Rum. 13
13
1Akupniúnka ashí shuar umirkatniuiti. Akupniúka Yus apujsamuiti. Yus apujsachma akupin atsawai. 2Tuma asamtai shuar akupniun umirtsuna nu, Yus apujsamun umireachu asa nekas asutniátniuiti. 3Kame akupniúka péṉker shuar sapijmiakarat tusar apujsachma áiniawai. Antsu yajauch shuar ashamkarat tusar apujsamu áiniawai. Ni ashamtsuk pujustin wakerakmeka péṉker túrata. Túrakminkia akupin shiir enentáimturmartatui. 4Yaintmakat tusa Yus apujsamuiti. Antsu yajauch túrakmeka akupin nekas ashamkatniuitme. Warí, Yus ántar apujsachmaiti. Tunáa shuaran asutiátniun Yus apujsaiti. 5Nu asamtai akupin tuke umirkatniuiti. Aya asutiuáwa̱i̱ṉ tusar umirkashtiniaitji. Antsu enentáiniam itit awajsachma wekasatai tusar umirkatniuiti. 6Tuma asamtai núnisaṉ akupniun kuit súsatniua nu páchitsuk susatarum. Nu takatan pujursarat tusa Yus apujsaruiti.
7Ashí túratniua nu túratarum. Akiktiniaitkiumka páchitsuk akikta. Akupniúsha uuntcha ashí núnisaṉ írunna nusha shiir enentáimtikratarum. 8Wariji̱a̱i̱ṉsha tumashrintin peṉké airap. Antsu mái̱ anenai tuke ajatarum. Kame chíkich shuar aneakum ni péṉker túrattame. Túram ashí akupkámu páchitsuk umirkattame. 9Akupkámusha “Tsanirmawaip, maṉkartuawaip, kasamkaip, chíkich shuar tsanumpruraip, chikichna wakerutkaip” Jiin. 20:13-17 tawai. Nusha tura chíkich akupkámusha ashí ju̱ja̱i̱ tíminiaiti “Ame aya̱shim aneam núnismek ashí shuar aneeta.” Riw. 19:18 10Shuar chíkich shuaran aneakka yajauch awajsashtatui. Tuma asa akupkámun ti shiir umirkattawai.
11Ii yámantkamtaik Yus nekas enentáimtusmiaj nui̱ “Ii ti shiir ajasár tuke uwempratin ukunam átatui” tu enentáimprachiajiash. Antsu yamaikia nu tsawant yuntumsamtai ashí túrajnia nuja̱i̱ shintiarar enentáimpratniuitji. 12Tuke káshitiat tsawa̱a̱temprai. Ii Uuntri̱ Kristu jú̱ tunáa nuṉkanam tátin ishichik ajasái. Tuma asamtai ii túrutairi̱ kiritniua núnisaṉ yajauch túrutai̱ ana nuka túrutsuk tsáapninium péṉker wekasatin kakaram ajastai. 13Túratniua nuja̱i̱ métek wekasatai. Tsawái̱ wekaakur kiritniunam ú̱mkar tunáa túrutai̱ túrashtai. Nampetsuk, yajauch warartsuk, tsanirmatsuk, jianaitsuk tura kajernaitsuk aya péṉker túratai. 14Ii Uuntri̱ Jesukrístu túramia núnisrik túratai. Tura ii aya̱shí̱ wakeramu umikiat tusar tsaṉkatkashtiniaitji.
Currently Selected:
Rum. 13: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.