashí túramniaitkiumka Yusak wararsata. Shuar Yus íimmianum shiir enentáiji̱a̱i̱ mash túramnia nu nekas shíiraiti. 23Tura araantushim yua nuka Yusan shiir enentáimtutsuk yua asa sumamattawai. Kame ashí Yus shiir enentáimtutsuk túramu tunaiti.
Currently Selected:
Rum. 14: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.